尋日（4月30日）車路士官方突然宣佈同杜拜地產巨頭 DAMAC Properties 達成合作，唔單止要做「官方物業發展合作夥伴」，仲即時空降做埋今季餘下賽事嘅心口贊助商！呢個消息真係震撼咗唔少車迷，喺季尾衝刺嘅關鍵時刻先嚟換心口 Logo，成件事充滿咗「驚喜」同問號。
繼尋日篇【突發】文之後，特登周圍搵左唔同的材料，等我哋可以再深入啲，拆解下呢位新金主 DAMAC 究竟係何方神聖？今次合作背後又有啲咩玄機？係單純搵個「臨記」頂住檔，定係球會放長線釣大魚嘅一步棋？
起底 DAMAC：杜拜地產巨頭係咩料？
首先，呢間 DAMAC Properties 絕非泛泛之輩。根據資料，佢哋自 2002 年起家，已經係阿聯酋（UAE）最大嘅 私營 豪華房地產發展商，喺中東地區聲名顯赫。公司業務唔單止遍佈中東，仲擴展到英國、美國、加拿大、馬爾代夫等地，近年更加積極開拓亞太市場，舊年（2024）11月先喺香港幫手由治及興，開咗第三個亞太區辦事處，野心睇嚟唔細。
DAMAC 最耍家嘅就係起豪宅，仲好鍾意同頂級奢侈品牌玩 crossover，例如 Versace、Roberto Cavalli、de GRISOGONO 等等 ( 利申：我全部都唔識 )，打造極致奢華嘅住宅體驗。佢哋嘅業績都好驚人，至今已經交付咗超過 48,000 個住宅單位，仲有成 50,000 個單位喺規劃緊。
睇嚟搵佢哋做「官方物業發展合作夥伴」，喺「起樓」呢方面，專業程度應該有返咁上下。佢地公司嘅高層，例如銷售及發展董事總經理 Amira Sajwani 同董事會成員 Abbas Sajwani，都活躍於公司嘅重要發佈，似乎家族色彩都幾濃厚。
合作解構：「短期心口」+「長期起樓」
今次合作可以拆開兩部分睇，而且性質好唔同：
1. 短期心口贊助
呢個係最引人注目，亦都係最令人 R 頭嘅部分。DAMAC 個 Logo 會即時印上男子隊同女子隊波衫心口，但有效期極短，只係由今日（5月1日）對佐加頓斯 (Djurgarden) 嘅歐協聯四強首回合開始，直到今個 24/25 球季完結。計計埋埋，最多咪踢 4 場聯賽 + 3 場歐協聯（如果入到決賽），即係得 7 場貨仔。
更重要嘅係，根據 The Athletic 嘅報道，呢個贊助協議暫時並 唔包 今年夏天（6-7月）喺美國舉行嘅世界冠軍球會盃 (Club World Cup)！呢個操作真係匪夷所思。要知道，世冠盃先係真正嘅國際大舞台，曝光率極高，竟然唔包？呢份短期贊助嘅實際價值同收入，真係要打個大問號，當然都有可能會之後添食加碼，預知未來我未做到就唔多作評論啦。
仲要提提大家，呢個已經係車路士連續第二個球季喺開季時冇心口贊助。上季都要等到 9 月先同 Infinite Athlete 簽約 (據報約 £40m 一年)，今季仲要搞到季尾先搵到個「短期工」頂住心口個窿，情況似乎唔多樂觀。
2. 長期物業發展合作
相比起個短命心口贊助，呢部分可能先係戲肉。雙方會喺杜拜聯手打造一個名為「Chelsea Residences by DAMAC」嘅住宅項目。呢個項目選址喺杜拜新嘅海濱地段 Maritime City，預計會有超過 1400 個單位，主打無敵海景，仲會將車路士嘅品牌元素融入設計同設施之中，例如禮賓服務、健身空間等等，目標係成為全球第一個以車仔為主題嘅品牌住宅。
The Athletic 報道仲提到，呢個項目嘅發展成本可能高達 10 億英鎊（約 98 億港元），球會方面形容佢係「奢華生活」體驗。球會高層亦都認為呢個係「首創」嘅合作模式，有潛力開闢一條利潤豐厚嘅新財路。睇嚟，球會可能更睇重呢個長線地產項目帶來嘅潛在收益同埋喺中東嘅品牌拓展，但實際收益係幾多，最終呢舊錢會唔會計入FFP同PSR………唔………… ( 起碼佢起嘅樓我買唔起先 )
季尾空降贊助？時機耐人尋味
點解要揀喺季尾呢個尷尬時間點宣佈？仲要搞個咁短命嘅心口贊助？箇中原因，我哋可以估下：
為「車仔樓」造勢： 最直接嘅解釋，就係為咗慶祝同推廣啱啱公佈嘅 Chelsea Residences 項目。用短期心口贊助嚟換取即時嘅全球曝光，幫杜拜個樓盤打響頭炮。
長期贊助難產？： 亦都好可能反映咗球會喺尋找 24/25 球季長期心口贊助商方面遇到困難。搵唔到長工，咪唯有搵份 Part-time 頂住先，起碼唔使件衫吉咗個心口咁肉酸，尤其係可能有歐協聯決賽要踢。
PSR 壓力下的「妙計」？： 無獨有偶，車路士選擇係 4 月尾宣佈合作，雖然呢份短期贊助嘅金額可能唔算好大（尤其唔包世冠盃），但任何商業收入喺 6 月 30 日財政年度死線前入賬，理論上都有助於舒緩 PSR (Profit and Sustainability Rules) 壓力。當然，效果有幾大就真係見仁見智，似乎更似係「好過冇」嘅操作。而且為左配合世冠盃又會提早左開轉會窗的關係，唔通真係為左簽候辛去踢世冠盃而做？（呢點純粹推測，要戴返個頭盔）
更深層嘅財技操作？（純粹9up下）： 醉翁之意不在酒，會唔會成件事嘅重點根本就係個地產項目，心口贊助只係 DAMAC 合作嘅附加條件，甚至係交換條件？甚至有更大膽嘅猜測，Maybe 涉及「左手交右手」嘅操作？例如，如果 球清湖 / 牙 Todd 本身都有份投資或者參與呢個同 DAMAC 合作嘅杜拜地產項目，咁 DAMAC 再用一筆錢贊助返車路士，變相係將老闆嘅資金，透過商業贊助嘅形式注入球會，令盤數好睇啲。當然，呢啲純粹係球迷之間嘅「陰謀論」式猜測，冇任何實質證據。不過以清湖喺過往玩過嘅刁鑽財技嚟睇，球迷有呢啲聯想都唔出奇。
總結：眼前嘅補鑊 vs 長遠嘅問號
同 DAMAC 嘅合作，特別係個短期心口贊助，睇落似係一個解決燃眉之急嘅「補鑊」方案，同時為長遠嘅地產項目造勢。好處係，即將到來嘅關鍵比賽唔使再心口全白，而且長遠嘅地產合作可能有唔錯嘅錢途。
但壞消息係，呢個短期操作再次突顯咗車路士喺尋找穩定、高價值嘅長期心口贊助商方面，似乎仍然舉步維艱。連最重要嘅世冠盃都包唔到，情況令人擔憂。正如外媒分析指出，如果下季能夠重返歐聯，對於傾到一份理想嘅長期贊助合約肯定會大有幫助。
眼前嘅問題暫時解決咗（一部分），但關於 25/26 球季件波衫心口究竟會印住邊個 Logo，呢個巨大嘅問號依然懸喺度。今晚對佐加頓斯，大家就要第一次見到印住 DAMAC 嘅波衫喇，得最多7場波有的限量波衫，唔睇走寶！
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https：//www.facebook.com/profile.php?id=61566593983419
https：//www.threads.com/@hkgchedog
繼尋日篇【突發】文之後，特登周圍搵左唔同的材料，等我哋可以再深入啲，拆解下呢位新金主 DAMAC 究竟係何方神聖？今次合作背後又有啲咩玄機？係單純搵個「臨記」頂住檔，定係球會放長線釣大魚嘅一步棋？
起底 DAMAC：杜拜地產巨頭係咩料？
首先，呢間 DAMAC Properties 絕非泛泛之輩。根據資料，佢哋自 2002 年起家，已經係阿聯酋（UAE）最大嘅 私營 豪華房地產發展商，喺中東地區聲名顯赫。公司業務唔單止遍佈中東，仲擴展到英國、美國、加拿大、馬爾代夫等地，近年更加積極開拓亞太市場，舊年（2024）11月先喺香港幫手由治及興，開咗第三個亞太區辦事處，野心睇嚟唔細。
DAMAC 最耍家嘅就係起豪宅，仲好鍾意同頂級奢侈品牌玩 crossover，例如 Versace、Roberto Cavalli、de GRISOGONO 等等 ( 利申：我全部都唔識 )，打造極致奢華嘅住宅體驗。佢哋嘅業績都好驚人，至今已經交付咗超過 48,000 個住宅單位，仲有成 50,000 個單位喺規劃緊。
睇嚟搵佢哋做「官方物業發展合作夥伴」，喺「起樓」呢方面，專業程度應該有返咁上下。佢地公司嘅高層，例如銷售及發展董事總經理 Amira Sajwani 同董事會成員 Abbas Sajwani，都活躍於公司嘅重要發佈，似乎家族色彩都幾濃厚。
合作解構：「短期心口」+「長期起樓」
今次合作可以拆開兩部分睇，而且性質好唔同：
1. 短期心口贊助
呢個係最引人注目，亦都係最令人 R 頭嘅部分。DAMAC 個 Logo 會即時印上男子隊同女子隊波衫心口，但有效期極短，只係由今日（5月1日）對佐加頓斯 (Djurgarden) 嘅歐協聯四強首回合開始，直到今個 24/25 球季完結。計計埋埋，最多咪踢 4 場聯賽 + 3 場歐協聯（如果入到決賽），即係得 7 場貨仔。
更重要嘅係，根據 The Athletic 嘅報道，呢個贊助協議暫時並 唔包 今年夏天（6-7月）喺美國舉行嘅世界冠軍球會盃 (Club World Cup)！呢個操作真係匪夷所思。要知道，世冠盃先係真正嘅國際大舞台，曝光率極高，竟然唔包？呢份短期贊助嘅實際價值同收入，真係要打個大問號，當然都有可能會之後添食加碼，預知未來我未做到就唔多作評論啦。
仲要提提大家，呢個已經係車路士連續第二個球季喺開季時冇心口贊助。上季都要等到 9 月先同 Infinite Athlete 簽約 (據報約 £40m 一年)，今季仲要搞到季尾先搵到個「短期工」頂住心口個窿，情況似乎唔多樂觀。
2. 長期物業發展合作
相比起個短命心口贊助，呢部分可能先係戲肉。雙方會喺杜拜聯手打造一個名為「Chelsea Residences by DAMAC」嘅住宅項目。呢個項目選址喺杜拜新嘅海濱地段 Maritime City，預計會有超過 1400 個單位，主打無敵海景，仲會將車路士嘅品牌元素融入設計同設施之中，例如禮賓服務、健身空間等等，目標係成為全球第一個以車仔為主題嘅品牌住宅。
The Athletic 報道仲提到，呢個項目嘅發展成本可能高達 10 億英鎊（約 98 億港元），球會方面形容佢係「奢華生活」體驗。球會高層亦都認為呢個係「首創」嘅合作模式，有潛力開闢一條利潤豐厚嘅新財路。睇嚟，球會可能更睇重呢個長線地產項目帶來嘅潛在收益同埋喺中東嘅品牌拓展，但實際收益係幾多，最終呢舊錢會唔會計入FFP同PSR………唔………… ( 起碼佢起嘅樓我買唔起先 )
季尾空降贊助？時機耐人尋味
點解要揀喺季尾呢個尷尬時間點宣佈？仲要搞個咁短命嘅心口贊助？箇中原因，我哋可以估下：
為「車仔樓」造勢： 最直接嘅解釋，就係為咗慶祝同推廣啱啱公佈嘅 Chelsea Residences 項目。用短期心口贊助嚟換取即時嘅全球曝光，幫杜拜個樓盤打響頭炮。
長期贊助難產？： 亦都好可能反映咗球會喺尋找 24/25 球季長期心口贊助商方面遇到困難。搵唔到長工，咪唯有搵份 Part-time 頂住先，起碼唔使件衫吉咗個心口咁肉酸，尤其係可能有歐協聯決賽要踢。
PSR 壓力下的「妙計」？： 無獨有偶，車路士選擇係 4 月尾宣佈合作，雖然呢份短期贊助嘅金額可能唔算好大（尤其唔包世冠盃），但任何商業收入喺 6 月 30 日財政年度死線前入賬，理論上都有助於舒緩 PSR (Profit and Sustainability Rules) 壓力。當然，效果有幾大就真係見仁見智，似乎更似係「好過冇」嘅操作。而且為左配合世冠盃又會提早左開轉會窗的關係，唔通真係為左簽候辛去踢世冠盃而做？（呢點純粹推測，要戴返個頭盔）
更深層嘅財技操作？（純粹9up下）： 醉翁之意不在酒，會唔會成件事嘅重點根本就係個地產項目，心口贊助只係 DAMAC 合作嘅附加條件，甚至係交換條件？甚至有更大膽嘅猜測，Maybe 涉及「左手交右手」嘅操作？例如，如果 球清湖 / 牙 Todd 本身都有份投資或者參與呢個同 DAMAC 合作嘅杜拜地產項目，咁 DAMAC 再用一筆錢贊助返車路士，變相係將老闆嘅資金，透過商業贊助嘅形式注入球會，令盤數好睇啲。當然，呢啲純粹係球迷之間嘅「陰謀論」式猜測，冇任何實質證據。不過以清湖喺過往玩過嘅刁鑽財技嚟睇，球迷有呢啲聯想都唔出奇。
總結：眼前嘅補鑊 vs 長遠嘅問號
同 DAMAC 嘅合作，特別係個短期心口贊助，睇落似係一個解決燃眉之急嘅「補鑊」方案，同時為長遠嘅地產項目造勢。好處係，即將到來嘅關鍵比賽唔使再心口全白，而且長遠嘅地產合作可能有唔錯嘅錢途。
但壞消息係，呢個短期操作再次突顯咗車路士喺尋找穩定、高價值嘅長期心口贊助商方面，似乎仍然舉步維艱。連最重要嘅世冠盃都包唔到，情況令人擔憂。正如外媒分析指出，如果下季能夠重返歐聯，對於傾到一份理想嘅長期贊助合約肯定會大有幫助。
眼前嘅問題暫時解決咗（一部分），但關於 25/26 球季件波衫心口究竟會印住邊個 Logo，呢個巨大嘅問號依然懸喺度。今晚對佐加頓斯，大家就要第一次見到印住 DAMAC 嘅波衫喇，得最多7場波有的限量波衫，唔睇走寶！
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https：//www.facebook.com/profile.php?id=61566593983419
https：//www.threads.com/@hkgchedog
請按此登錄後留言。未成為會員? 立即註冊