呢隻狐狸好難捉（賽前分析-曼聯對李斯特城） 精選

李斯特城開季沉輪係降班區域，踢下踢下依家又有24分上番黎第13位，距離降班區域有6分差距。講人腳，中前場有達卡、華迪、班尼斯、麥迪臣；中後場有泰利文斯、尼迪迪、賀爾、法斯、卡斯泰尼，人腳實在冇理由會出現係降班區域。近五仗，李城3勝1和1負。除左近三仗全勝外，早兩場仲分別以4比2擊敗維拉同4比1擊敗熱刺，狀態全面回勇。麥迪臣同伊恩拿祖直頭係狀態火熱，呢三場波伊恩拿祖貢獻左包辦左三入球三助攻；麥迪臣則貢獻左兩入球。不過麥迪臣疑似有傷，出唔到就必定影響球隊攻力。預測羅渣士都會排4-2-3-1。丹尼華特把守最後一關。防線由左至右都會沿用近兩仗既球員：基斯迪安臣-法斯-蘇達-卡斯泰尼。中場方面，要睇下麥迪臣出唔出到。如果佢出到踢攻中的話，兩個防中相信會係文迪同賀爾；但出唔到的話，尼迪迪有機會拍文迪加強中場掃盪，推賀爾上一格踢攻中。暫時估計麥迪臣可以紮住踢。左右翼係哈菲班尼斯同迪堤支援最前既伊恩拿祖爭取入球。
預測李斯特城正選陣容（4-2-3-1）
丹尼華特
卡斯泰尼 蘇達 法斯 基斯迪安臣
文迪 賀爾
迪堤 麥迪臣 班尼斯
伊恩拿祖

曼聯係聯賽榜有46分，排係第三位，距離榜首既曼城僅有5分差距，聯賽冠軍其實仲係射程範圍之內，同時間距離第五位既熱刺有7分距離，而第六位既白禮頓打少兩場下有35分，分分鐘爭四既對手係白禮頓而唔係熱刺。分數上，第七位既富咸同後面既球隊已經同前四拉開左唔少，爭四都應該冇佢地份。曼聯千其唔好有爭冠既心，總之望住頭四既分數黎踢就得。曼聯兩日前激戰完巴塞，只得一日恢復時間，體能問題絕對會係一個影響。幸好場波都有幾個正選係冇出，都算俾左時間佢地休息。李斯特城當頭起，加上比賽風格同巴塞既主攻模式大為不同，呢場分分鐘仲難踢過巴塞。預測坦克會繼續排4-2-3-1陣式。迪基亞繼續把關。防線可以排出最強人腳，由左至右係梳爾-馬天尼斯-華拉尼-達洛治。卡斯美路仍然要停賽，麥湯文尼都仲傷緊，點擺都係冇純正既防中，薩碧沙同費特都係焗住一齊出。攻擊中場位置或會起用韋賀斯，幫手係中前場做支點停波。右翼圓規安東尼仲未出得，般奴費南迪斯改踢右翼；左翼要起用辛祖。前鋒就用fit到爆既華舒福爭取入球。
預測曼聯正選陣容（4-2-3-1）
迪基亞
達洛治 華拉尼 馬天尼斯 梳爾
薩碧沙 費特
般奴費南迪斯 韋賀斯 辛祖
華舒福