【賽後報告】韋斯咸對車路士　突然上身的積臣 精選

對般尼茅夫經歷左一場90分鐘苦戰之後，車路士係星期六作客韋斯咸。對面自從莫耶斯離隊之後，一直都未搵到狀態，今場更加見到韋斯咸的後防問題。如果話上場勝仗係唔值得拎的3分，呢一場比賽就贏得相對有說服力。積臣憑個人跑動梅開二度，再助攻一次俾彭馬，成功幫車路士以0:3贏波帶走3分。全場比賽車路士都控制住節奏，更加可以話如果後備的球員把握力再好d，再入多一兩球都唔意外。


戰術&數據：

1) 戰術上已經無咩可以講的野，今場唯一的意外係科芬拿兼職右閘。但科芬拿全場都無實際被考驗過。韋斯咸左路的Summerville 53分鐘內只係做出2次突破亦只得1次成功。係進攻的時候左閘的古古會收去中場幫手，中堅同右閘長期移位變成3後的結構，同時右翼的馬杜基都會回後，對於控制中場起到好大的幫助。前線進攻的組織雖然唔係完美無暇（特別係馬杜基半單刀果球），但係跑動同諗法已經比上年同期好左好多。

2) 先唔講有積臣參與進攻的部份，車路士的進攻組織唔同的情況下有唔同球員可以參與，可以話係呢一刻車路士的優勢。如果要破密集，係狹窄的地方控球傳送，車路士可以用辛祖。相反好似今場，對方防守空位較多，就可以靠尼圖的速度進行爆破。今場尼圖上場只有34分鐘，但係已經成功做出4次過人嘗試亦有3次成功，係有限的時間內前帶的距離亦係比例上最高果位。
2.5) 然而，係辛祖同尼圖各有優勢的情況下，梅迪歷就變成左今個夏窗的最大犠牲者。講速度佢同尼圖差唔多，但係第一腳的處理無尼圖咁好，明顯被比下去。最近幾場明明身體健康都無得到一分鐘上陣的時間，可能最後的結局會變成外借再賤賣都唔定。不過當然，如果佢係其他比賽獲得上陣時間又表現突出，可能可以同尼圖爭一日之長短都唔定。

3) 擺脫左季初的小低潮，加上拉維亞遇上傷患，車路士的第二名一億先生卡些度開始係比賽入面搵到自己的節奏。全場貢獻左8次攔截其中6次成功，2次的射門阻擋，3次Clearence，3次高空爭頂全勝，加上極大的覆蓋範圍，單睇防守的表現的確開始展現出佢的身價。卡些度配合切入中場的古古一齊作為中場的樞紐，破壞對手中場的組織，同時提供左由半場開始向前的傳送。呢種能攻善守的表現相信會令同位置的拉維亞擔心。

個別球員表現：

積臣：
雖然唔知大家點睇，不過係上一季積臣的入球量其實就已經唔差。唯一令人垢病的問題就係佢的把握力時好時壞。好的時候好似今場咁，兩次中龍就入兩球。壞的時候就下下都射正，一係就送俾看台的觀眾。但講到尾，積臣的問題都係集中於埋門一腳的處理。拉遠少少去睇，佢有方法可以浪費射門，代表佢本身去左一個正確的位置接應傳波或者作出一個正確的帶波跑動。有能力突破越位，有跑動觸覺可以擺脫對手中堅，呢d先係積臣的價值所在。然而更重要的係，車路士只係用左37m將佢由維拉利爾帶去倫敦。一季多少少的上陣已經入左20球，23歲的佢絕對有能力再進一步。

安素：
令人又愛又恨的安素費南迪斯，明明作為中場但係今場0起腳。你話佢無幫到球隊咩？偏偏佢又係全隊做得最多向前傳送的球員。中前場除左卡些度之外，觸球數最多的又係安素，佢的存在開始由一個進攻中場變成中場發電機，掌握全隊的節奏。不過呢種唔成熟，可能會變成車路士中場的一個隱憂，特別係佢係中場失去控球同自己控失兩個數字都仲係唔穩定，今場就各有2次成為全隊之冠。睇黎馬蛇要好好鍛鍊下佢的腳下功夫先得。


彭馬：
先唔講彭馬的絕妙射門，除左果一腳之外，彭馬係進攻線的表現其實有少少掙扎。彭馬今季的位置明顯比過去收得更深，今季除左係禁區邊緣之外，更常會見到佢係自己半場的中圈接應傳波。彭馬的特點在於佢的走動同傳送判斷，係禁區邊往往可以俾到神奇的決定帶領球隊贏波，但過長的距離反而削弱左彭馬係呢方面的巧思。呢個亦係暫時自己認為彭馬會踢得唔舒服的主因。睇返數據上，踢左63分鐘的彭馬只係成功傳到15次波，同上陣27分鐘的菲歷斯相約，射門創造或者係過人數據都係一樣。如果馬蛇唔諗下方法，到彭馬的靈氣被磨光先再檢討可能就會太遲架啦。

總結：
球隊已經久違地作客3連勝，因為贏波，反對馬蛇或者高層的聲音突然就消失左(係囉，幾神奇呀)。不過成季流流長，最重要的右閘問題始終要搵到解決方法。前線雖然睇落組織好左，不過更加重要的係保持穩定。下場對Barrow應該會見到一班後備球員上陣，姑且睇下馬蛇換晒人之後會唔會保持到應有水準。