【車迷觀點】各界瘋狂抽水　車路士總合約年期191年 精選

今日各大球迷茶餘飯後的話題又係車路士。乜又係你呀17弟？


今次事源網上瘋傳的一張圖，圖中乜都無，就廿隊英超球隊的合約總年期。當中排係合約排行榜首位的，就係總共191年的車路士。比第二位熱刺(97年)加白禮頓(96年)相加都仲要高。

嘩，咁爆的資料當然要睇返原文報導啦係咪！

Chelsea currently have 191 years worth of contracted players on their books

睇返Skysport個報導，的確呢張圖出現左係片段入面，無錯又的確係191年，Skysport用車路士呢一刻的人數計算，41個球員相加的總年期係191年，除開，一個球員大約係4.65年。
Skysport的原意係指，車路士近兩年全面改革，打算用低薪長合約去減輕財務壓力同保持短期財務的健康。

英超平均的球員週薪大約為72,000英鎊，而車路士的新簽球員平均週薪僅為60,000至70,000英鎊，明顯睇得出車路士係薪酬架構上有落過功夫。

片段的內容亦指出，車路士的長約可以用黎通過FFP，令車路士可以參加包括歐協聯在內的歐戰，因為轉會費同人工成本會攤分至未來幾年，包括俾Agent的費用。

同時，車路士由基斯甸臣同魯迪加的免費離隊事件中汲取左教訓，想盡量避免球員完約自由身離隊，所以長期的低薪合約提供左時間同空間俾球會去做買賣的談判，低人工亦唔會成為潛在買家的負擔，其中最好的例子就係太高人工而無人問津的Kepa。
相反，就算個球員表現唔好，因為人工唔高都唔會對球會造成過大的損失，甚至可以通過外借去其他球會或者姐妹球會提升狀態。如果球員有表現，就相應地用延長合約加薪的方式獎勵，同時合約內都包括左奪冠獎金，今年彭馬同黎緊積臣的續約都係類似的例子。確保球員唔會因為長約就失去信心。

報導都有提及，車路士呢種做法的確地同傳統球隊背道而馳。係油王時代培育出黎的球員亦有可能因為過於高薪而慘遭放售，例如加拉加曼治等。球迷最擔心的，莫過於車路士會逐漸失去屬於自己的icon球員。


亦唔難解釋，點解車路士會考慮放售包括史達寧同捷維爾呢類高薪球員，又左諗右諗始終都唔敢落bid買拿玻里的奧士文，就係想全力維持住薪酬架構。

不過可惜的係，大家見到張圖就瘋狂抽水，無乜人理會個內容到底講咩…算吧啦六師弟你。