「捨得」係修夫基要學懂的課題 精選 推薦

歐國盃進行得如火如荼，備受矚目既英格蘭經過三場小組賽後，以一勝二和成績以小組首名晉級，成功避開極多強隊既上線去左下線踢16強。雖然修夫基帶領英格蘭不敗晉級，不過球隊既表現同球迷既預期有明顯出入，所以謾罵聲仍不絕於耳。

《分組賽進攻數據》
英格蘭分組賽遇上丹麥、斯洛文尼亞同塞爾維亞。三隊都稱唔上強隊，亦只有丹麥算有少少既進攻火力，所以英格蘭係防守上都唔算受好大考驗，三場亦只係失左一球，但坐擁簡尼、比寧咸、科頓、彭馬同薩卡等攻擊手，三場比賽只入得兩球，就好需要值得探討。三場比賽只有28次射門，24隊中排尾7，亦只得10腳中框射門。望望頭三位既德國、法國同西班牙，淨計射門數字係57、49同48次，至少比英格蘭多廿次。問題到底係邊？
《多人冒起反而撞晒車》
如果大家仲記得上屆歐國盃點樣飲恨俾意大利，大家一定記得當時修夫基帶隊係點樣進攻。佢主要係打中低位防反，前場靠簡尼墮後派牌，兩翼用史達寧同華舒福高速後上，攻擊中場比寧咸偏進攻後上插入，加雲菲臘斯同懷斯一個派牌一個截擊，二閘用查比亞同梳爾疊瓦進攻，一對中堅就主力係死球製造威脅。本身修夫基都係中堅底子，穩中求勝係佢理念，而佢選擇以熱刺既進攻方針亦非常適合當時既正選陣容，亦非常適合前線幾位球員發揮。

今屆多個新星冒起，薩卡係阿仙奴踢到曉飛，彭馬係今季最佳新人，科頓應該係今屆英格蘭足球先生，18歲carry曼聯明奴，仲有係利物浦踢內切閘位既阿奴，前場突然跑出多名極具實力既球員，連加利殊、華舒福同辛祖都入唔到大軍名單。呢堆冒起既進攻球員大都係要上腳做策動而非做跑動接應，固此修夫基放棄參考熱刺果套，改為以比寧咸同科頓為進攻策動點，重左輕右既戰術，薩卡則以弱邊單打獨鬥為主，而簡尼要留守禁區，唔需要墜後較炮。不過，前場幾個都係要上腳，缺少左一些以跑動拉扯或做接應點既球員，變左無球跑動既人少，企定要波既人多，想踢小組推進但默契又欠奉，中場又冇人派牌，進攻節奏同方向都冇人控制，所以暫時三場進攻上既表現都係唔合格。
《問題唔止中前場》
呢三場左路大塞車，就算對斯洛文尼亞呢場，科頓同比寧咸已盡量換位踢，一個拉邊就一個係中間，但踢到咁上下都係會齊齊走入中路走同一點接應，而左閘查比亞亦係另一問題。缺少梳爾，英陣係左路係冇人有能力做到拉闊球場。修夫基又冇帶捷維爾或者米曹去，亦算係一個過失，當然點解唔選亦可能有佢原因。只先講現有陣容，既然用任何閘位都唔能夠拉闊球場，理論上就係要用一隻純翼鋒去踢左翼拉闊，但比寧咸同科頓都唔係呢類型球員。一係就抽起其中一人起用上哥頓或艾斯，但呢個決定「肯肯肯定」會俾人插死；一係就出多隻翼鋒，將科頓同比寧咸移入中路，但呢個做法會令隊波攻守失衡，頭重腳輕肯定有違修夫基既足球理念。我相信修夫基幾後悔冇揀福仔入隊。另外，缺少左麥佳亞，大大減低左英軍係死球威脅，古希已經係最好人選，但佢既用波能力同麥佳亞都有一定距離，變左後場只得史東斯呢個較好既出球點，令英軍係打穿對手第一層防線出現問題。修夫基又冇嘗試用干沙，鄧克又嫌佢轉身回追速度太慢，所以史東斯既拍檔都係其中一個問題。
《總結》
睇完上面既論述，唔知各球迷係咪仍然覺得問題只出自修夫基身上呢？俾你係修夫基，你夠唔夠膽受千夫所指下抽起某幾個球員？修夫基擺晒所有能力值最好既球員出黎，但足球並唔係話全部99能力值就會勁，一隊波係要講化學作用。踢左三場都係冇，「捨得」就係修夫基要學既野。有捨先有得，如果再係繼續都係呢套正選陣容，相信過到初一都過唔到十五。下線黎講或者入到決賽既，但贏冠軍可能又要等下屆。