荷甲都贏唔到抵俾人笑（賽後評-曼聯對川迪） 精選

歐霸盃第一場賽事，曼聯一比一被川迪逼和。連荷甲都贏唔到，曼聯今舖肯定又俾人笑。今場波既焦點肯定係曼聯中場艾歷臣。佢係35分鐘係禁區妙射得手，為曼聯先開記錄，但佢係68分鐘係後場一個極大意失誤被人偷左個波，及後拉馬斯長驅直進單刀射門得手。艾歷臣真係神又係你，鬼又係你。坦夏係79分鐘換入曼治、海倫同明奴，可惜最後都無功而還。

《陷入使用般奴既迷思》
近幾場艾歷臣都擔正踢正選，拍住般奴費南迪斯打雙核，另外就搵一個人逗住佢兩個，上場用明奴，今場就用烏格迪，而前鋒就起用舒克斯。面對實力比自己低既球隊，坦夏咁樣出人確係加強左球隊係進攻陣地戰既能力。多左艾歷臣既調度，整隊係進攻既流暢度成熟左不少。另外，舒克斯係前場起到極大既串連作用，既可以係禁區內做支點策應，亦會現身拉出黎組織。中後有艾歷臣，中前有舒克斯，咁般奴隊長既處境就非常尷尬。般奴係曼聯踢左咁多季，相信大家都明白佢踢法係點。佢需要極多球權，以輸送助攻俾前鋒入波為主，但佢既傳送好多時都比較急進同冒險，相對比較適合打反擊，等前場有空間同快馬就可以等佢交到靚直線或斜線進攻。陣地戰時，佢唔太擅長走入禁區接應，多留禁區外或最盡十二碼點等射。當球隊依家有艾歷臣同舒克斯時，佢既作用就細左好多，加上佢少前插，反而令球隊係禁區少左一個接應點，佢既存在有少少多餘既感覺。以人腳配置上，起用曼治去代替般奴或者會令球隊有更大既火花。曼治既不佔球權，亦以走位靈活同前插禁區為主要進攻手段。持球後唔會太著重俾killer pass，反而會多同隊友配合走位前插進攻。佢亦有一定既half-turn同盤扭能力，望落佢更match到依家既陣容。坦夏依家就陷入左使用般奴既迷思，對川迪同水晶宮兩都係和緊既時候，就算般奴踢得唔好，死都會擺佢係場內，但明明佢既作用已經不大，就只係搏佢有一下靈光一閃既傳送。如果曼聯要進步的話，相信坦夏都需要諗諗如何使用佢，般奴只能保到你既下限，但如要再提升，一係佢進步，一係睇怕只能換左佢。
《換人都要換戰術先有用》
今場坦夏係79分鐘先換人，唔駛問就一定係換得遲架啦，不過係咪因為海倫同曼治都有上陣時間限制就不得而知。換入海倫同曼治都合理，但坦夏既換人換到就黎我呀媽都知佢點換，唔通唔可以擺雙箭頭？換親都係換艾歷臣？見到艾歷臣錯愕既表情，就知般奴係永不能換。呢樣亦係上文有提及既。除左換人單調外，有冇轉換戰術亦係一大問題。換人後既戰術上係咪應該更多係兩邊側擊為主，兩閘係咪應該多overlap幫手拉扯對方既防守，以傳中搵海倫為目標，先係破門既良策？今場只見換人後，球隊繼續嘗試地面滲透，變左海倫係禁區既作用不大，加拿祖改踢左翼就不停單打獨鬥，而般奴改踢右路冇乜波到之餘，佢既冇突破力，更少人幫佢走位拉空，令佢唔能夠係邊路提供到靚既傳送。尾段最有威脅都係黎自麥佳亞既球鎚，就知其實轟埋去係有一定作用，點解唔擅用下海倫既衝門？
《總結》
曼聯又和一場，仲要係和荷甲仔，就預左俾人笑，但球隊既進步係見到既，唔單止係講緊新兵既影響，連帶原有班底都有進步。我相信坦夏點都可以帶埋今季，人腳已經比上季再提升左，有更多人腳同戰術轉換既變化，佢好難再用呢樣做藉口。球隊多左幼幼，亦幾適合佢教，如佢解決到上述既問題，球隊既成績應該會有所提升，但如果今季成績都係達唔到標，而球隊係比賽場面上都係冇改善既話，睇怕佢都捱唔過第三季。