打和，Super（賽後簡評-曼聯對利物浦） 精選

《利物浦又衰自爆》
上半場利物浦除左係頭15分鐘未企穩陣腳，俾曼聯多次係左路製造到攻勢後，整場賽事都係圍攻對手。整場賽事利物浦有62%控球，全場28射7中，但最後只能靠沙拿既12碼入波逼和對手。從戰情上睇，拎唔到三分絕對係唔抵。要怪既亦只能怪一眾攻擊球員點解可以有咁多次黃金機會都擺唔到個波入網(Expected goal : 4次）。特別係下半場紐尼斯係窄位近距離唔知想傳定射既情況下，將個波踢左出界，呢下絕對係成場既轉捩點，只要佢既處理再做好少少，就已經可以再次領先曼聯。失第一球完全係崑沙既個人失誤，失第二球則係輸俾明奴既神來之筆，利物浦整場既防守都冇乜大失誤。踢完呢場之後，爭冠既主導權就送左俾阿仙奴，雖然依家利記同阿記同分，但得失球則遠遠落後（差9球）。除左自己繼續努力外，都要靠其他隊幫幫手先得。
《曼聯憑咩有得贏？》
曼聯後防飽受傷兵困擾，除左小將甘華拿要頂硬上外，左閘亦要用雲比沙加串演。防中卡斯美路勉強復出頂硬上拍明奴，中前場則相對較為完整。坦克係踢法上都冇因為對住利物浦而選擇全軍退守，都係採取前面就逼後場就縮既模式，導致前後場斷開，令利物浦都有幾多空間去製造攻勢。上半場曼聯更罕有地係一次射門都冇，而失果一球又係防守角球走甩人。睇番整個過程又會發現球隊係防守角球既戰術明顯有漏洞，明奴係守12碼點，所以當迪亞斯走去佢附近時，佢係冇意欲去防守佢。到角球開出，迪亞斯走去尾柱既位置係應該由邊個球員防守？照睇就應該係達洛治要跟住麥佳亞一齊向前移，但佢就選擇縮左去守條柱，究竟整個防守系統有問題？還是球員落場既決定有問題？
如果只睇上半場既表現，曼聯根本係冇任何條件可以追平甚至反超，但今季既曼聯就係唔知點解憑乜野可以做到。50分鐘，般奴把握到崑沙既失誤，四十多碼笠射得手追平。任你利物浦狂射十幾腳，但你只係入得一球；曼聯射一腳就入一球。及後曼聯都係被圍攻兼零射門。去到67分鐘，明奴禁區內一個半轉身一chok靚射死角就反超。曼聯冇特定進攻戰術純靠個人能力就入波，真係吹佢唔脹。足球比賽始終都係講點樣擺到個波入網先贏到。坦克一見領先就隨即換入安拉拔諗住守到尾。點知雲比沙加84分鐘既魯莽出腳輸球12碼俾沙拿射入追成平手。利記最後一擊，亦被今場表現神勇既安拿拿接實。曼聯最後都未能拎到三分，繼續穩守第六位。

《總結》
呢場波缺少左曼城對阿仙奴果種步步為營，唔想輸俾你既謹慎。一場大開大合既比賽，兩隊都快上快落，兩隊都各有失誤，最後各得一分。利物浦睇戰況贏唔到唔抵，過程中睇到利物浦比曼聯何止高半班波。曼聯呢場除左見到明奴再次閃耀奧脫福，最值得欣慰係見到中堅小將甘華拿有不俗既表現。傷兵滿營下能夠打和利物浦，已經幫到你盡（曼城同阿仙奴），我地冇冠都要你拎唔到。坦克呢場既部署從賽果上睇就可接受既，但從過程黎睇就認真麻麻。係咪一定要斷開黎踢？係咪一定要推上去逼？ 贏緊果陣可唔可以盡量壓縮空間等打反擊？我個人認為好多戰術上既細節係過程中可以做得更好。曼聯踢完呢場同第四既熱刺差十一分，同第五既維拉都差十一分（打少一場），相信都可以同下屆歐洲賽事講拜拜（贏到足總盃都仲有既）。坦克早前聲稱下屆留隊，睇下夏季球隊會點增兵，加上希望下季冇傷兵問題下，坦克能否帶曼聯重回爭標行列。