贏波上埋第三，今季完成任務（賽後簡評-曼聯對富咸）

英超今晚曲終人數，曼聯憑辛祖同般奴費南迪斯各建一功，以二比一係主場擊敗富咸，今季以75分完成賽季，排係聯賽榜第三位。呢場除左入波兩位應記一功外，亦要讚係落後一球情況下，成功撲出米勞域既十二碼既迪基亞，與及今場算有兩個助攻既費特。

《足總盃決賽，會係福仔定馬仔踢前鋒？》
今場坦克都輪換左大部分球員，華拉尼、梳爾、雲比沙加、艾歷臣同馬斯亞都先列後備。前鋒線起用華舒福踢單箭頭，般奴後上支援。福仔同馬仔踢法上都有幾大分別，呢場或者可以令坦克思考下場係戰術上點選人去run會比較好。馬仔踢最前果陣，背身護波同回後停波再分邊會較多。陣地戰佢亦經常會墮後拎波轉身，嘗試再向前同隊友做配合，但因般奴唔係擅長以插入禁區做支點回波，變相當兩者同時在陣時，兩個都會係禁區外，禁區內會冇左最前點。另外，馬仔唔係以速度快放為主，打反擊走對方身後空間對佢黎講唔係主要進攻手段。今場見到福仔踢最前時，佢反而會更多時留守禁區，以走中堅身後既空間為主，間中會係禁區內現身做「牆」同隊友做短距離one-two小組配合，所以今場見到佢有不少後腳first-touch彈俾後上既費特同般奴，令球隊今場多左中路小組入滲。有時佢又會主動走中堅身後，等中場球員放長傳俾佢哨，下半場早段果下右腳腳面彈射，正正就係佢跑卡斯美路放。福仔係打反擊上亦可以憑佢既段速走空位，但就會缺乏左係前場背身停波等隊友上既呢一類波。兩個都係可邊可前，睇下坦克下場決賽點樣用佢兩個去實行坦克既戰術。
《費特令人又愛又恨》
今場最佳球員我或者會揀費特，費特今場踢得相當積極，防守有4次攔截同1次interception；進攻方面令人跌眼鏡，今場有51次傳球，傳球成功率有82.4%，當中仲有5次keypass，外加兩次助攻（負負碌碌都入埋佢數），仲有一次盤扭。數據上都幾全面，果腳直線助攻直頭係嘆為觀止。雖然佢數據上不錯，但係球隊進攻既流暢度明顯不及艾歷臣在陣時。費特係進攻上既現身時機、傳波時間同選擇，都係仍有進步空間。下場決賽，我係比較支持先用費特搶中場做防守，但費特呢種傷敵一千自損八百既風格，好驚佢會係後場搶完波然後送番個波比人射。睇下坦克到時點諗，不過正路佢都會係揀用勝利十一人。
《總結》
最後一場聯賽以贏波結束賽季都算十分圓滿。今季成功保四，再加拎左聯賽盃冠軍已經係超額完成。下周末，足總盃決賽係溫布萊踢，睇下坦克有冇咩奇招擊敗曼城，阻止對方三冠王既美夢。