【車聞短打】足總盃八強抽中維爾港　避開曼城利記隨時五戰阿仙奴

啱啱足總盃八強抽籤出爐，車仔抽到一條算係相當唔錯嘅籤，我哋將會喺 4 月頭坐鎮史丹福橋主場，迎戰目前踢緊英甲嘅維爾港 (Port Vale)。只要贏波，就可以直入溫布萊踢四強。


維爾港係咩來頭？小編打 FM 嘅專屬愛隊！

維爾港？咩嚟架食得架？

好多新一代車迷可能對維爾港呢隊波無乜印象。翻查紀錄，原來車仔對上一次同佢哋喺正式比賽交手，已經要數到接近 100 年前嘅 1928/29 球季（當時仲係舊英乙，車仔主場和 3：3，作客輸 1：0）。今次更加係雙方喺足總盃史上第一次碰頭。
請容許小編喺度公器私用分享件趣事：其實維爾港係我平時打《Football Manager》嗰陣，除咗車路士之外，唯一一隊會長玩嘅球隊……

點解？因為每次身痕想玩「由低組別升班打起」嘅話，我都會揀佢哋。估唔到今次現實世界嘅足總盃，竟然可以見證「愛隊」大戰「愛隊」，真係有一種奇妙感覺。


曼城利記攬炒 漁人得利？小心「五戰阿仙奴」魔咒

今次抽籤最令人振奮嘅，莫過於見到曼城同利物浦互撼，兩大爭標對手要提早喺八強攬炒，對車路士嚟講絕對係漁人得利嘅好消息。
不過大家望望另一條線，阿仙奴抽中咗修咸頓，晉級呼聲極高。計計埋埋聯賽同其他盃賽嘅潛在碰頭機會，如果大家齊齊殺入四強，車仔今季分分鐘要同阿仙奴大戰足足五次。諗起又要同阿仙奴係禁區瘋狂拉扯，真係有少少扯咗…件波衫。


前車可鑑，切忌輕敵大意

雖然對手只係英甲球隊，我哋仲有主場之利兼且避開咗最難打嘅強敵，但足球場上無包生仔呢回事。

大家諗下上週末對域斯咸場波就知，對手雖然係英冠，但都搞到我哋要兩度落後，激戰到要派返正選上陣、加時靠加拿祖同祖奧柏度入波反勝 4：2。盃賽嘅對手為咗創造奇蹟，隨時會爆發出 200% 嘅戰鬥力。希望領隊羅生同班球員好好把握呢個黃金機會，保持專注，穩穩陣陣攞低呢張四強入場卷啦。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog

鍾意我嘅文章，又有餘力支持我嘅話，記得去我Substack訂閱：
https://hkgchedog.substack.com/