今季真難捱 - 曼聯賽季總結 精選

先總結一下曼聯今季既成績：
聯賽 - 第八名
聯賽盃 - 十六強出局
足總盃 - 冠軍
歐聯 - 分組賽第四名出局

曼聯今季係本土賽事只得第八名，單憑聯賽成績係無緣歐洲賽事，但因佢地足總盃贏左冠軍，所以獲得下屆歐霸盃參賽資格。亦因曼聯拎到歐霸盃資格，本身係聯賽排第六既車路士只能係下屆踢歐協聯，而排第七既紐卡素下屆就無緣歐洲賽事。究竟今季隊波發生咩事導致整體表現唔理想？
1）傷病問題
曼聯由開季至季尾呢場都飽受傷兵困擾，詳情可參考我上一篇文章（傷兵多係戰績差既藉口還是原因？)[url=https://s.fanpiece.com/panrj9r]。出場既正選人腳長期都唔係上季既正選十一人。當整條防線長期缺乏穩定既陣容，防線既穩定性自然會降低。長期缺乏正宗左閘，除左削弱左路防守能力之外，對進攻都有好大影響。缺乏梳爾，左路缺乏出球點。無論用連迪路夫、列古朗甚至達洛治，疊瓦進攻還是走underlap，定係左路提供側擊，連梳爾既七八成功力都俾唔到，所以傷兵問題唔止影響球隊既防守能力，進攻能力都一樣有影響。特別係坦克強調要控制球賽，要踢快速轉換。後場傷得多，唔可以將防線推太前去壓迫，就踢唔到快速攻守轉換；輪換球員既控傳能力又唔夠強，就踢唔到控制球賽。好多野都係一環扣一環！
2）球員問題
除左傷病問題，球員都一樣有不同問題。第一樣就係新球員融入問題。今季買既安拿拿、海倫同曼治，聯同借用既安拉拔都陷入呢個困難。安拿拿要適應左半季，踢完非洲盃番到黎先開始重拾係國米時期既水準，頭半季既表現可以話係災難級；海倫都算高價買入，開季頭幾場受傷冇出，復出後明顯唔適應英超高強度對碰，就算季中連續幾場波都有波入，但都屬曇花一現。傷完出番黎個狀態都去唔到最佳水準，而個人無論背身護波、持球盤扭推進，還是策應埋門都仍有極大進步空間；曼治除左傷多過踢之外，如何同般奴兼容既問題係未能解決。不過就算有一場般奴缺陣而要佢孭飛，佢既狀態同踢法都俾唔到我感覺可以帶住隊波踢，希望只係適應問題
（Btw小弟本身都唔睇好呢單交易）。借入既安拉拔又係水吐不服，要去到季尾幾場波連續踢正選後，先開始摸索到佢既定位同見到佢對隊波可以有咩貢獻（小弟不嬲都支持安拉拔做輪換）。第二樣就係球員自己問題。先有格連活被告虐打女友，再有安東尼受家暴事件影響，仲有辛祖個人紀律問題，呢三個就令到曼聯既右翼位置一直都缺人（迪亞路開季受傷）。華舒福既狀態亦直插谷底，原因或者係後面缺乏左梳爾既支援，係前面又同海倫未有火花，但最大原因或者係續左新約就掛住夜蒲。卡斯美路同艾歷臣既跌watt程度亦係嚇死人，特別係卡斯美路。就算開季頭幾場未傷果陣，速度同覆蓋範圍，攔截單防數據，對比上季係天淵之別。季中又傷一排，季尾出番黎個狀態都係上唔番高鋒。中前場竟然要靠18歲青訓既明奴同19歲既加拿祖擔大旗，曼聯既成績又點會好？

3）坦克戰術
好多球評家都話坦克冇戰術，但如果有細心去留意每一場波，其實佢並唔係冇戰術，只係佢出既人腳踢唔到佢想踢既足球。好大程度係因為傷兵太多，但佢係戰術定位上唔肯妥協，導致隊波踢出黎係零隊形，好似各有各踢咁。季中有幾場都見佢係有嘗試妥協，但好快又再堅持原則。直到季尾大敗俾水晶宮（或聞到魷魚香），佢就真係放棄理念，盡量用戰術去配合人腳，先係最尾幾場贏波，仲係足總盃決賽贏埋曼城。
《總結》
如淨睇曼聯今季既成績表，曼迷就肯定唔收貨架啦；但如果睇埋咁多因素，仲未講新班主入股而帶黎既人事變動，各大傳媒老作鳩吹新聞（足總盃決賽前一日傳炒帥，極度影響決賽前既軍心）
我覺得咁都仲捧到一個盃，亦仲保到下屆歐霸盃既參賽資格，今季都算係咁。咁今季仲炒唔炒坦克好？下篇再同大家探討一下！