【轉會分析】相中黃潛門將約根臣 車路士的真命天子? 精選

果頭寫完文話車路士要換門將，果頭就收到風車路士已經落左bid準備要買約根臣(Filip Jørgensen)

今年先22歲的約根臣係丹麥出身，作為1.9米高的門將，佢係2022年先第一次為黃潛上陣。其後係23/24年度出任正選門將踢足左全季。

不過上季佢的黃潛之路就唔係一帆風順。踢37場俾人射足左207次，失左足足64球。

雖然係咁，但係約根臣出色的撲救能力都吸引左好多大球會的注目。
上季無乜留意維拉利爾，不過我地仍然可以透過數據去理解約根臣係個咩球員同點解咁多球會想要佢。


1) 基本撲救能力：睇返數據，約根臣係上季為維拉利爾出戰左37場，每場平均面對5.69次射正，場均失球1.75次，而佢亦透過72.2%的撲救率證明佢真係識得守龍而唔係擺設黎。

睇埋PSxG的數據，射門後的xG達到驚人的59.8，幾乎係山齊士加柏祖域的總和，而佢面對咁高的PSxG，實際上的失球差距只有-2.2，數據上證明左已經唔止係不過不失，而係盡左佢的飲奶力去救球隊。

單睇佢守門的能力的話，佢的確係好有潛力的門將無錯。甚至可以話，如果上季黃潛唔係用佢而係換山齊士落去，分分鐘今季已經係乙組踢波。


2) 掃蕩傳控/高波：
光頭馬蛇的門將要求有一定程度的腳下功夫，能傳擅掃，最好可以帶住個波自己一個殺埋入禁區。

排除約根臣的撲救數據，其他的表現又如何呢?

同柏祖域相近的禁區外防守次數，甚至連距離都好接近。約根臣係場均1次，柏祖域就場均0.9次。掃蕩距離大家都係約13碼。

睇傳球數據無論係生波定係成功率亦係同柏祖域好似親生兄弟咁，約根臣場均29.2次，柏祖域場均28.7次。

觸球數據都係倒模一樣咁，一樣場均38.8次，柏祖域場均38.7次。

兩者之間的第一個分別就係約根臣會帶波，帶波次數同前進距離都比柏祖域高。
而第二個分別，係約根臣對於高空波的處理比較好，約根臣以平均0.31次的高空爭奪壓贏左車路士的兩個門將。

可惜有長就有短，約根臣係控球時的表現就有少少表現出佢的年紀，場均0.11次自己控失外加0.03次失去控球。


以下俾TLDR的朋友睇的總結：

約根臣作為一個傳統門將佢的能力絕對係頂級的，高飛低撲的能力都完全無問題，作為門將的反應，高波應對能力，帶波能力等等都唔錯。但如果你要求佢殺出禁區防守，又或者要求佢大腳傳上去可以俾到隊友攻門，咁暫時佢的表現同柏祖域係無分別，直頭係孖生兄弟一樣。

而呢部份的潛力，就應該係各大球會甚至係而家車路士高層睇中又想賭一賭的地方。當然，而家傳聞話球員同車路士之間已經達成個人條款的談判，仲未過到球會同球會果關，一日未轉會一日仲有變數，不妨睇下跟住又會點發展。