【轉會分析】即將上車的奧莫洛迪安真係啱用？ 精選

早在轉會窗開之前就已經有傳聞話車路士對奧莫洛迪安(Samu Omorodion)有興趣。所以由果時開始就有搵過關於呢位二十歲前鋒的資料。

奧莫洛迪安出生於西班牙，父母係尼日利亞人，最早出道於格蘭納達的B隊。2023年8月第一次為西甲格蘭納達上陣，隨即射入佢第一個頂級聯賽的入球。其後，馬德里體育會居然毫不猶豫咁就觸發左佢的買斷條款，然後外借到同屬西甲的阿拉維斯。

上季總算係阿拉維斯踢足左一季。亦為我地提供左大量的數據分析佢係一個點的球員。

奧莫洛迪安身高194cm，強大的身體質素為佢提供左空中爭頂的優勢，呢個係佢的第一個優點。睇返數據，佢場均的空中爭頂次數係6.98次，數字上已經表明佢非常積極地參與空中爭頂。而因為多參與，所以贏的數字都相對地多，達到場均2.75次。不過效率就唔太好，勝率只有39.4%，所以可以話，佢有身高同空中爭頂的潛力，但係就需要更多的技術訓練去彌補不足的地方。
第二個優點，係佢的走位同射門觸覺。作為前鋒，奧莫洛迪安唔係積極回防的類型。所以觸球數據都顯示佢係禁區以外的觸球數字唔突出。無論係帶波距離，帶波次數都係一樣咁低。


不過當佢入到禁區，表現就判若兩人。佢的射門位置有80%都係對手禁區內，而當中40%的射門都命中目標。入球轉化率雖然唔好，但係無論係判斷定係身體質素都係頂級的。以下的三步曲就係佢的武器：
1) 短距離加速進入禁區(場均1.08次, 世界平均0.83次)
2) 物理對抗壓贏對手(0.99次/場, 平均係0.89次)
3) 起腳(npxG/Shot: 0.52, 平均0.40)

所以無論係西甲的球會定係英超球會，都認為佢有潛力唔係無原因ge。相對於優點，缺點就明顯得多。


第一個缺點係經驗。討論一個年輕球員，第一件事我會睇佢控失次數。一如所料佢的控失次數幾乎冠絕全球，達場均4.10次(最高4.75, 平均2.63)。佢場均接收傳球係20.32次，換句話說有1/5的傳波佢係接唔實自己甩左。

第二個缺點係，佢真係得射門掣。傳球數據同防守數據都滿堂紅。傳波次數少(15.18)，成功率都低(71.8%)，個波落得佢腳就得兩個結果：自己射或者控失。

想像下，場均隊友傳20次俾佢，加埋佢自己搶波有22次控球機會，佢有15次會傳出去俾隊友，當中只有10次傳到俾隊友，有5次會傳失。有3球會自己帶入禁區射左佢，仲有4次係佢自己控甩俾左個波對手。實際上有貢獻的，就只有13次，差唔多一半的波都會浪費左，真係諗下都覺得頭痛。

當然，我唔會期待一個二十歲球員會係即食戰力。而且有D野係與生俱來，後天無辦法補到幾多
第一樣係身高同彈跳力，老豆老母俾幾多就幾多。
第二樣係物理抗性，又大隻又快的結構多數天生，例如夏蘭特杜奧巴果種。
第三樣係走位同射門觸覺, 例如彭馬/夏薩特果d靈光一閃的走位真係阿媽遺傳。無得練。而呢幾樣野奧莫洛迪安都齊晒，而佢欠缺的，只係訓練同經驗。我相信車路士願意投資35M係佢身上，多少都係睇中佢呢D特點。
至於車路士會點用佢，暫時我就睇唔到一隊有正選空間俾佢。同積臣相比亦有一段極大的距離。所以難怪車路士會話買左佢都唔影響追逐奧士文的決定。