(呢個系列俾我遺忘咗太耐………Sorly)
唔知大家有無留意一單新聞，前車球員奧斯卡傳出心臟有問題，隨時要提早掛靴。我諗係 2012 歐聯之後上車嘅車迷，都唔會對奧斯卡呢個名感到陌生。當年佢頂住「新卡卡」個朵嚟到，對祖雲達斯嗰球轉身世界波，到而家都仲係經典。
不過，今日嘅【賣仔覆盤】，我哋講硬繃繃嘅數據戰術之餘，同時想講下人生選擇。
回望 2017 年嗰個冬天，佢喺當打之年選擇去中超搵真銀，車仔將奧斯卡賣走，可能係一個無可厚非、無可挽回，但對雙方嚟講都係求仁得仁嘅結局都唔定……
曾經J死人嘅「Ma-Zar-Ca」
講起奧斯卡，一部份車迷腦海第一時間浮現嘅，肯定係嗰個短暫但極度美好嘅「Ma-Zar-Ca」時代。
當時嘅畫面真係好靚：中間放個好有靈氣、隨時識後上入波嘅奧斯卡；左邊係扭死人、個大屎忽頂住波又痴腳嘅夏薩特；右邊係出波射波好似裝咗自動導航咁款嘅馬達。三個人一齊上果時，走位換位換到對手頭都暈埋，嗰種流動性同觀賞性，當年真係J死唔少人，亦令我哋一度以為，車仔終於要擺脫大巴，踢華麗足球啦。
喺嗰個體系入面，奧斯卡可以話係完美嘅連接器。佢無馬達咁好嘅大局觀，亦無夏薩特咁屈機嘅盤扭，但佢勝在夠靈活，能夠喺兩人之間穿針引線。嗰陣時嘅奧斯卡，係個藝術家，係個天之驕子。
可惜，呢個組合靚就靚，但有一個致命傷：太軟。一遇到硬淨嘅對手，或者逆境波，呢種華麗就好易變成有姿勢無實際。而呢個缺點，喺摩連奴回歸之後，注定要被清算。
摩佬嘅改造：殺死畫家，扶植工兵
摩連奴二期嘅降臨，直接宣判咗「Ma-Zar-Ca」嘅死刑，亦徹底改變咗奧斯卡嘅命運。當時摩佬做咗一個令無數馬達Fans心碎、甚至反枱嘅決定：棄用連續兩年拿年度最佳嘅馬達，強行扶正奧斯卡做必然正選10號。
點解？好簡單，摩佬要嘅唔係畫家，係戰士。
「防守型10號」的誕生
當年奧斯卡可以留低，靠嘅唔係創造力（講Passing同Vision，馬達贏幾條街），而係佢肯跑、肯搶、肯做污糟嘢。
數據唔會講大話。喺 2013/14 球季，奧斯卡展現出一種變態嘅特質：「防守型攻中」。如果你仲記得，佢當年前場迫搶兇狠到癲，場均鏟球次數甚至多過好多防守中場。佢係球隊防守嘅第一道閘，專門負責搞亂對手嘅節奏（老車迷一定記得佢全場凍結派路嗰場代表作）。而摩佬睇中嘅，就係佢呢種執行力。
「半季球王」的魔咒
不過，這種高強度嘅踢法亦帶嚟副作用。奧斯卡有一個令車迷好頭痛嘅屬性，就係「半季球王」。
佢往往喺開季頭幾個月好似球王上身，入波助攻樣樣有。但一過咗聖誕快車，踏入下半季，佢嘅體能同狀態就會插水式下跌，經常喺場上變成隱形戰機。呢種極度不穩定嘅特質，雖然幫車仔拎咗個英超冠軍，但都令到佢始終無法真正接過林伯特嘅衣砵，成為史丹福橋真正嘅新王。
到干地接手，見到一個下半季例牌失蹤、戰術地位開始變得尷尬嘅奧斯卡，再加上一張來自某強國嘅天價支票，分手嘅伏線其實早已埋下。
£60M嘅分手費：一場無法拒絕的交易
貧窮留下的烙印
當時25歲、正值黃金之齡嘅奧斯卡選擇去中超，外界一片罵聲，話佢「無大志」、「貪錢」。但多年後，當我哋睇返佢嘅童年，或者會多一份理解。3歲喪父、由母親獨力撫養三個仔女、喺極度赤貧中長大，呢種童年陰影令佢對金錢有一種極致嘅理性。佢曾經講過一句好坦白、好震撼嘅說話：
「我唔想當我老咗之後變得貧窮，只能靠著『我曾經踢過世界盃』嘅回憶過活。」
佢唔係唔想追夢，而係喺佢嘅價值觀入面，令家族脫貧、讓後代無憂，係比拎住個睇得唔食得嘅世盃更重要嘅「人生世界盃」。
車路士的財務勝利
對車路士嚟講，呢單更加係神級操作。用 £60M 賣走一個下半季會隱形、戰術地位開始邊緣化嘅球員，呢筆錢基本上Cover晒後來買莫拉達 (Morata)、巴卡約高 (Bakayoko) 同魯迪加 (Rüdiger) 嘅開支（雖然嗰堆人後來大部份都水水地，但當時係必需嘅）。
喺財務角度，呢係教科書式嘅高位套現。Marina 嗰陣嘅談判手腕，確係不得不服。
消失的八年？未必，係海港皇帝
好多人以為奧斯卡去中超係UN UN腳賺錢（好似泰維斯咁），但事實上，佢係中超金元時代最盡責嘅外援。
佢喺中超8年，交出咗 77個入球 同驚人嘅 142次 (?) 助攻。佢唔單止係養老，佢係統治咗個聯賽，幫球隊拎咗3次中超冠軍。
當然，佢亦有過爭議。2017年對廣州富力，佢發脾氣連續兩次大力將波踢向對手，引發兩隊50人大亂鬥，佢就被罰停賽8場。呢件事亦反映出佢斯文外表下，其實有果種類似哥斯達Feel、南美球員特有嘅陰濕同躁底，並唔係大家想像中咁乖仔。
但無可否認，當其他大牌球員因為限薪令紛紛跳船嗰陣，佢選擇履行完每一日合約，直到2024年先含淚告別。佢用行動證明，佢係一個攞錢做嘢、極具職業素養嘅頂級僱傭兵。
總結：求仁得仁的無悔結局
返到最初嘅新聞，如果奧斯卡真係因為心臟問題而掛靴，作為車迷，我哋應該點樣評價佢？
佢無兌現全部天賦，無成為下一個卡卡，甚至親手切斷咗自己喺歐洲豪門嘅傳奇之路。喺足球歷史嘅維度，佢可能係一個失敗者。
但喺佢自己嘅人生維度，甚至係我用打工仔嘅角度睇，佢係一個絕對嘅勝利者。佢用8年青春，換取咗家族幾代人嘅財富自由，完美兌現咗「不想變窮」嘅諾言。
車路士得到咗冠軍同轉會費，奧斯卡得到咗財富同家庭保障。呢場分手，雖然充滿銅臭味，少咗啲浪漫，但卻係最誠實、最無可厚非嘅雙贏。
祝早日康復，奧斯卡。你嘅選擇，我哋理解。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
鍾意我嘅文章，又有餘力支持我嘅話，記得去我Substack訂閱：
https://hkgchedog.substack.com/
唔知大家有無留意一單新聞，前車球員奧斯卡傳出心臟有問題，隨時要提早掛靴。我諗係 2012 歐聯之後上車嘅車迷，都唔會對奧斯卡呢個名感到陌生。當年佢頂住「新卡卡」個朵嚟到，對祖雲達斯嗰球轉身世界波，到而家都仲係經典。
不過，今日嘅【賣仔覆盤】，我哋講硬繃繃嘅數據戰術之餘，同時想講下人生選擇。
回望 2017 年嗰個冬天，佢喺當打之年選擇去中超搵真銀，車仔將奧斯卡賣走，可能係一個無可厚非、無可挽回，但對雙方嚟講都係求仁得仁嘅結局都唔定……
曾經J死人嘅「Ma-Zar-Ca」
講起奧斯卡，一部份車迷腦海第一時間浮現嘅，肯定係嗰個短暫但極度美好嘅「Ma-Zar-Ca」時代。
當時嘅畫面真係好靚：中間放個好有靈氣、隨時識後上入波嘅奧斯卡；左邊係扭死人、個大屎忽頂住波又痴腳嘅夏薩特；右邊係出波射波好似裝咗自動導航咁款嘅馬達。三個人一齊上果時，走位換位換到對手頭都暈埋，嗰種流動性同觀賞性，當年真係J死唔少人，亦令我哋一度以為，車仔終於要擺脫大巴，踢華麗足球啦。
喺嗰個體系入面，奧斯卡可以話係完美嘅連接器。佢無馬達咁好嘅大局觀，亦無夏薩特咁屈機嘅盤扭，但佢勝在夠靈活，能夠喺兩人之間穿針引線。嗰陣時嘅奧斯卡，係個藝術家，係個天之驕子。
可惜，呢個組合靚就靚，但有一個致命傷：太軟。一遇到硬淨嘅對手，或者逆境波，呢種華麗就好易變成有姿勢無實際。而呢個缺點，喺摩連奴回歸之後，注定要被清算。
摩佬嘅改造：殺死畫家，扶植工兵
摩連奴二期嘅降臨，直接宣判咗「Ma-Zar-Ca」嘅死刑，亦徹底改變咗奧斯卡嘅命運。當時摩佬做咗一個令無數馬達Fans心碎、甚至反枱嘅決定：棄用連續兩年拿年度最佳嘅馬達，強行扶正奧斯卡做必然正選10號。
點解？好簡單，摩佬要嘅唔係畫家，係戰士。
「防守型10號」的誕生
當年奧斯卡可以留低，靠嘅唔係創造力（講Passing同Vision，馬達贏幾條街），而係佢肯跑、肯搶、肯做污糟嘢。
數據唔會講大話。喺 2013/14 球季，奧斯卡展現出一種變態嘅特質：「防守型攻中」。如果你仲記得，佢當年前場迫搶兇狠到癲，場均鏟球次數甚至多過好多防守中場。佢係球隊防守嘅第一道閘，專門負責搞亂對手嘅節奏（老車迷一定記得佢全場凍結派路嗰場代表作）。而摩佬睇中嘅，就係佢呢種執行力。
「半季球王」的魔咒
不過，這種高強度嘅踢法亦帶嚟副作用。奧斯卡有一個令車迷好頭痛嘅屬性，就係「半季球王」。
佢往往喺開季頭幾個月好似球王上身，入波助攻樣樣有。但一過咗聖誕快車，踏入下半季，佢嘅體能同狀態就會插水式下跌，經常喺場上變成隱形戰機。呢種極度不穩定嘅特質，雖然幫車仔拎咗個英超冠軍，但都令到佢始終無法真正接過林伯特嘅衣砵，成為史丹福橋真正嘅新王。
到干地接手，見到一個下半季例牌失蹤、戰術地位開始變得尷尬嘅奧斯卡，再加上一張來自某強國嘅天價支票，分手嘅伏線其實早已埋下。
£60M嘅分手費：一場無法拒絕的交易
貧窮留下的烙印
當時25歲、正值黃金之齡嘅奧斯卡選擇去中超，外界一片罵聲，話佢「無大志」、「貪錢」。但多年後，當我哋睇返佢嘅童年，或者會多一份理解。3歲喪父、由母親獨力撫養三個仔女、喺極度赤貧中長大，呢種童年陰影令佢對金錢有一種極致嘅理性。佢曾經講過一句好坦白、好震撼嘅說話：
「我唔想當我老咗之後變得貧窮，只能靠著『我曾經踢過世界盃』嘅回憶過活。」
佢唔係唔想追夢，而係喺佢嘅價值觀入面，令家族脫貧、讓後代無憂，係比拎住個睇得唔食得嘅世盃更重要嘅「人生世界盃」。
車路士的財務勝利
對車路士嚟講，呢單更加係神級操作。用 £60M 賣走一個下半季會隱形、戰術地位開始邊緣化嘅球員，呢筆錢基本上Cover晒後來買莫拉達 (Morata)、巴卡約高 (Bakayoko) 同魯迪加 (Rüdiger) 嘅開支（雖然嗰堆人後來大部份都水水地，但當時係必需嘅）。
喺財務角度，呢係教科書式嘅高位套現。Marina 嗰陣嘅談判手腕，確係不得不服。
消失的八年？未必，係海港皇帝
好多人以為奧斯卡去中超係UN UN腳賺錢（好似泰維斯咁），但事實上，佢係中超金元時代最盡責嘅外援。
佢喺中超8年，交出咗 77個入球 同驚人嘅 142次 (?) 助攻。佢唔單止係養老，佢係統治咗個聯賽，幫球隊拎咗3次中超冠軍。
當然，佢亦有過爭議。2017年對廣州富力，佢發脾氣連續兩次大力將波踢向對手，引發兩隊50人大亂鬥，佢就被罰停賽8場。呢件事亦反映出佢斯文外表下，其實有果種類似哥斯達Feel、南美球員特有嘅陰濕同躁底，並唔係大家想像中咁乖仔。
但無可否認，當其他大牌球員因為限薪令紛紛跳船嗰陣，佢選擇履行完每一日合約，直到2024年先含淚告別。佢用行動證明，佢係一個攞錢做嘢、極具職業素養嘅頂級僱傭兵。
總結：求仁得仁的無悔結局
返到最初嘅新聞，如果奧斯卡真係因為心臟問題而掛靴，作為車迷，我哋應該點樣評價佢？
佢無兌現全部天賦，無成為下一個卡卡，甚至親手切斷咗自己喺歐洲豪門嘅傳奇之路。喺足球歷史嘅維度，佢可能係一個失敗者。
但喺佢自己嘅人生維度，甚至係我用打工仔嘅角度睇，佢係一個絕對嘅勝利者。佢用8年青春，換取咗家族幾代人嘅財富自由，完美兌現咗「不想變窮」嘅諾言。
車路士得到咗冠軍同轉會費，奧斯卡得到咗財富同家庭保障。呢場分手，雖然充滿銅臭味，少咗啲浪漫，但卻係最誠實、最無可厚非嘅雙贏。
祝早日康復，奧斯卡。你嘅選擇，我哋理解。
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
https://www.threads.com/@hkgchedog
鍾意我嘅文章，又有餘力支持我嘅話，記得去我Substack訂閱：
https://hkgchedog.substack.com/
請按此登錄後留言。未成為會員? 立即註冊