一張相，有時勝過千言萬語。最近，我哋嘅中堅迪西斯（Axel Disasi）喺佢Instagram上面，post咗一張相，相中，就係我哋車路士「炸彈部隊」（bomb squad）嘅專用更衣室。
冇豪華嘅設備，冇個人化嘅儲物櫃，只有灰色嘅牆身、木製嘅長凳，同埋牆上面簡陋嘅掛衫鉤仲有名牌。有外國媒體形容，呢個環境比起英超，更似一支非聯賽級別（non-league）球隊，甚至係一間「中學」嘅更衣室，堅係隔住個Mon都聞到入面陣酸縮味。
而相中最令人心酸嘅，莫過於坐喺角落頭，我哋青訓出身嘅基卓斯（Alfie Gilchrist）。佢雙手抱頭、神情沮喪。呢個畫面，將足球員被球會遺棄嗰種殘酷嘅現實，赤裸裸咁呈現喺我哋眼前。
呢張相，隨即喺我哋球迷之間，引爆咗一場激烈嘅辯論。一邊嘅球迷，覺得球會咁樣對待球員，實在太過唔尊重、有失豪門風範，甚至覺得「丟球會嘅假」。但另一邊嘅球迷就認為，足球本來就係一盤生意，將準備離隊嘅球員分開訓練，係所有頂級球會都會做嘅事，係一個必要之惡。
究竟，邊一邊先係啱？今日就等我寫一寫呢個冇標準答案嘅問題……
反方觀點：丟球會嘅假、對球會形象的損害
我哋先講反方嘅睇法。喺好多球迷眼中，無論背後有咩苦衷，將一班球員咁樣公開隔離，都係一種唔尊重、甚至係羞辱性嘅行為。
有球迷直言，見到張相之後，覺得好羞恥，甚至丟球會嘅假。佢哋認為，作為一間世界頂級球會，我哋應該要有更好嘅做法。尤其係對待好似基卓斯咁樣，由細到大都係車路士球迷、根正苗藍嘅青訓球員，佢堅係冇做錯任何嘢，但就被咁樣對待，見到佢抱頭係角落頭沮喪嘅樣，最令球迷心痛。
呢種做法，亦都可能會帶嚟長遠嘅負面影響。有球迷擔心，呢啲相片同報導，會嚇走未來嘅年輕天才。當佢哋見到就算加盟咗車路士，都可能會因為一次換帥、一次戰術改變，而被用完即棄，佢哋仲會唔會夠膽冒險加入我哋個Project？
最後，反對嘅球迷認為，炸彈部隊之所以存在，問題嘅根源，其實係出喺我哋自己嘅管理層身上。佢哋批評，球會近年嘅收購策略太過混亂，不斷簽入顯然唔需要嘅球員，先至會搞到個陣容咁臃腫。有球迷指出，我哋上季同期嘅一隊人數，最高達到43人，雖然最後我地有順利將球員出售同外借減到28人，但仍然改變唔到球員過多嘅問題。所以，喺佢哋眼中，「炸彈部隊」並唔係一個解決問題嘅方法，佢本身就係管理層錯誤決策所造成嘅問題。
正方觀點：商業現實，為何「炸彈部隊」是必要之惡？
聽完反方嘅睇法，我哋就要睇下另一邊嘅聲音。支持或者理解球會做法嘅球迷，佢哋嘅論點，就冇咁感性，而係更加集中喺足球世界嘅「商業現實」同「實際操作需要」之上。
首先，佢哋認為，將準備離隊嘅球員分開訓練，並唔係咩新鮮事。有球迷就指出，所有頂級球會都係咁做，而且我哋車路士自己，過去15年左右都一直有龐大嘅外借大軍同棄將存在。如果大家有記憶，我地前法國國腳馬路達（Florent Malouda）就係最好例子，當年佢就試過成個球季，被下放到U21青年隊訓練。呢個只不過係足球世界一直存在嘅「常態」。
第二，就係關於「待遇」問題。有球迷好直接咁講，呢班球員並唔係喺勞改營受苦。佢哋每個禮拜，袋緊「五萬、七萬五、甚至十萬鎊」嘅週薪，享受緊 Cobham 最頂級嘅訓練設施同膳食。有位球迷講得好抵死：「我願意用我老婆，去換取相入面任何一個人嘅生活。」呢句雖然係講笑，但都反映出，喺好多人眼中，佢哋嘅處境，並冇想像中咁可憐。
最後，亦都係最關鍵嘅一點，就係戰術上嘅必要性。將呢班球員分開，係有實際需要嘅。第一，馬蛇需要一個人數合適嘅團隊，去進行有效嘅戰術演練，係波特執教時期我地已經知，如果一隊有成45人，根本冇可能做到適當嘅訓練。
第二，亦都係最重要嘅，就係要防止戰術外洩。呢班球員，好多都已經同其他球會傾緊轉會。如果俾佢哋參與一隊嘅戰術會議、睇住我哋點樣部署死球，咁我哋嘅戰術機密，就好可能會隨住佢哋嘅轉會，而一齊洩漏俾我哋嘅競爭對手。呢個風險，係任何一間頂級球會都唔會容許，咁樣隔離佢地都係國際慣例。
悲情人物：邊最可憐？
辯論完一大輪，我哋都係時候，將焦點放返喺相中人身上。喺呢個「炸彈部隊」入面，每一個球員，其實都有一個唔同嘅「悲情故事」。
第一類，係高薪老臣：史達寧（Raheem Sterling）同捷維爾（Ben Chilwell）。佢哋係一個係新老闆嘅失誤，一個係舊時代嘅產物，前者拎住份週薪高達£325,000嘅天價合約，後者減薪之後仲有£100,000，但狀態同重要性，已經大不如前。高昂嘅人工加上低迷嘅狀態，令佢哋難以被賣走，變相成為合約囚犯。一個係前英超冠軍核心，一個係我哋嘅前副隊長，而家喺一個中學更衣室入面等待前路，最令人唏噓。
第二類，係昨日英雄，積臣（Nicolas Jackson）同安宮古（Christopher Nkunku）。佢哋嘅情況，反映出球會換血有幾無情。幾個月前，佢哋仲係球隊計劃中嘅一員，但隨住夏天簽入祖奧·柏度（João Pedro）同戴納（Liam Delap），加上嚟緊會或者會加盟嘅西蒙斯，兩位重點球員就瞬間變成冗員。雖然傳聞仲有紐卡素、意甲球會甚至拜仁對佢哋有興趣，但由核心變棄將，當中嘅落差，肯定唔好受。
第三類，亦都係最令球迷心痛嘅，就係「青訓之子」基卓斯（Alfie Gilchrist），佢仲要唔係第一次係相入面出現。佢由細到大都係車路士球迷，喺青訓營更一度被譽為新泰利。上上季先啱啱完成一隊處子戰，仲入埋波，夢想成真。但轉個頭，佢就發現自己，要喺一個簡陋嘅更衣室入面，「雙手抱頭、神情沮喪」咁坐喺角落。有球迷講得好：「佢冇做錯任何嘢」，但就被當成「一張紙上面嘅名」咁對待。佢嘅故事，最能體現出，喺冷酷嘅足球商業世界入面，夢想有幾脆弱。
總結：足球殘酷的另一面
或者，將準備離隊嘅球員分開管理，真係商業足球世界入面一個冷酷但必要嘅程序。或者，我哋真係需要籌集資金，去追逐下一個天價目標。
呢啲道理，我哋理智上，可能都明。但當我見到嗰個坐喺角落頭，雙手抱頭嘅基卓斯時，所有嘅理智考慮都好似變得蒼白無力。
史達寧、捷維爾，佢哋係為錢而嚟嘅僱傭兵，遊戲規則係點，佢哋自己都清楚。但基卓斯唔同，佢係一個由細到大，都夢想為車路士踢波嘅細路；一個喺我哋青訓營成長、被譽為充滿住夢想嘅未來藍軍；一個上季先啱啱為一隊入波，實現夢想嘅自己人。
基卓斯真係真係無做錯任何嘢。佢值得有更好嘅待遇，起碼，佢應該得到一份，作為車路士青訓，應有嘅尊重。
見到相入面，佢垂頭喪氣嘅樣，我諗，每一個真正嘅車迷，心裡面都唔會好受。或者，喺追逐一個又一個冠軍嘅同時，我哋都唔應該忘記，一間球會最重要嘅根，到底喺邊度。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
請按此登錄後留言。未成為會員? 立即註冊