傳定射?反映球員夠唔夠成熟(賽後點評-曼聯對狼隊)

Hea談曼聯 於 14/05/2023 發表 收藏文章
曼聯主場迎戰狼隊,憑馬斯亞同加拿祖係上下半場各建一功,以二比零輕鬆擊敗狼隊。望望積分榜,狼隊已成功護級,所以今場都睇唔到佢地有幾大贏波既鬥志同決心。落後一球下,亦冇特別推快進攻節奏或係防守時多施壓俾曼聯,所以曼聯呢場踢得相當輕鬆。曼聯實力上較狼隊高,贏波鬥志同決心我覺得只係相對上比狼隊好,球員踢落既走動又唔係真係特別多,勝在把握到對方犯錯而入波。去到季尾幾場,贏波拎三分就好,唔特別期望太多。

《點評三個球員》
連迪路夫今場力壓麥佳亞,拍華拉尼打中堅,成功令迪基亞保持清白之軀。佢亦延續近期良好既狀態,成功凍結迪亞高哥斯達,令佢冇乜機會發揮,做得非常好。但曼聯需要注意係,防線面對兩邊側擊既傳中球,就算對方既傳中質量不佳,但都總會令人睇到好牙煙。不能否認係,當麥佳亞在場,係應付高空轟炸同兩邊側擊,確係比到人較大信心。坦克都需要諗諗何時起用麥隊長先係最好!

辛祖係另一個要點評既球員。今場佢既表現仍舊唔係好亮麗。射門一射一中,34腳傳送有3個keypass,但傳球成功率僅得73.5%,僅隨迪基亞排係尾二。今場作傳中次數竟然係0,同時係獲得0次盤扭;連雲比沙加同費特都各有2次盤扭。見到佢今場都好積極參與進攻,但作為翼鋒係必須多作突破,有侵略性先可以令其他隊友獲得更多空位!辛祖技術細膩,雖然唔算好快,但不嬲都有一定既盤扭能力。點樣激活佢係坦克下季必須要做既野!

最後一個就係安東尼。今場一個字可以形容佢既表現-「獨」。佢起碼至少有兩個機會可以做助攻俾隊友,從而先開記錄同擴大比數,可惜佢都係選擇自己射。雖然佢係「獨」,但都唔可以抹殺佢既功勞。3次keypass,4次盤扭,6次射門,可以見到佢今場既侵略性,同時佢都有一腳助攻俾馬斯亞入波。雖然佢暫時未能兌現佢一億既身價,但當佢不在場時,無論用福仔、辛祖還是般奴,曼聯係右路既推進都係極其困難,呢樣係數據上睇唔到既野。同時佢射門慾之強,亦令其他翼鋒球員多左內切起腳埋門。近幾場佢明顯多左突破,亦多左沉底用右腳出波,都係一大進步。點樣係射同傳之間作出正確既決定就等坦克慢慢繼續調教!

《總結》
呢樣贏得輕鬆,華拉尼復出,而加拿祖復出入波更係完美。餘下四場波都總算多番兩個球員可以變。下場作客都算上左岸既般尼茅夫,應該會係餘下聯賽最難踢既賽事(因為要作客)。睇下坦克有冇咩特別部署去踢呢場波先!

留言


請按此登錄後留言。未成為會員? 立即註冊
    快捷鍵:←
    快捷鍵:→