講起哈利簡尼 (Harry Kane)，除咗拜仁慕尼黑 9 號、三獅隊長、入波機器呢啲身份之外，最深入民心嘅，恐怕就係佢個貼身跟咗十幾年嘅「無冠魔咒」。上季佢帶住萬千期望，以破紀錄身價由熱刺轉戰德甲班霸拜仁，點知劇本都寫唔出——佢自己個人數據爆晒標，狂轟 44 球，但拜仁竟然喺 11 年嚟首次「四大皆空」，連個德國盃都冇！搞到簡尼俾人話係黑氣石，搞笑程度再上一個層次。
不過風水輪流轉，估唔到一年之後，劇情可能要大逆轉。今季 (24/25) 嘅拜仁喺德甲一騎絕塵，踢咗 31 輪已經拋離第二位 8 分，冠軍幾乎肯定到手。而主角簡尼呢？佢繼續 Carry 全場，數據顯示佢近一年場均入接近一球 (0.91 G/90)，仲交出唔少助攻 (0.27 A/90)，表現依然世界級。眼見拜仁就嚟捧沙律盤，係咪代表糾纏簡尼半生嘅「無冠笑話」，終於可以畫上句號？作為花生友兼車迷，今次就同大家食住花生，睇下呢場戲點樣收科。
上季回顧：預想外地獄級難度嘅「拜仁體驗」？
話說舊年夏天，簡尼以天價加盟拜仁，成件事包裝到好似拍戲咁，慕尼黑市中心掛晒橫額，將佢塑造成Ironman一樣嘅救世主。劇本寫好晒：簡尼嚟拜仁就係要贏冠軍，拜仁簽簡尼就係要橫掃歐洲。點知現實同劇本完全係兩回事。
上個球季 (23/24) 對簡尼同拜仁嚟講，簡直係一場惡夢。雖然簡尼自己踢到識飛，各項賽事夾埋轟入 44 球，單計聯賽 25 場都有 15 粒，數據絕對係世界級。但係！佢加盟嘅呢支「宇宙仁」，竟然喺 11 年嚟第一次「四大皆空」！德甲俾「藥廠」利華古遜以不敗姿態搶走咗；德國盃仲要爆大冷輸俾第三級別嘅沙貝魯根出局；踢到歐聯四強，臨尾香又俾皇馬反 cup，簡尼仲要喺關鍵時刻傷出，眼白白睇住球隊崩盤。
真係唔到你唔信邪！成個球季落嚟，無論簡尼點 Carry，個獎盃櫃依然係吉嘅。Sky Sports 都出文分析過，話可能簡尼係「Join 啱球會，但唔啱時辰」(Right club, wrong time)。當時嘅拜仁內部問題多多，例如傷兵滿營加上青黃不接（梅拿、紐亞以外嘅舊大佬走得七七八八）、管理層又混亂。喺咁嘅情況下，就算簡尼一個神級表現，都難以單天保至尊。結果就係，「哈利簡尼無冠」呢個笑話，繼續成為全球花生友嘅話題，甚至仲 upgrade 咗，黑到連拜仁都冇運行！
今季再Carry！數據證明簡尼趕走「無冠心魔」
經歷咗上季「贏個人數據、輸團隊錦標」嘅尷尬情況之後，好多人都等住睇簡尼今季會唔會繼續「黑仔」。點知今季嘅簡尼，唔單止冇跌 watt，仍然繼續 Carry 拜仁！
睇返數據，佢今季喺德甲嘅表現簡直係「屈機」級數。睇返統計，佢頭 29 場聯賽已經喪轟 24 粒入球，仲要交出 7 個助攻，平均每 95 分鐘就貢獻一個入球，效率驚人。更加值得留意嘅係，佢嘅實際入球數字仲要高過預期入球 (xG 19.68 vs 實際 24 球)，證明佢把握力超強，唔少高難度嘅機會佢都轉化到做入波。
除咗入波，佢今季喺助攻同創造力方面都有顯著提升。數據顯示佢創造咗 11 次黃金機會，交出 7 個助攻，甚至 OPTA 的數據都支持左呢點，佢嘅助攻數 (0.27/90)、預期助攻 (xA 0.18/90)、關鍵傳球 (1.53/90) 同埋製造入球機會 (GCA 0.62/90) 都係頂級水平。呢啲數據都顯示，今季嘅簡尼唔再只係一個等餵波嘅射手，佢更多參與組織，甚至墮後策動攻勢，成為拜仁進攻體系入面真正嘅核心，帶領住穆斯亞拉、奧利斯呢班後生仔。
正如佢喺訪問中所講，佢嘅目標係要「持續地成為世界最佳球員之一」(Consistently be one of the best players in the world)。睇嚟佢今季嘅表現，正正就係朝住呢個目標邁進。呢種 Carry 嘅表現，加上拜仁喺聯賽嘅統治力，睇怕真係可以幫佢趕走多年嘅「無冠心魔」。
對我哋車仔有咩啟示？
好喇，拜仁今季睇個勢就肯定捧硬德甲，咁係咪代表哈利簡尼個「無冠魔咒」就此破解，花生友以後冇嘢好講？嗯……技術上嚟講，冇錯嘅，佢個獎盃櫃終於唔係吉嘅，叫做有件實物擺下。
但係！作為一個睇慣大場面嘅車迷，贏個德甲冠軍，對拜仁嚟講其實係「最低消費」嚟咋…同PSG一樣，佢哋壟斷咗個聯賽咁多年 (雖然上季俾藥廠斷咗纜)，加盟拜仁就好似玩 Easy mode 咁，贏唔到先係新聞啦！
抽完簡尼水，同時都要反思下自己。簡尼單嘢對我哋車仔嚟講，其實都有啲啟示：
天價買球星嘅風險與回報： 拜仁用上億鎊買簡尼，雖然第一季冇即時回報（冇冠），但佢個人數據一直喺度，第二季就帶隊攞返聯賽。呢個係咪代表，有時真金白銀買個証明過自己嘅世界級球星，就算貴，都好過我哋成日去課金刮啲潛力幼幼返嚟抽獎？當然，我哋都有彭馬呢啲成功例子，但亦唔少得水貨……買人真係一門高深學問。
穩定射手嘅重要性： 睇住簡尼今季又入波又助攻，再望下我哋前線，積臣雖然有進步但把握力時好時壞，安宮古直頭唔知去咗邊…… 一個穩定、高效嘅射手，對一支想爭標嘅球隊嚟講真係太重要。奧斯文？施斯高？定係信積臣可以再進化？管理層真係要諗清楚。
冠軍嘅定義： 雖然我串緊簡尼個德甲冠軍含金量，但諗深一層，有盃捧點都好過冇，甚至含金量更勝過歐協聯。究竟係追求穩定嘅聯賽表現重要，定係間唔中爆發贏個大盃更實際？呢個可能就係唔同球會、唔同球迷之間嘅價值觀分野喇。
簡尼單嘢花生就食完，但背後引申出嚟嘅問題，無論係對手定係對我哋自己，都值得諗下嘅。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
請按此登錄後留言。未成為會員? 立即註冊