椰子真係無辜架（賽後簡評-愛華頓對曼聯） 精選

《陣容同陣式又夾唔到》
今場陣式上改踢番3-4-2-1，少有地中場起用卡斯美路同烏格迪，希望加強中場攔截。前場選擇起用海倫、舒克斯同般奴費南迪斯。上半場表現用「垃圾」兩個字就總結到，但其實睇陣容都可以預計到。前場三人除左海倫係前場有向前衝刺既速度外，般奴同舒克斯都甚少亦缺乏速度向前跑，兩側翼衛亦要係後場build-up時回撤邊路提供接應點，導致後場好多人亦引到愛華頓上黎逼，但前場冇人可以提供接應點等中堅放長波攻擊對方既身後空間，所以今場愛華頓係上半場可以無顧忌下係前場瘋狂壓迫。純睇控球比率曼聯係較高，但個波係自己後場既時間遠遠多過係前場。當球隊成功運到個波去前場，卡斯美路同烏格迪缺乏中場創造力，令般奴需要愈踢愈後去用波，3-4-2-1既左路只得多古一人上上落落，難以創造人數優勢；而右路既達洛治繼續神隱，攻守對球隊都冇太大貢獻，球隊只能靠左路側擊，令愛華頓集中守住右邊就攪掂。
《追番靠既係調整》
下半場出番黎，球隊改踢5-3-2，將舒克斯改踢輔鋒，提供自由度等佢係中前場串連，而般奴同烏格迪改踢兩個八號位，將多古同達洛治推前。舒克斯停波回波有兩個八號位，兩翼衛推得更前亦提供左選擇。加上愛華頓領先兩球後稍為縮後少少，令到曼聯係中前場既用波時間增加。轉捩點係62分鐘用加拿祖入替卡斯美路。加拿祖入替後踢左中場中，般奴改踢中場中，而烏格迪則踢右中場中。加拿祖提供左邊路既突破點同反擊點；重中之中係般奴。佢改踢中場中後，聯同三中堅係中路形成4對2，利用佢既技術控制節奏同派牌。增多左控球時間令烏格迪同加拿祖可以更積極投入進攻，球隊係陣地戰形成3-1-6，所以球隊係進攻組織有明顯改善。有得有失，當般奴改踢6號位後，球隊係中路冇屏障，導致球隊一失控球權下，就好易俾人直接對住防線衝擊。愛華頓不乏反擊既場面，幸好拖肥幾下埋門既質素都唔太高，安拿拿都冇甩拖下先冇再失球。以球隊下半場既表現，就算追唔番平手，小弟覺得收貨啦。
《總結》
作客對住當頭起既愛華頓，小弟都冇諗到會有分落袋。楊格最後既插水，小弟認為判十二碼既話都唔過分，隻手實在係有推有拉，反而安拿拿既撲救係咪有條件做得更好呢？經過呢場波，現有人腳下，球隊似乎更適合踢5-3-2。若果堅持要踢3-4-2-1，一如小弟由聽到阿摩廉執教所料，般奴係必需要改踢平排中場，而前場三子則肯定要用加拿祖拍舒克斯。海倫既情況相當尷尬，唔好講入唔入到波，係前場停波或做拉空都做唔掂，係咪收起坐下板抖抖較好？馬田仔今場已經有20分鐘上陣時間，技術、身形都有待磨練。如果海倫既表現仍然未如理想，下次可能半場都會換走你先。