「大碌」今次真係保你大啊！（賽前分析-阿仙奴對曼聯） 精選

阿仙奴暫時係聯賽拎住25分排係第二位，距離榜首既利物浦有9分差距，如果要問鼎聯賽冠軍，場場都真係不容有失，畢竟今季既利記好似唔識輸，非常厲害。阿仙奴近況非常強勁，近三場全勝兼入左十三球僅失兩球，一眾主力球員一出番黎即刻成隊唔同晒。不過，今場仍有賓韋治、梅里路、富安健洋同柏迪因傷倦勤。奧隊復出後，整隊進攻更集中右路。佢、添巴同薩卡，加埋會後上插入既懷斯，絕對有力撕破曼聯既左路防守。阿仙奴進攻問題應該不大，反而想睇下達叔會點樣應付曼聯既新攻擊模式。

預測阿仙奴正選陣容（4-3-3）拉也
添巴 沙列巴 加比爾 卡拉費奧利
奧迪加特 佐真奴 懷斯
薩卡 夏維斯 馬天利尼

曼聯係國際賽期換左新帥後，整隊好似轉晒運。近三場成績係兩勝一和，上周末更大勝愛華頓四比零。華舒福更係近三場比賽攻入三球，狀態好似回復水準。不過，阿摩廉都話比數係反映唔到戰情，戰情係若非愛華頓自爆幾下，以頭三十分鐘表現黎計，曼聯踢落係冇條件贏到，整隊仍有極大既進步空間。今場硬撼阿仙奴，會係新帥第一場正式考牌戰。

阿摩廉係呢三場比賽瘋狂試人，前場係冇試過出相同既組合，所以係好難預測佢心目中既最強陣容，亦唔知佢今場會唔會繼續試。不過佢咁樣輪住出，就可以保證到前場球員各自既體能狀態都唔會有太大落差，但踢落個化學作用就冇連續出咁快建立到。
預測安拿拿繼續正選。阿摩廉係防線上已搵到最佳組合，但今場馬天尼斯停賽，所以佢應該會搵梳爾拍迪列特加埋馬沙拉維形成三中堅。明奈亦儲夠牌停賽，烏格迪既拍檔會係二選一。小弟認為呢個拍檔人選好睇阿摩廉係戰術上既取向。如果佢想打守勢少少，就可以出卡斯美路，烏格迪踢左防中幫手協防左路，而卡斯美路就支援右路既馬沙拉維；如果佢想打主動少少，就可以出般奴費南迪斯踢右防中，利用佢既用波能力幫手係中場串連，前場可以再出幾個用波能力強既球員去踢搓傳，而唔係起用跑狗快放打突擊。基於阿記強勢，加上有睇過近阿摩廉帶士砵亭對曼城，個人預測佢會先出卡斯美路，務求先守穩搏偷雞。右翼衛必然係狀態大勇既迪亞路；左翼衛係冇得揀既情況下，只能用近況極大碌既達洛治。今場仲要對住薩卡仔，真係保你大啊大碌！兩個攻擊中場相信會續用華舒福同般奴費南迪斯，近況兩個都不俗。舒克斯同海倫兩個都有貨交，前鋒位置相對難揀。如果有睇曼城對阿仙奴場波，可以見到夏蘭特係完全冇甜頭。即係從理論上講，出舒克斯游走中前場，應該會比向前衝，打身體質素行先既海倫好，但就好睇領隊既戰術部署。如果係想踢穩守突擊，出舒克斯反而會拖慢反擊節奏；但如想多控球組織進攻，就可以起用佢。個人估計阿摩廉會先用海倫。小弟認為呢場波最重要一點，係要先定下宏觀戰術再選擇起用果堆人一齊落場踢，而唔係先揀卒再定戰術，否則就有機會出現球員踢法唔岩戰術既問題。
預測曼聯正選陣容（3-4-2-1）
安拿拿
馬沙拉維 迪列特 梳爾
迪亞路 卡斯美路 烏格迪 達洛治
華舒福 般奴費南迪斯
海倫