《坦克正選陣容選擇輪換球員》
坦克果然正選陣容起用左沙碧沙，同我預期有出入既係抽起左安東尼，將般奴費南迪斯出任右翼。同時間，達洛治回歸右閘位置，抽起雲比沙加留力下場，起用馬拿亞踢左閘。另外，辛祖亦因上場有波入，所以今場繼續正選，代替馬斯亞上陣。正選陣容改變下，踢法上亦更加進取。進攻時改踢3-2-5，馬拉仔會更多時走入中路，留達洛治係後場形成三中堅幫手出波，推前艾歷臣重點進攻左路，希望係楊格呢面埋手。沙碧沙繼續發揮佢唔痴波並以入禁區接應隊友傳送去埋門既特色，不停前場搵空位跑動，製造空間俾華舒福搵位攻門。般奴自由度較大，除左係右路走動亦會去中路甚至左路進攻。防守改踢4-3-3高位逼搶，推前艾歷臣同沙碧沙壓迫對方一對中場，福仔去壓迫一對中堅，兩翼則睇機會捕住對方二閘，有機會先幫手上去壓迫中堅。
《上半場維拉防守戰術明顯失敗；曼聯上半場最佳球員係胖虎》
上半場曼聯係完全控制戰局，控球比率係65對35。除左曼聯高位逼搶踢得極有效率外，維拉既防守戰術有問題都係原因之一。艾美利仍舊起用4-4-2陣式防守，並將防線壓前至中圈後約5碼佈防，中場則推前至中圈線前5-10碼內遮線，前線兩人則係對方三閘線開始防守。後場壓太前，前場企多過逼，令到曼聯後場可以輕鬆地利用長傳直打身後，就已經創造到唔少機會。雖然維拉成功裝到6次越位，但走甩一次就足以致命。福仔突破越位射門被擋出，仲有般奴後上執雞，咁就一球。頭廿分鐘曼聯多次憑長傳撕破對方防線，不過最後一傳都硬係差少少，先遲遲未能打開記錄。到中後段，曼聯反而少左直接扔長，想嘗試從邊路猜入維拉既心臟地帶，反而令攻勢仲迂迴左。最後，尾段都有般奴執雞，領先一球完半場。成個半場踢得最好就應該係卡斯美路，89%傳球成功率，一次射門，3次攔截，2次空中爭奪成功，仲有不少過頭長傳同大斜線轉邊，度度都見到佢。
《維拉下半場想谷；曼聯靠血肉長城頂》
維拉下半場又好似熱刺咁，壓出黎踢逼搶，諗住等曼聯兵疲先開始發力。不過今場坦克起用左沙碧沙代替安東尼，令中場既控制力有所加強。加上沙碧沙多次勤力回防，就算後場被維拉逼甩，佢都有至少兩次出現係小禁區範圍內截到個波解圍，令對手連起腳既機會都冇。另外都要讚讚連迪路夫，上半場佢都算相當清閒，但下半場面對加大壓力既屈堅斯，佢都不落下風。多次成功用頭鎚解除高空威脅，亦有一次成功護空門。果下雖然佢先被屈堅斯扭過出波，但總算將功補過，令曼聯唔駛失波。全場黎計佢都有4次解圍，1次interception，1次護空門，表現可人。
雖然維拉下半場多左進攻，但射門只得5射0中，有4次都係被曼聯球員擋出，曼聯真係用血肉長城黎頂住架咋！坦克係較後時間換入費特同安東尼，希望增加中場活力同邊線突破持球點。再係尾段換入麥佳亞同馬斯亞，轉陣三中堅頂到尾同加強前線牽制力。最後，曼聯有驚無險地一球少勝維拉。
《總結》
基於周中要再戰白禮頓，坦克選擇適當地輪換球員都做得非常正確。沙碧沙表現確實值得踢正選，相反艾歷臣自復出後，佢既表現較為一般，狀態明顯同未傷前有一段差距。我覺得下場可大膽抽起佢，等般奴踢後一格，效率可能會更佳。呢場波上半場捉到鹿但唔識脫角要鬧，只入得一球令勝果出現危機，而下半場球隊總算係跌watt情況下都算能保持控球權，陣地防守亦跟得幾足，對比上場對熱刺有所進步，呢樣需要讚！下場仲要作客遠征白禮頓，唔輸都有交代！
坦克果然正選陣容起用左沙碧沙，同我預期有出入既係抽起左安東尼，將般奴費南迪斯出任右翼。同時間，達洛治回歸右閘位置，抽起雲比沙加留力下場，起用馬拿亞踢左閘。另外，辛祖亦因上場有波入，所以今場繼續正選，代替馬斯亞上陣。正選陣容改變下，踢法上亦更加進取。進攻時改踢3-2-5，馬拉仔會更多時走入中路，留達洛治係後場形成三中堅幫手出波，推前艾歷臣重點進攻左路，希望係楊格呢面埋手。沙碧沙繼續發揮佢唔痴波並以入禁區接應隊友傳送去埋門既特色，不停前場搵空位跑動，製造空間俾華舒福搵位攻門。般奴自由度較大，除左係右路走動亦會去中路甚至左路進攻。防守改踢4-3-3高位逼搶，推前艾歷臣同沙碧沙壓迫對方一對中場，福仔去壓迫一對中堅，兩翼則睇機會捕住對方二閘，有機會先幫手上去壓迫中堅。
《上半場維拉防守戰術明顯失敗；曼聯上半場最佳球員係胖虎》
上半場曼聯係完全控制戰局，控球比率係65對35。除左曼聯高位逼搶踢得極有效率外，維拉既防守戰術有問題都係原因之一。艾美利仍舊起用4-4-2陣式防守，並將防線壓前至中圈後約5碼佈防，中場則推前至中圈線前5-10碼內遮線，前線兩人則係對方三閘線開始防守。後場壓太前，前場企多過逼，令到曼聯後場可以輕鬆地利用長傳直打身後，就已經創造到唔少機會。雖然維拉成功裝到6次越位，但走甩一次就足以致命。福仔突破越位射門被擋出，仲有般奴後上執雞，咁就一球。頭廿分鐘曼聯多次憑長傳撕破對方防線，不過最後一傳都硬係差少少，先遲遲未能打開記錄。到中後段，曼聯反而少左直接扔長，想嘗試從邊路猜入維拉既心臟地帶，反而令攻勢仲迂迴左。最後，尾段都有般奴執雞，領先一球完半場。成個半場踢得最好就應該係卡斯美路，89%傳球成功率，一次射門，3次攔截，2次空中爭奪成功，仲有不少過頭長傳同大斜線轉邊，度度都見到佢。
《維拉下半場想谷；曼聯靠血肉長城頂》
維拉下半場又好似熱刺咁，壓出黎踢逼搶，諗住等曼聯兵疲先開始發力。不過今場坦克起用左沙碧沙代替安東尼，令中場既控制力有所加強。加上沙碧沙多次勤力回防，就算後場被維拉逼甩，佢都有至少兩次出現係小禁區範圍內截到個波解圍，令對手連起腳既機會都冇。另外都要讚讚連迪路夫，上半場佢都算相當清閒，但下半場面對加大壓力既屈堅斯，佢都不落下風。多次成功用頭鎚解除高空威脅，亦有一次成功護空門。果下雖然佢先被屈堅斯扭過出波，但總算將功補過，令曼聯唔駛失波。全場黎計佢都有4次解圍，1次interception，1次護空門，表現可人。
雖然維拉下半場多左進攻，但射門只得5射0中，有4次都係被曼聯球員擋出，曼聯真係用血肉長城黎頂住架咋！坦克係較後時間換入費特同安東尼，希望增加中場活力同邊線突破持球點。再係尾段換入麥佳亞同馬斯亞，轉陣三中堅頂到尾同加強前線牽制力。最後，曼聯有驚無險地一球少勝維拉。
《總結》
基於周中要再戰白禮頓，坦克選擇適當地輪換球員都做得非常正確。沙碧沙表現確實值得踢正選，相反艾歷臣自復出後，佢既表現較為一般，狀態明顯同未傷前有一段差距。我覺得下場可大膽抽起佢，等般奴踢後一格，效率可能會更佳。呢場波上半場捉到鹿但唔識脫角要鬧，只入得一球令勝果出現危機，而下半場球隊總算係跌watt情況下都算能保持控球權，陣地防守亦跟得幾足，對比上場對熱刺有所進步，呢樣需要讚！下場仲要作客遠征白禮頓，唔輸都有交代！
請按此登錄後留言。未成為會員? 立即註冊