邊隊輸就炒果個？（賽前陣容預測-曼城對曼聯）

曼城進入後迪布尼年代，以往既入波方程式（迪布尼助攻夏蘭特）呢招已經見唔到，哥帥絕對要盡快搵到迪布尼替代品，先可以再度激活布歐。曼城聯賽高開低走，第一場怒炒被拆骨既狼隊四球，但其後則以零比二被熱刺技術性擊倒，以及上場被白禮頓反勝二比一。睇黎除左前場需要重新打做攻擊組合外，後防都要重新建立起屏障護住個龍先得。國際賽後番黎，曼城既傷兵名單都有唔少人，卓基、高華錫、史東斯、艾特紐尼同馬莫殊都踢唔到，都幾影響哥帥既排陣。

預測龍門會起用當拿龍馬。魯賓迪亞斯應會復任正選拍住史東斯踢一對中堅。李維斯同馬菲奧紐尼斯會踢二閘。防中洛迪繼續逗住踢，支援兩個八號位中場賴達斯同賓拿度施華。杜古同波比仔踢兩翼，睇下係邊路可唔可以輸送到彈藥俾前鋒夏蘭特爭取入球。預期曼城主場會繼續打控球型進攻足球，控球率就贏硬架啦，睇下擺唔擺到個波入網既姐。
預測曼城正選陣容（4-3-3）
當拿龍馬
馬菲奧紐尼斯 史東斯 魯賓迪亞斯 李維斯
賓拿度施華 洛迪 賴達斯
波比 夏蘭特 杜古

曼聯都係五十步笑百步，唔好計聯賽盃俾隊乙組踢出局，只計聯賽都係得一勝一和一負成績，叫做拎住四分排第九，高過排十三既曼城，都算認真難得架啦。第一場underdog對阿仙奴踢得幾出色下輸一球角球死球，認真慘慘；第二場對住同級對手富咸（我認為係），本身踢得唔差，但踢到尾就唔輸都可以還神；第三場對住升班馬般尼，又係上半場勁多機會都入唔到，遲遲唔可以了結賽事，就差少少最後被人逼和，真係要多謝對面最後送既十二碼，否則…但依家都冇眼睇。呢三場都係開頭不俗，射極都唔入後，到人地企番穩陣腳就自己開始亂龍，睇下阿摩廉係國際賽期間諗唔諗到方法解決。
曼聯傷兵名單都有四個，馬天尼斯、達洛治，古拿同曼治都冇辦法係呢場波上陣，唯有其他球員俾心機啦。曼聯作客情況下都係underdog架啦，所以呢場波反而可以睇好曼聯，前場多空間有利佢地既發揮。龍門肯定起用比恩迪亞，因為阿摩廉都係記者會講左，你亦冇可能第一場就叫拉文斯去踢，想佢即刻死咩，唯有期望比恩迪亞發揮穩陣，唔好派膠就好。三中堅方面，約羅、迪列特同梳爾都會係穩膽。左翼衛當然會係多古，都係不二之選；反而右翼衛可以保守地揀馬沙拉維，或者進取地揀迪亞路，但我估都係馬沙行先。防中方面，卡斯美路必定佔一席位，隔離既拍檔我相信都仍然係般隊長。其實前場冇左古拿下，般隊長可以踢前一格，出烏格迪幫手後場掃，稍稍推前胖虎用波，但我認為阿摩唔會咁做，因為要保留烏仔體力去換胖虎，所以明奈都應該會係後備。左攻中安保姆已變核心，右攻中冇左古拿同曼治下，舒克斯應該有上陣機會，前鋒則會係好勤力加操既錫斯高。
阿摩廉打哥帥確實係有一定既心得，加上曼城都仍然搵緊最佳陣容而人腳都唔係齊章下，我相信曼聯係有機會可以贏呢場波。呢場打吡唔贏，更待何時？係時候講番句，Manchester is Red !

預測曼聯正選陣容（3-4-2-1）
比恩迪亞
約羅 迪列特 梳爾
馬沙拉維 卡斯美路 般奴費南迪斯 多古
安保姆 舒克斯
錫斯高