後生仔始終都係後生仔(足總盃賽後分析-曼聯對富咸)

Hea談曼聯 於 20/03/2023 發表 收藏文章
《先評評坦克正選陣容》
坦克係防線上起用麥佳亞打正選,華拉尼因傷無法上場係其中之一,另一個原因則係要應付對方前鋒米杜域同富咸兩邊側擊既傳中球。卡斯美路紅牌停賽下,麥湯文尼頂上屬意料中事,畢竟無論薩碧沙還是費特要去踢逗後防中都並不適合。中場麥湯既拍檔起用薩碧沙,相信係睇中佢攻守兼備既能力,後上遠射有一定能力,逗後少少間中駁腳派下牌亦得,防守亦硬朗,可以分擔少少麥湯既防守責任。安東尼病病地,所以擺辛祖踢右翼。可能有球迷會話擺辛祖踢右面冇般奴咁好,點解唔擺般奴踢右翼先?相信係同中場配置有關,如果卡斯美路在場,中路都起碼有人壓到場控制中場節奏,所以係冇卡斯美路下,般奴係唔可能改踢邊路,否則中場冇人做波就必定出事。韋賀斯繼續踢前鋒則係冇選擇焗出。華舒福狀態大勇繼續正選非常合理。

《富咸一周一賽贏體力;曼聯兵疲盡現縮住踢》
馬高施華既富咸一周一賽下體力明顯佔優,所以今場佢決定反客為主,唔係後面守株待兔,決定主動出擊係前場大踢逼搶,務求早段就要入波拎晉級主動權;坦克既曼聯三日前先飛左去西班牙踢歐霸盃,今場明顯球員體能係未能恢復,所以坦克都放棄係前場踢高位逼搶,改為踢mid-block係中場先做好防守,等機會踢反擊一劍封喉。球賽反映到雙方既比賽戰術。一開波富咸就已經好快搶到主導權,利用兩側既傳中同米生既頭鎚威脅迪基亞。曼聯球員既跑動頻率同速率都欠銳利感,「攰」完全寫左係對腳上面。一搶到波就想打反擊,但睇般奴既傳球成功率就可以見到整隊既演出係水準以下。佢半場只得56%,雖然平時佢都只係大約得75-85%,但56%係遠遠低過平時水準。雖然反擊既質量唔高,但半場都有3腳中框射門都算係咁。進攻雖然麻麻,但防守都仲交到功課。麥湯文尼表現稱職,多次係中路解到圍同攔截到;麥隊長踢呢家波真係fit到震,加上細細粒馬天尼斯都俾到米生好大壓力,令佢難發力用頭鎚攻門。半場頂得住下,零比零完半場。

《EQ比IQ更緊要;連環紅牌自己攞黎》
下半場雙方冇調動,繼續維持上半場形勢。不得不讚迪基亞,救左幾下近乎必入既波,先令到曼聯唔駛先失波。不過踢到50分鐘,米杜域憑角球係門前混戰下射入,領先一比零。坦克係58分鐘換人搏鎚,用安東尼換入麥湯文尼加強進攻。中前場位置大兜亂,般奴改踢逗後防中,將韋賀斯踢落一格拍住薩碧沙踢兩個八號位,福仔改踢箭頭,左右翼交番俾辛祖同安東尼。再次讚迪基亞係67分鐘救出米生既頭鎚攻門,要不是迪基亞…..賽事既轉捩點出現係72分鐘。曼聯一次反擊,安東尼右路快放一段橫傳俾單刀既辛祖。佢扣過門將後,係左路窄位再一cup用右腳射近柱。眼看個波必入之際,韋利安衝到門前用手拍個波落底線。主球證本身示意角球,但VAR球證今次冇放飯,重睇片段後決定叫主球證去睇電視機。馬高施華見到主球證走去睇電視就知出事,球證都未睇片就已經被佢唔知鬧左乜鬼,球證轉身毫不留情就先趕左佢離場。經翻睇片段後,確認韋利安蓄意用手阻擋必入球,改判十二碼加紅牌驅逐佢離場。其實呢下判罰可以話係毫無懸念,慢鏡見到韋利安有明顯加力用手拍走佢,紅牌加十二碼全餐係非常合理。米杜域一見到球證俾紅牌,就係佢身邊又講一大輪,仲用手明顯推撞球證,球證二話不說再出示紅牌驅逐米生離場,富咸需要九人應戰。米生把口都冇停過繼續同球證理論,連韋利安都忍唔住攬開佢叫佢走人。踢波真係EQ緊要過IQ,雖然打少個但人地都未射12碼,分分鐘龍門救到都仲有10人應戰。jer住球證最多都係黃,你咁樣推撞球證而要打少兩個人真係極度不智。好彩富咸唔駛護級,咪兩個主力咁樣停賽三場就難攪到震。整場形勢上,就算俾辛祖追番球,都係打成平手。富咸踢得仲比曼聯好,拖到入加時再多三十分鐘踢,對富咸都極為有利。韋利安咁樣用手護空門,幾乎肯定打少一個仲要搏對方射唔入,而當時仲有廿分鐘比賽時間,都係不智既行為,但如搏到對方唔入,十人應戰守廿分鐘都唔係冇可能,所以韋利安呢下都算情有可原。馬高施華同米杜域既紅牌就完全係自己攞黎,領隊更需要控制自己同球員情緒,睇慢鏡根本係冇任何理由唔駛食全餐,當時諗下點樣用10個人去頂住對方仲好啦!

《薩碧沙終於入到第一球》
攪一大輪後,最後般奴射入十二碼追成平手。兩分鐘後,梳爾左路走overlap接應辛祖靚直線傳中,薩碧沙門前虎尾腳撞入,瞬間領先二比一。薩碧沙首次為曼聯入波下,不忘向住角球旗剷個靚草慶祝。坦克較後時間換入費特守埋佢;富咸則係尾段換四個入黎,睇下有冇機會幾分鐘追番一球。補時尾段,般奴係右路接應費特傳送,一控入禁區怒射尾柱破網,正式完結比賽。最後曼聯贏三比一晉級,下場四強會對住勢頭超勁既白禮頓。

《總結》
足球往往就係可以一個決定改變成場既結果。如果韋利安唔係太衝動,如果馬高施華控制到自己,如果米杜域唔魯莽,富咸頭72分鐘既表現絕對值得晉級四強。可惜,足球係冇如果,連環紅牌打亂整隊部署,突然九人應戰兼冇左領隊指揮,陣腳大亂一失多球就玩完。雖然係咁,但都要俾個credit富咸球員今場既表現。曼聯黎講,幸好呢場係國際賽前既最後一場波,除左部分球員要出戰國際賽,其他球員(雖然人數唔多)都可以抖抖,總算捱完呢兩三個月既頻密賽程。坦克都有少少巧婦難為無米之炊,傷兵多加上兵疲,可以起用既球員同選擇都冇乜。今場最令人意想不到,係佢夠膽抽起唯一一個主力防守既麥湯,選擇用盡所有攻擊球員去搏鎚。雖然換完後進攻唔係太大起色,但亦算間接產生左一個反擊去贏呢場波。一場過既賽事有時都需要膽色同求變既決心,都俾個like坦克。國際賽期將至,曼聯最快都要四月二號先有比賽,到時再支持!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

留言


請按此登錄後留言。未成為會員? 立即註冊
    快捷鍵:←
    快捷鍵:→