《達叔試陣試出禍？》 精選

阿仙奴今季重點買入左防中懷斯、前鋒夏維斯、後衛添巴同門將拉也，前中後都各有一名具質素球員加盟，整體實力一定係強左（比較可惜係添巴受傷要抖一段時間）。多左人用對阿迪達黎講就一定係好事，但亦都等於佢需要放棄部分球員，因加盟呢幾位都具備正選實力，買左就冇理由唔用，重點係要睇下點用。阿仙奴暫時踢左三場波兩勝一和，睇成績都還可以，上場既和波仲係富咸臨尾先靠死球追和，但好似球迷對達叔既用人有不少質疑，小弟嘗試從達叔角度理解點解佢咁用柏迪。

《達叔堅持踢閘位內切》阿仙奴上季最成功既收購相信會係薛真高。佢能夠帶俾阿仙奴一套與別不同既進攻戰術模式-閘位內切，直接激活左阿仙奴既沙加同奧迪哥特。達叔見狀當然想沿用呢套模式，奈何薛真高開季有傷，新加盟既添巴又受傷，佢就嘗試縮柏迪打閘位，希望佢可以填補到薛真高既位置。另外，懷斯既加盟令到柏迪直接失去左六號位正選，而達叔又唔想唔用柏迪下，佢認為佢先打個右閘，係進攻內切番入中路變番防中，好似對柏迪又唔會太陌生，所以呢三場達叔都將柏迪移後踢右閘位。

牽一髮動全身，將柏迪移後到右閘，即係要抽起加比爾或賓韋治。點解會選擇抽起加比爾？原因亦關戰術事。當右閘內切入中路，右中堅就會移至右邊幫手出波，同時間要應付對方左翼進襲。以往左面薛真高內切後，加比爾居中，移去左面既會係沙列巴，右面係賓韋治；但依家左右倒轉後，沙列巴居中，加比爾係速度上或用波上應該比賓韋治差（達叔應該係咁諗），所以賓韋治可以搶到正選位踢中堅，而左閘則交俾富安健洋或基維奧擔任。
《柏迪同懷斯一齊踢中場好似功能重疊》
懷斯係韋斯咸經常出任4-4-2既平排中場之一，較常係逗住蘇捷踢，主要幫球隊梳理中後場組織，等蘇捷可以壓前進攻，佢就幫手係中場做串連同作中場既第一重截擊屏障。就算踢國家隊拍住奇雲菲臘斯，佢主要都係踢得較深，要創造同壓上都係佢個拍擋為主；而現時係國家隊踢4-3-3陣式下，佢出任6號位（單防中）。無論係國家隊還是球會，佢係中場都係踢得比較後，逗得比較深。佢逗係後面用波明顯比要佢推前壓上創造為佳。柏迪既功能基本上同懷斯係一模一樣，當然多左柏迪係中場搶截駁腳對球隊防守理論上會較好，但就會減低中場既創造性。另外，柏迪亦不如賓韋治係右閘位可以疊瓦或45度傳中，變左薩卡缺乏支援，只有奧迪哥特係half-space同佢做配合，缺少左一個overlap沉底既進攻模式。幻想下，仍然係懷斯踢六號位，但閘位內切既係扭得推得傳得既薛真高，相信阿仙奴既中場運轉一定會比柏迪加懷斯好。
《總結》
達叔呢幾場試陣都只係令球隊失左兩分，你問我值唔值得試？小弟認為值得，因為薛真高始終冇可能踢足所有賽事，缺少佢後究竟點樣可以維持到球隊一貫既進攻模式係達叔需要解決，而初步睇用柏迪踢隻閘又好似唔係好得。比著我，我會嘗試縮柏迪打中堅，等賓韋治可以係番右閘位隨時overlap，而柏迪亦可以學史東斯式中堅變中場，繼續維持3-2-5既進攻模式，可能會簡單過佢由右路走入中間。懷斯與柏迪，究竟係一山不能藏二虎？還是一加一大過二？廣大阿迷又點睇？不仿一齊討論下。