為香港足球創造歷史 傑志正式出線亞冠16強!!!

hk_cultural 於 02/05/2022 發表 收藏文章
今年面對日本以及泰國嘅球隊,傑志以2勝1和合共取得7分,成爲第一隊香港球隊晉身亞冠杯16強。為香港足球創造歷史。由上年以1球得失球差飲恨出局,到今年球隊上下齊心奮戰,多次落後下追平比分,最後令傑志成功力壓墨爾本城取得最後一個晉級位置。


《連續兩場將士用命 絕地取得積分》
係人都知,要反勝或者扳平嘅必要條件係需要落後。但站於亞冠舞臺上面要抵住壓力,甚至保持決心,對抗實力更頑强嘅對手絕對唔容易。今日對陣神戶勝利船嘅上半場,對手前鋒連干同傑志守將巴爾拿係無太大接觸下,原地起飛博得十二碼,令到神戶勝利船於44分鐘早早取得領先優勢。

但傑志上下唔希望好似首循環咁半場落後神戶,失波後繼續進攻,成功於上半場尾段博到對方球員手球,獲得十二碼下追平比數。到下半場開始,傑志繼續保持住一貫嘅紀律性防守,甚至到下半場中後段換入黃洋,唐建文加强防守。 但到左86分鐘一個防守不留神,令到曾經效力紐卡素嘅武藤嘉紀接應角球頂入。


“你入一球十二碼,我就入返一球十二碼。你入一球角球,我就入返一球角球。

落後咪再次追返,你入一球我咪再入一球。到最後一刻努力終於有回報,基爾頓補時開出角球,巴爾拿由禁區頂後上,衝頂下以頭槌頂入,91分鐘為傑志追平比數。入波一刻,相信所有睇住電視嘅家庭觀衆都會尖叫,筆者我入波一刻更加聽到隔離屋大叫。之所以能夠扳平,就係因爲個種打不死嘅拼搏精神,覺得自己今場無論點都值得擁有分數,先有鬥心頂落去。

2018年3月14號,鄭展龍於92分鐘射入第一個亞冠入球,令傑志第一次獲得亞冠勝仗。
2022年5月2號,巴爾拿於91分鐘頂入角球扳平,令傑志第一次取得亞冠出線資格。

傑志喺亞洲足球兩個重要時刻,都係出現於補時階段。縱使客觀而言,球隊實力上同日職主力依然有差距,但今日傑志就係比對手渴望勝利,就算64分鐘鄉家友太,大迫勇也同武藤嘉紀三位主力上陣,勝利船貌似要全力爭勝。球隊都係繼續博落去,發揮出香港人打不死嘅精神,最後呢份努力,就為香港爭取一場到至關重要嘅分數。


《後備殺手艾力士 上場就展現殺手本色》
不論正選後備,幾多分鐘獲得落場機會,每位傑志球員都有能力為傑志作出貢獻,呢兩場後備上陣嘅球員,例如黃洋同唐文兩位大哥,其實都喺本地聯賽開始逐漸退居後備,比班後生同當打嘅球員慢慢上位。但佢地依然保持住狀態,每次亞冠出場都可以交到功課,為球隊配置作出補充,例如係黃洋大哥,今場後備上陣就於中場擔任防守角色,為當時已經有黃牌嘅巴爾拿分擔防守壓力。

而講到後備球員,就必須提到被網民封為香港文尼嘅後備殺手,艾力士。雖然今場對陣神戶勝利船嘅比賽,艾力士只係短暫上陣幾分鐘,對戰果無直接影響。但回望上兩仗對陣神戶以及清萊聯嘅比賽,每次一上陣就為球隊注入活力,以不斷嘅走動去找尋空位,先有首循環對住神戶於補時入球追近比數,到上場對清萊聯半場上陣,一入場先有兩球禁區外遠射,雖則中柱彈出,但都即時為球隊爭返氣勢。

隨後艾力士先有一球禁區外施射為傑志追平,之後再以一下後腳助攻丹恩奴域。一上陣就隨即直接參與兩個入球。而其實艾力士呢種後備殺手本色都唔係偶然,上年足總杯8強對陣南區,正正係由後備上陣嘅艾力士,加時一個扭身射門打破膠局,為傑志取勝晉級。呢份整裝待發,就係證明左球員只要有實力,無論上陣時間嘅多寡,都一定可以為球隊作出貢獻,展現自己嘅光芒。


.
.
好感動,好感動,好感動,傑志終於正式出線亞冠16強。筆者我作爲一個小小嘅傑志球迷,由喺youtube睇鄭展龍對柏雷素爾嘅世界波,重睇孝仔傑志對天津嘅比賽vlog,一路都只係身爲一個局外人當係睇紀錄片咁收睇傑志亞洲之旅。到前年開始入場支持傑志,以及今日坐係電視機面前,見證住呢場史詩級別嘅經歷,眼見巴爾拿扳平一刻,除左係興奮之外,更多嘅係感動之情,由一路不被看好,到今日全隊憑住一雙手,將個出線名額爭返黎。正式出線亞冠十六強,但旅程尚未完結。傑志即將於8月對陣巴吞聯,傑志絕對有能力繼續於亞洲賽場展現香港球隊嘅實力,繼續為香港足球譜寫歷史,創做出更多可能性。

loading


-----------------------------------------------
睇完記住like, share,或者comment話我地知你嘅睇法,
facebook同ig 逢星期六日晚出文!

Instagram:@hk_cultural
Facebook: 港式本土

文: makdiklong 圖片來源 : hkpldaily, kitchee ,afchub, reuters(scmp)

-----------------------------------------------

留言


請按此登錄後留言。未成為會員? 立即註冊
    快捷鍵:←
    快捷鍵:→