「Raheem Sterling has today departed Chelsea Football Club...」
當見到官網彈出呢個 Club Statement，相信好多車迷嘅心情都係相當複雜。有一部份嘅車迷係覺得「終於甩難」，畢竟佢份人工實在太和味；但或者都會有部份人，例如我，會有一絲絲嘅感慨，話晒佢都曾經係我哋寄予厚望嘅球星。
回帶去 2022 年夏天，史達寧係車仔新老闆時代嘅 「第一簽」。 當時佢帶住 4 屆英超冠軍嘅光環空降史丹福橋，我哋以為佢會係夏薩特之後，果隻可以抱下嘅佛腳，又以為佢會帶住班新人重建王朝。點知 3 年半過去，大家對佢嘅印象，似乎只剩低快樂足球、恐龍手扭屎忽花嘅跑姿，同埋無數次殺入人堆之後失球權嘅畫面。
雖然大家平時笑佢笑得好開心，鬧亦鬧得好甘，但平心而論，喺車路士最混亂、最黑暗嘅嗰段日子，史達寧其實係少數交得出功課嘅人。
既然快樂分手，不如喺佢正式除低藍色戰袍嘅呢一刻，我哋暫時放低偏見，用數據同事實做一個好頭好尾嘅回顧：到底史達寧係一個失敗嘅收購，定係一個喺錯的時間、遇上錯的人嘅悲劇主角？
光輝一面：混亂世代嘅遮醜布
雖然大家成日笑佢係快樂足球嘅代言人，又話佢帶波帶出界，但平心而論，喺彭馬未變身做球王拯救世界之前，其實係史達寧頂住車仔隊波嘅進攻下限。
喺23/24 賽季，即使車路士排第 10，場面亂過亂葬崗，史達寧依然交出咗 8 個入波同 4 次助攻。
你可能會話：「挑！8 球好多咩？」睇深一層。npxG+xAG（非十二碼預期入球+助攻），簡單講就係衡量一個球員製造威脅嘅效率。 史達寧嘅數據係 0.55。 果時車迷們充滿幻想嘅新任「烏克蘭核彈」梅迪歷係幾多？係 0.45。
係果季單講進攻效率，史達寧已經係全隊第三高，僅次於作為中鋒嘅積臣同埋開咗外掛嘅彭馬。喺果個每場波都唔知踢緊乜Q嘅時期，史達寧係少數能夠提供相對穩定產出嘅遮醜布。如果無佢喺前面死磨爛磨磨幾球返嚟，車路士個排名隨時再低幾級。
教科書級嘅蝦小朋友與復仇
除咗做遮醜布，史達寧亦都真係試過展現出大家期待已久，係曼城果時嘅統治力，只可惜係曇花一現。
最經典一定係 2023 年對盧頓嗰場，佢用非英超級數嘅對手示範咗咩叫單點爆破。全場 2 入球 1 助攻，直接包辦全隊所有入波。最癲嘅係佢嗰場有 13 次禁區內觸球。 呢個正正係我哋當年肯畀 4750 萬鎊買佢返嚟嘅原因：我哋要嘅就係呢個識得無球走位、喺小禁區出現嘅殺手，而唔係一個喺中圈拎波死衝爛衝嘅翼鋒。
仲有嗰場經典嘅 4-4 打和曼城。 面對舊主，面對世界上最強嘅防線，史達寧展現咗罕見嘅鬥心，入波之餘仲不斷回防。嗰一刻嘅佢，真係令車迷覺得：「咦？原來佢真係有心做大佬喎。」
只可惜，呢種光芒喺車路士混亂嘅體系入面，就好似煙花咁，閃一兩下就無咗。隨之而來嘅，係更多嘅無奈同嘆息。
致命傷：快樂足球嘅副作用
既然叫做數據唔差，又有過高光時刻，點解車迷始終愛唔落？ 因為對於球迷嚟講，觀感同事實有時會有好大落差。
史達寧最大嘅問題，係佢嘅踢法經常令人睇到爆血管。 大家個腦海入面，肯定有好多咁嘅畫面：史達寧帶波殺入人堆，然後猶豫、停頓、再猶豫，最後一係被對方封阻，一係就傳失，總之就係會失去球權。
最令人氣餒嘅係 23/24 足總盃對李斯特城嗰場，佢搶射十二碼唔入，之後再搶射罰球離晒譜咁射咗上看台。嗰一刻，佢展現出嚟嘅唔係領袖氣質，而係一種令隊友同球迷都灰嘅獨食同焦慮。
歲月不饒人，史達寧已經唔再係當年嗰個可以由半場開始爆破嘅利物浦小子。過人成功率同爆發力隨住年紀大咗明顯下跌。以前喺曼城，佢係最後 30 碼接應 KDB 傳波做最後一擊；喺車路士，因為中場無人派牌，佢被迫要回撤到中場攞波自己衝。 要一個 30 歲嘅翼鋒做 20 歲都未做到嘅嘢，結果就係大家見到嘅：心有餘而力不足，衝兩衝就無氣，回防又慢半拍。
結構性錯配：錯的時間，錯的人
但講到尾，史達寧最大嘅悲劇，未必係佢變廢咗，而係佢遇上咗一個完全排斥佢嘅新體系。
當馬蛇上任之後，史達寧係車仔嘅時光其實已經完咗。 馬蛇要嘅翼鋒係咩人？係要好似馬杜基或者尼圖咁，乖乖地留守係邊路，拉開球場闊度，然後接到波就做邊路突破，或者等後上嘅閘位疊瓦做One Two。
但史達寧係咩風格？佢係遊俠。 佢習慣自己內切、習慣周圍走位搵空位、習慣動態跑動。要佢企喺邊線等波到，等於廢咗佢一半武功。
再睇數據，馬杜基每 43 分鐘就可以製造一次威脅持球，史達寧要成 56 分鐘。喺講求效率同戰術紀律嘅新體系入面，史達寧呢種需要特權、需要自由度嘅老將，注定係同馬蛇八字不合。
再加上，外借時表現遠不如預期…連埋佢嗰份全隊最高嘅 32 萬鎊週薪，喺管理層眼中，佢就直接由資產變成咗必須要清理、每年都蝕緊錢嘅負資產。講到呢度，我覺得已經無咩可以講落去。
總結：多謝你做過消防員
雖然結局係被外借、被雪藏、甚至最後半年無波踢，但史達寧嘅車路士生涯，我覺得唔可以用失敗兩個字概括晒。
佢係一個喺錯誤嘅時間，加入咗錯誤嘅球隊嘅頂級球員。佢黎嗰陣，我相信佢係真心以為上車做爭冠拼圖；點知最後變成咗重建期嘅褓姆，要帶著一班細路喺風雨中捱。
史達寧未必會係史丹福橋嘅傳奇，甚至過多幾年大家未必會記得佢著過藍色衫。但喺車路士最迷失、最混亂嘅果幾年，係佢用僅餘嘅高峰期，為球隊守住咗最後一點進攻嘅火種。
史達寧，雖然你成日令我哋激氣，但都要講聲：多謝，祝你下一站搵返你嘅快樂足球。
========================================Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
鍾意我嘅文章，又有餘力支持我嘅話，記得去我Substack訂閱：
https://hkgchedog.substack.com/
當見到官網彈出呢個 Club Statement，相信好多車迷嘅心情都係相當複雜。有一部份嘅車迷係覺得「終於甩難」，畢竟佢份人工實在太和味；但或者都會有部份人，例如我，會有一絲絲嘅感慨，話晒佢都曾經係我哋寄予厚望嘅球星。
回帶去 2022 年夏天，史達寧係車仔新老闆時代嘅 「第一簽」。 當時佢帶住 4 屆英超冠軍嘅光環空降史丹福橋，我哋以為佢會係夏薩特之後，果隻可以抱下嘅佛腳，又以為佢會帶住班新人重建王朝。點知 3 年半過去，大家對佢嘅印象，似乎只剩低快樂足球、恐龍手扭屎忽花嘅跑姿，同埋無數次殺入人堆之後失球權嘅畫面。
雖然大家平時笑佢笑得好開心，鬧亦鬧得好甘，但平心而論，喺車路士最混亂、最黑暗嘅嗰段日子，史達寧其實係少數交得出功課嘅人。
既然快樂分手，不如喺佢正式除低藍色戰袍嘅呢一刻，我哋暫時放低偏見，用數據同事實做一個好頭好尾嘅回顧：到底史達寧係一個失敗嘅收購，定係一個喺錯的時間、遇上錯的人嘅悲劇主角？
光輝一面：混亂世代嘅遮醜布
雖然大家成日笑佢係快樂足球嘅代言人，又話佢帶波帶出界，但平心而論，喺彭馬未變身做球王拯救世界之前，其實係史達寧頂住車仔隊波嘅進攻下限。
喺23/24 賽季，即使車路士排第 10，場面亂過亂葬崗，史達寧依然交出咗 8 個入波同 4 次助攻。
你可能會話：「挑！8 球好多咩？」睇深一層。npxG+xAG（非十二碼預期入球+助攻），簡單講就係衡量一個球員製造威脅嘅效率。 史達寧嘅數據係 0.55。 果時車迷們充滿幻想嘅新任「烏克蘭核彈」梅迪歷係幾多？係 0.45。
係果季單講進攻效率，史達寧已經係全隊第三高，僅次於作為中鋒嘅積臣同埋開咗外掛嘅彭馬。喺果個每場波都唔知踢緊乜Q嘅時期，史達寧係少數能夠提供相對穩定產出嘅遮醜布。如果無佢喺前面死磨爛磨磨幾球返嚟，車路士個排名隨時再低幾級。
教科書級嘅蝦小朋友與復仇
除咗做遮醜布，史達寧亦都真係試過展現出大家期待已久，係曼城果時嘅統治力，只可惜係曇花一現。
最經典一定係 2023 年對盧頓嗰場，佢用非英超級數嘅對手示範咗咩叫單點爆破。全場 2 入球 1 助攻，直接包辦全隊所有入波。最癲嘅係佢嗰場有 13 次禁區內觸球。 呢個正正係我哋當年肯畀 4750 萬鎊買佢返嚟嘅原因：我哋要嘅就係呢個識得無球走位、喺小禁區出現嘅殺手，而唔係一個喺中圈拎波死衝爛衝嘅翼鋒。
仲有嗰場經典嘅 4-4 打和曼城。 面對舊主，面對世界上最強嘅防線，史達寧展現咗罕見嘅鬥心，入波之餘仲不斷回防。嗰一刻嘅佢，真係令車迷覺得：「咦？原來佢真係有心做大佬喎。」
只可惜，呢種光芒喺車路士混亂嘅體系入面，就好似煙花咁，閃一兩下就無咗。隨之而來嘅，係更多嘅無奈同嘆息。
致命傷：快樂足球嘅副作用
既然叫做數據唔差，又有過高光時刻，點解車迷始終愛唔落？ 因為對於球迷嚟講，觀感同事實有時會有好大落差。
史達寧最大嘅問題，係佢嘅踢法經常令人睇到爆血管。 大家個腦海入面，肯定有好多咁嘅畫面：史達寧帶波殺入人堆，然後猶豫、停頓、再猶豫，最後一係被對方封阻，一係就傳失，總之就係會失去球權。
最令人氣餒嘅係 23/24 足總盃對李斯特城嗰場，佢搶射十二碼唔入，之後再搶射罰球離晒譜咁射咗上看台。嗰一刻，佢展現出嚟嘅唔係領袖氣質，而係一種令隊友同球迷都灰嘅獨食同焦慮。
歲月不饒人，史達寧已經唔再係當年嗰個可以由半場開始爆破嘅利物浦小子。過人成功率同爆發力隨住年紀大咗明顯下跌。以前喺曼城，佢係最後 30 碼接應 KDB 傳波做最後一擊；喺車路士，因為中場無人派牌，佢被迫要回撤到中場攞波自己衝。 要一個 30 歲嘅翼鋒做 20 歲都未做到嘅嘢，結果就係大家見到嘅：心有餘而力不足，衝兩衝就無氣，回防又慢半拍。
結構性錯配：錯的時間，錯的人
但講到尾，史達寧最大嘅悲劇，未必係佢變廢咗，而係佢遇上咗一個完全排斥佢嘅新體系。
當馬蛇上任之後，史達寧係車仔嘅時光其實已經完咗。 馬蛇要嘅翼鋒係咩人？係要好似馬杜基或者尼圖咁，乖乖地留守係邊路，拉開球場闊度，然後接到波就做邊路突破，或者等後上嘅閘位疊瓦做One Two。
但史達寧係咩風格？佢係遊俠。 佢習慣自己內切、習慣周圍走位搵空位、習慣動態跑動。要佢企喺邊線等波到，等於廢咗佢一半武功。
再睇數據，馬杜基每 43 分鐘就可以製造一次威脅持球，史達寧要成 56 分鐘。喺講求效率同戰術紀律嘅新體系入面，史達寧呢種需要特權、需要自由度嘅老將，注定係同馬蛇八字不合。
再加上，外借時表現遠不如預期…連埋佢嗰份全隊最高嘅 32 萬鎊週薪，喺管理層眼中，佢就直接由資產變成咗必須要清理、每年都蝕緊錢嘅負資產。講到呢度，我覺得已經無咩可以講落去。
總結：多謝你做過消防員
雖然結局係被外借、被雪藏、甚至最後半年無波踢，但史達寧嘅車路士生涯，我覺得唔可以用失敗兩個字概括晒。
佢係一個喺錯誤嘅時間，加入咗錯誤嘅球隊嘅頂級球員。佢黎嗰陣，我相信佢係真心以為上車做爭冠拼圖；點知最後變成咗重建期嘅褓姆，要帶著一班細路喺風雨中捱。
史達寧未必會係史丹福橋嘅傳奇，甚至過多幾年大家未必會記得佢著過藍色衫。但喺車路士最迷失、最混亂嘅果幾年，係佢用僅餘嘅高峰期，為球隊守住咗最後一點進攻嘅火種。
史達寧，雖然你成日令我哋激氣，但都要講聲：多謝，祝你下一站搵返你嘅快樂足球。
========================================Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
鍾意我嘅文章，又有餘力支持我嘅話，記得去我Substack訂閱：
https://hkgchedog.substack.com/
請按此登錄後留言。未成為會員? 立即註冊