睇下係我麥迪臣勁定係你般奴醒（賽前分析-熱刺對曼聯） 精選

熱刺今個夏天大地震，先有新領隊普斯迪高古上任，後有熱刺老臣子哈利簡尼遠走拜仁。熱刺突然之間冇左攻擊核心，新領隊都咪話唔頭痕。除左哈利簡尼走左，輪換球員摩拉、丹祖馬同朗格勒都走左。幸好，球隊補充左攻中麥迪臣、中堅雲迪芬、左閘烏度基同門將維卡利奧，而尼當比利、盧斯素同列古朗等都外借收回，兵源上又不致太短缺，睇下邊個岩新領隊用先。小弟只睇左賓福特對熱刺頭30分鐘賽事，發現新領隊進攻上都幾新穎。兩閘同時內收入中路，會聯同比蘇馬形成一個三人中場線，一對中堅就稍稍逗後支援。兩隻翼鋒拉邊提供闊度，當二閘傳送到俾翼鋒，就會再向前走入half-space空間。麥迪臣同史傑比理論上係一左一右係攻中位支援李察利臣，但麥迪臣會相對較自由，並會佔據中路及左路，右路則交俾史傑比去組織。不過，睇落球隊太依賴麥迪臣去創造，中後場僅得比蘇馬係能夠用到波。只要凍結左呢兩個球員，相信已經可以令熱刺難以組織進攻。
今場熱刺係主場出擊，相信佢地會踢得較進取，人腳亦唔會同上場有太大變動。陣式會用4-2-3-1。門將起用維卡里奧。四人防線係烏度基-雲迪芬-羅美路-艾馬臣。羅美路上場有腦震盪症狀，入完波都要即刻退下火線，睇下今場出唔出到。比蘇馬同史傑比鎮守中路。兩翼係孫興慜同古路錫斯基。攻擊重心麥迪臣支援前鋒李察利臣。

預測熱刺正選陣容（4-2-3-1）
維卡里奧
艾馬臣 羅美路 雲迪芬 烏度基
比蘇馬 史傑比
古路錫斯基 麥迪臣 孫興慜
李察利臣
曼聯開季首場迎戰陣容大改動既狼隊，相信賽前都冇人會預測到曼聯會贏得咁艱難，甚至乎有機會先落後。坦克今場派遣佢心中既正選陣容，高價來投既曼治同舊部安拿拿齊齊正選。戰術上亦有所改變，改用3-6-1或3-2-5係後場做build-up，但梳爾或雲比沙加既內收中路效果差，梳爾既內收更廢左佢後上疊瓦同出波能力；兩翼單對單亦未能突破到對方防線。缺少艾歷臣係中場控場同穿針引線下，令曼聯係後場空有控球權，但唔能夠運到波上前。中間卡斯美路亦缺態，有好幾次被逼甩或攔截失敗就俾人打反擊直接攻門。入果一球純屬意外，並不是球隊戰術部署既踢法下入波。今場如果坦克唔攪攪佢，作客白鹿徑可能要輸波而回。

預測坦克都會用4-3-3陣式。安拿拿繼續出任門將。中堅馬天尼斯上場因傷被調離場，倦勤機會相當大，連迪路夫會頂替佢既位置，後場能用波既人又少一個。佢既拍檔會係咁快就開齋既華拉尼。左右二閘係梳爾同雲比沙加。中場鐵三角係卡斯美路、曼治同隊長般奴費南迪斯。雖然上場既問題明顯，但我相信坦克會繼續試，唯一會稍作改變既或會要求般奴多少少回後組織。辛祖上場後備出黎表現活躍，今場有機會先任正選。右翼安東尼同前鋒華舒福會係不二之選。熱刺踢法都幾進取，同時亦好肯係前面踢逼搶，後防空間相對會多左既情況下，應該有利曼聯前場幾隻快馬去進攻。睇下坦克今場會點踢去應付熱刺。
預測曼聯正選陣客（4-3-3）
安拿拿
雲比沙加 華拉尼 連迪路夫 梳爾
般奴費南迪斯 卡斯美路 曼治
安東尼 華舒福 辛祖