歐霸盃賽前分析（熱刺對曼聯） 精選

歐霸盃決賽由英超球隊內哄，熱刺鬥曼聯。今季兩隊係本土聯賽既發揮係不相伯仲，都係不停係下半版掙扎。直到現時為止，一隊排十六，另一隊排十七，兩隊連四十分都未有，可以話係難兄難弟。今季兩隊已互片左三次，曼聯無論係坦夏帶，還是阿摩廉帶，都係全部輸晒，甚有被人格食格味道。今場睇下曼聯會破記錄被人一季四殺，還是報回三箭之仇？

熱刺上場聯賽抽起晒一眾主力下，正選僅有需要寓賽於操既孫興慜同沙亞出場，蘇蘭基、比蘇馬同比坦古亞等五人都係後備入黎純踩草，以兩球不敵維拉，賽果都係非常合理。雖然歐霸決賽同果場波有五日時間差，但普帥都係費事搏，寧願抖下好過，睇下球員會唔會坐太耐反而變左豬油糕先！熱刺既壞消息係攻擊主力麥迪臣、古路錫斯基同比利華都肯定因傷踢唔到，冇左前兩者對熱刺既攻力肯定有影響。中場叫做具級數既只係得番比蘇馬、沙亞同埋比坦古亞。前線就要靠蘇蘭基數糊與及孫仔係邊路策動。以今季兩隊互相對戰黎睇，熱刺整隊既速率明顯比曼聯為高，特別係樸羅同尤度基二閘既後上。雖然今場中場冇左兩大主力進攻，要用波打陣地戰難度較高。如中場起用上述三人，無論硬淨程度、速率還是防守力都不俗，改踢高位壓迫，以打攻守轉換為主要進攻手段，未嘗唔係一個好既戰術部署。
預測熱刺正選陣容（4-3-3）
域卡利奧
樸羅 雲迪芬 羅美路 尤度基
比蘇馬 比坦古亞 沙亞
賓倫莊遜 蘇蘭基 孫興慜

曼聯上場聯賽則主力盡出，去史丹福橋鬥車仔，結果都係以一球不敵對手，失三分兼蝕左道氣。雖然有五日休息，但始終場波都有一定既消耗，究竟回得幾多就好睇球員既恢復情況。如果因為回唔切而體力不繼下輸左呢場決賽，阿摩廉既責任都幾大。曼聯今季踢歐霸盃比賽特別醒神，主要原因係對手根本同英超級別球隊有差距，而唔係話踢「歐洲賽」就特別勁，所以今場決賽既對手係熱刺，場波變番本土賽事，千其唔好以為踢「歐洲賽」就對球隊表現有太高期望。
熱刺冇左兩大進攻重心，可以話係讓你車馬，又睇下阿摩廉夠唔夠膽放手一搏去打進攻足球先！據最新消息，達洛治、迪列特同約羅仍然係康復中，雖然希雲上場有踢，但相信都唔會係決賽出任正選。三個傷兵黎講，個人最希望約羅可以趕得切，因為從近幾場所見，佢在場對後防係有一定既影響力。從阿摩廉呢半季睇，就算對手讓車馬炮，佢都必定會出防守力較高既球員先，所以可以預期曼聯呢場都係以防反為主要戰術。有控球權後都會以猜波為主，唔失控球權下慢慢搵機會。預測安拿拿踢正選。後防三個係馬沙拉維、麥佳亞同梳爾。如果約羅踢到就取代梳爾踢左中堅，希雲隨時候命。一對防中必定係卡斯美路拍烏格迪。兩側翼衛係迪亞路同多古。加拿祖拍般奴費南迪斯踢攻擊中場支援前鋒海倫入波。

預測曼聯正選陣容（3-4-2-1）安拿拿
馬沙拉維 麥佳亞 梳爾
迪亞路 卡斯美路 烏格迪 多古
加拿祖 般奴費南迪斯
海倫

個人認為曼聯呢場不應踢得太保守，雖然對面冇左兩個攻擊核心，但若比較整隊既行軍速率同中場既對碰，曼聯係比較輸蝕。搶唔到球權踢自己節奏，就好容易跟住熱刺踢，而自己後防又唔係特別穩陣，就好大機會先失波。我既話會抽起一個烏格迪出曼治，務求以般奴係中後場穩住節奏，再交俾曼治發板，以控代守。先落後的話，要追就好難囉！