【車迷觀點】講下姐妹球會，史特拉斯堡又關你車路士事？

可能好多英超球迷都唔識呢隊波，不過作為車路士的姐妹球會，睇下史特拉斯堡的新聞分分鐘可以見到未來的車路士球員。而史堡近來最大的新聞，一定係佢地炒左主教練韋拉。

睇返數據，上年韋拉仲係用緊硬橋硬馬真功夫去教史堡，全季韋拉都係唔同的陣式之間掙扎
由季初的352，到季中的4123的攻擊型，後面又換成343
但戰績就反映出全季韋拉根本就無做到d咩大的改善，9月尾開始就一直無贏過波，連續8場的失利之後，最終係12月先贏返
人腳的問題一定係其中一個原因，係車路士借返黎的兩個球員，安祖山度士同安祖路兩個又未成熟，本身球員的實力又未係頂級，憑鬥志可以做的野始終有限


攻擊面上，明明係主打攻擊型的踢法，但npxG只錄得唔上唔落的1.14
射門次數係法甲排17，平均一場得10.7次

計埋把握力的話，同入球的差距(G-xG)直頭係-0.17，同把握力差的車路士簡直係難兄難弟。

唔止射門毫無亮眼之處，係甚至係最基本的射門機會創造力一樣係排緊法甲第17位
平均每場只有18.8次，同前線的球隊2字頭有天與地的分別

靠生波去做的入球直頭係全法甲最低，每場連1都唔夠的0.88次，倒不如話，咁都唔降班先係奇蹟
咁點解韋拉仲可以保得住唔降咁勁? 可能係因為韋拉都知自己攻唔掂，所以不如集中精神去防守，今季史堡以每場28.4次Tackle+Intercept排係法甲第4
勉強保住法甲的席位，可惜遠遠唔符合牙Todd的足球王國理念。當然，你都可以話韋拉拎住咁的手牌已經打盡左，不過風格上的差異亦係今次韋拉會俾人炒魷的原因。

而家傳聞話史堡已經傾好想請羅西尼亞教，佢以Positional Play作為教波的重心。上季韋拉帶的史堡，平均觸球次數只有552.9次，排係法甲16位，傳波次數都只有353.6次排15。

而羅西尼亞之前都有帶領半衰落候城保住唔降班的經驗，同車路士新教頭馬蛇配合的話，又的確可能會帶到d新花式出黎都唔定。

當然，史堡的球迷的諗法都唔係唔明ge，好地地球會運作緊，突然就變成人地球迷的衛星會，仲塞一堆自己用唔著的球員要幫人養仔，一定係唔高興。以集團式經營的球會，唔止紅牛，城市，英力士系列，黎緊車路士同史堡都肯定會繼續過從甚密，互相交換球員使用，但會唔會異軍突起，就睇下羅西尼亞有無本事用類似的風格教好車路士班借將。