贏係基本，炒唔炒就睇mood（賽前預測-利物浦對曼聯） 精選

利物浦今季可以用「痴撚線」黎形容！雖然高普係夏天走左，但新上任既史諾無縫接軌，帶領利記係呢半季打出佳績。單計聯賽，18場波14勝3和1負，入左45球，失左17球。現時拎住45分排係榜首，距離第二名既阿仙奴有6分差距，兼打多一場。史諾一上任並冇大幅度更改高普留下既體系，佢係進攻同防守加入少少自己既原素，加上整隊球員本已成熟，真係自動波都識踢，再加上今季其他隊都有各種問題而跌watt，今季實在係大好機會再問鼎聯賽冠軍。除左史諾值得一讚外，利物浦既沙拿都必定要讚。沙拿今季係聯賽已有17入球13助攻既成績，絕對係利記呢半季成功既功臣，佢亦成為英超歷史上首位在聖誕節前達成「雙雙」的球員。利記近況相當誇張，近三場全勝兼入左14球失4球。面對住近況慘烈既曼聯，仲要係主場出擊，贏係基本盤，大唔大炒就睇心情。睇下沙拿係今場又拎咩數據，等佢傾續約果陣可以加多少少人工啦！
預測利物浦正選陣容（4-3-3）
艾利遜
阿奴 祖高美斯 雲迪克 羅伯臣
蘇保斯禮 加雲貝治 麥卡里士打
沙拿 加寶 迪亞斯

曼聯同利物浦相比可以話天與地。人地利記就爭冠軍，曼聯就要為護級而努力。阿摩廉走馬上任後，曼聯戰績比之前更差，近五場僅得一勝，四場全敗，無論對強隊定弱隊一樣輸波。現時球隊只得22分排第14位，距離第18位只有7分距離。阿摩廉講到明淨係會起用三中堅陣式，就算成隊人都唔岩踢，佢都會堅持到底，所以由佢上任帶隊，都見到班球員迷失球場。一落場就輸，一輸就冇信心，冇信心就連普通控傳都失。小弟不鼓勵賭博，但根據bet365賠率，曼聯贏到既話竟然高達10倍，呢個賠率應該近30年都冇見過。睇黎曼聯呢場輸就輸硬，睇下會唔會好似上年飲七喜，又還是比七喜更七喜！
小弟愚見係呢場波如要踢得均勢少少，最好係陣式上改踢番4-2-3-1，用番兩隻快翼去牽制對方既二閘，再係羅伯臣呢面多埋手，因為今季佢狀態不復當年勇。進攻侵略性大左，令到對方唔敢壓太上，先有望唔駛輸得咁多。不過，阿摩廉都應該唔會改變佢既體系，要旭只會旭人腳。預測安拿拿都係正選。中堅都唔會有咩改動，麥佳亞、迪列特同馬天尼斯相信都會繼續正選。防守中場或會改用卡斯美路拍烏格迪自加強防守。兩邊翼衛都會係達洛治同馬沙拉維。前場三人組則會用停完賽既般奴拍住迪亞路支援海倫，搏係前場偷雞。

預測曼聯正選陣容（3-4-2-1）
安拿拿
迪列特 麥佳亞 馬天尼斯
馬沙拉維 烏格迪 卡斯美路 達洛治
迪亞路 般奴費南迪斯海倫

呢場波小弟完全唔睇好曼聯有能力拎到一分走人，但都相信利記會好似紐卡素咁，入到燕梳球跟住「就住黎踢」，務求慳水慳力贏就算，估計都係兩三球上落。小弟唯一期望係曼聯整隊可以打出拼勁，令對手要贏都要用九牛二虎之力，希望球員打出香港精神-「搏盡無悔」！