英超開季預測（上）

英超即將開波，各隊暫時都有唔少球員轉會（轉會窗仍未關閉），小弟簡短預測一下來季英超幾間球會既大約名次：（曼城、阿仙奴、曼聯、利物浦）

1）曼城
主要球員收購：加維度、高華錫、簡些路（外借回歸）
主要球員離隊：馬列斯、根度簡、文迪（左閘）

曼城有哥迪奧拿帶領下，當然仍然係奪冠熱門。根度簡既離開影響都幾大，雖然曼城從車路士簽入高華錫作填補，但此子既後上入球能力比起根叔本身有一段距離，究竟係其他球員肩負起入球重任，還是高華錫再度進化，就睇下哥帥點調較。另外，馬列斯既離隊亦有一定程度影響，佢純熟既左腳踢右翼絕對係其他球隊既惡夢，而曼城暫未有係呢個位置補強，預料科頓同貝拿度施華會競爭正選位，但兩者如講侵略性或會稍遜，睇下曼城會唔會係呢個位置上添兵。小弟預測曼城今季坐亞望冠。
2）阿仙奴
主要球員收購：夏維斯、懷斯、添巴、拉也(待官宣）、巴朗根（外借回歸）
主要球員離隊：沙加、端拿（門將）、尼爾斯

上季臨尾鄉既阿仙奴今年大肆擴軍，前中後都有極具實力戰將加盟，聯同上季冬天引入既杜沙特同佐真奴，整隊實力同板凳深度都有顯著提升。唯一比較令人擔心就係失去左沙加，無論懷斯還是夏維斯又或者杜沙特，都未必做到沙加既攻守兼備。懷斯較適合踢逗後中場，睇下達叔能否改做佢踢到左八或者達叔點樣調整隊波令到中場既分工較清晰，攻守更平衡，會係隊波去到幾遠既關鍵。小弟預測阿仙奴會係爭冠既一份子，頭四穩陣！
3）曼聯

主要球員收購：奧拿拿、曼治、賀蘭特、伊雲斯
主要球員離隊：迪基亞、伊蘭加、麥佳亞（待官宣）

曼聯上季由坦克接手後，成績同球隊踢法都同前季有明顯轉變。上季都已經引入左不少具實力戰將；今季就再針對性買人提升球隊實力。有follow開小弟都知我對曼治同賀蘭特既轉會不太看好，但先不論結果如何，球會補強既位置都係正確。你要由龍門組織，球會就買奧拿拿；你要前鋒，就買丹麥仔；中場唔夠跑動，就引入曼治。因球會都非常配合坦克，所以坦克今季需要交到一定既成績，咪都未必唔會聞到魷魚香！憑現時隊中人腳，今季要聯賽爭冠都仲係未得，但保四係基本盤，外加要見到有力同曼城爭標先得。預測曼聯今季會係頭四名完成，歐聯賽事則睇起碼要入到16強，我就8強先收貨！（睇下籤運）
4）利物浦

主要球員收購：麥卡里卡打、蘇保斯拉爾
主要球員離隊：法賓奴、軒達臣、費明奴、基達、米拿、張伯倫、卡華路（外借）

利物浦今個轉會窗針對性買左兩個攻擊型中場，但點知中場走左五個人。數數隊中計埋泰亞高、艾利諾、鍾斯同巴錫迪，都只係得6.5個人（呀奴計多半個），當中只有巴錫迪係防守中場，其他都比較偏向進攻型。睇黎高普都需要同球會申請買防中先掂。成隊既正選中場有三個走左兩個，加上泰亞高年紀開始大同易傷，基本上中場中路三個人都要由頭夾過，究竟麥仔同蘇仔夾唔夾到其他中場，實在是個謎！高普係上季尾亦都開始改踢閘位內切，將呀奴收入中路幫手串連，右中堅就需要肩負起幫呀奴執屎既重任，單靠干拿迪或者高美斯，又執到幾多？前鋒線兵源就相對充裕，變化亦可以有好多，小弟預測利物浦今季睇黎要以攻代守，後面失幾多就前面入番補數。預測利物浦都係以搶四為目標，我諗都要過一兩年先可以再諗爭冠啦。