迪亞路拯救曼聯（賽後簡評-曼聯對PAOK) 精選

曼聯上半場既演出都幾嚇人，雖然佔有近六成控球，但只得四射一中；下半場雲佬係更衣室開完風筒下，球隊表現先有番少少起色。50分鐘，迪亞路尾柱接應般奴傳中頂入領先。其後，PAOK有一次極黃金機會，迪蘇達利係十二碼點無人看管下竟然「傳」俾安拿拿，曼聯先唔駛俾人追和。77分鐘，迪亞路單人係前場逼搶成功，係右路禁區頂盪遠柱射入。PAOK級數有限，輸兩球更加冇力回天，曼聯終於係歐洲賽事贏到波。縱觀全場，曼聯數據上只得53%控球，全場16射4中，對手講緊既只係希臘球隊，小弟既標準黎講係完全唔合格。今場係創造黃金機會方面比前兩場更差，更莫講話控制球賽。要不是對面前鋒屎，場波分分鐘打和。
《想講下加拿祖》
今場加拿祖繼續正選上陣，踢左65分鐘先被華舒福入替。數據上，今場佢竟然係0射門，傳送左23次有18次成功，傳送成功率係78.3%。對比番上一場佢既5射2中，傳送左25次有19次成功，傳送成功率係76%。上場對車路士佢就做大嘥鬼，亦多次唔交波俾隊友；今場明顯見到佢係好刻意想同隊友配合，幾下傳俾達洛治疊瓦，亦有一下斜線質般奴落底，但傳波既力度、線路同時機都有極大既進步空間，而佢愈刻意想交波，反而令佢自己個個人突破既銳利度低左唔少，佢仍然需要學習點樣做到平衡。

今季淨計聯賽，佢射左29腳波有12次中龍入兩球，單計射門中框數字經已係隊中排第一，排第二既般奴係講緊32射6中，接近差佢一倍有多，所以曼聯今季係極其依賴加拿祖內切射門。今季佢上陣時間多，又擁有無限開火權，但係把握機會能力較低，所以佢好多場都會俾人插。我反而唔係想插佢，而係想「護」佢。
睇番佢份CV，2022-2023上一隊，參與左19場賽事；上年踢36場波入7球，經已排係球隊排第三；今年直頭孭飛，踢左10場入兩球，係球隊排緊第一，而佢只係講緊二十歲。睇番以往既朗尼、C朗、甚至係雲佩斯、美斯，佢地初出道頭幾年都總會有一眾大佬傍住。朗尼同C朗就有雲尼史度萊、史高斯同傑斯；雲佩斯果陣就有亨利同伯金；美斯當時就有朗拿甸奴，變左佢地既容錯率好高，你射唔入或者踢得唔夠成熟係冇問題，球隊仲有其他核心去贏波等你成長；但依家呢隊曼聯冇左一眾老大哥壓陣壓場，只計呢兩年係前線既大佬係韋荷斯同福仔，真係…點攪啊！年輕球員已經要孭飛（今場就到迪亞路），容錯率極低既情況，加上踢曼聯，只要一兩個單刀唔入就開左放大鏡大肆刷流量，對年輕球員既壓力係極大。咁大壓力仲要急速成長，先唔好講球員有冇潛質，就算有都分分鐘拔苗助長，被壓力同媒介催毁。年輕球員係要時間成長，級數未到就係未到，真係只能繼續俾機會佢出場，俾時間佢吸收。
《總結》
今場波贏到都增強番球隊唔少信心，下場對李斯特城就一定冇聯賽盃果場咁易踢，而我亦唔信李城會驚左曼聯，呢場睇落都會係55波。新帥快將上任，人腳級數就係咁多，都唔期望佢會帶到隊波有咩突破，最需要睇既係佢黎左之後，班後生仔會唔會明顯進步先係重點！曼聯，繼續加油！