艾歷臣傷左，點算好？ 精選 推薦

雖然曼聯第四圈足總盃對雷丁輕鬆以三比一取勝，但艾歷臣係賽事中被卡路爾剷傷，賽後更要用拐仗離開球場，最後確認傷出3個月。曼聯仍然踢緊四條戰線，雲迪碧克已提早收咧，中場核心艾歷臣又抖三個月，對坦克既排兵佈陣，對曼聯既整體戰力，都會大受影響。執筆之時，冬季轉會窗仍未關閉，所以整個前設係球會未能添置任何新球員。

《艾歷臣係隊中甚至比般奴更重要》
艾歷臣今季加盟曼聯，係各項賽事暫時上陣左31場，獲得2入球9助政。曼聯整隊踢左32場比賽，入左60球。佢大約參與左整隊入波既6分1，數字上未必十分亮麗，但佢背後做既野絕不是數字上能反映。艾歷臣係場上會睇「情況」去決定佢要做D乜。當球隊係後場面對高位逼搶時，佢會同卡斯美路形成平排中場去幫波，透過first-touch或大腳轉邊去破解對方逼搶。當球隊順利運送個波到中場時，如面對較弱對手，左閘更多時形成偽三中堅，將艾歷臣推前插入對方既half-space，左翼則更多時拉邊提供闊度。就好似上場聯賽對水晶宮入果一球咁 (大約位置示意圖)
如面對防守力較強，中場線較緊密既情況下，佢則會墮後到偽左中堅位置幫手出球，利用佢既視野同高質素具穿透力傳送去尋找係對方中場線同後衛線之間現身既攻擊球員，同時亦控制住球隊進攻節奏同方向。
(大約位置示意圖)
艾歷臣踢波非常聰明亦大路，長傳短傳皆有，各項賽事傳球成功率為84.1%，對比費特同麥湯文尼既83.9%、卡斯美路既80.8%同般奴既78.9%，係隊中最高既一個中場球員。如果般奴停賽或受傷，除左可以推艾歷臣打上一格，亦可以改踢4-4-2，影響未必係想像中大；但如艾歷臣傷停，無論擺費特或麥湯文尼，甚至將般奴拉後一格，都冇可能可以令攻守兩方面取得平衡，所以小弟認為佢甚至乎比般奴更重要。
《失去艾歷臣可預見既情況》
環顧整隊中場，卡斯美路同般奴費南迪斯都係必然正選，要選擇一個球員代替艾歷臣，我地只能從費特、麥湯文尼、沙華治、明路及施丹仔選其一。後三個都係年青球員，所以都唔會考慮。費特同卡斯美路有連攜加乘；麥湯文尼防守還可以，進攻實在靠唔住。正路係會起用費特代替艾歷臣。不過，費特既傳球質素、視野同艾力臣比有一定既距離。費特亦唔擅長墮後變偽中堅幫手後場出波，具穿透力傳送打穿對方中場線亦欠奉，只能做一個純駁腳既大範圍攔截好手。要卡斯美路幫手控制節奏較埋炮亦非佢強項，佢同費特亦缺乏盤扭擺脫對方向前推進既能力。可以預期般奴會更多時間墮後至中場，幫手係中場運個波上前，就會變左冇人可以係final third做波入禁區。冇左般奴係前場周圍幫波，前場會變得頗為孤立無援，要單打獨鬥。呢個相信係可預見既情況（希望唔好講中）直接影響整隊進攻效率。雖然進攻方面肯定會差，但多左費特既攔截逼搶，亦會令球隊既防守力提升。
《可以點解決呢？》
小弟相信坦克必然起用卡費組合踢正選，但若然俾我講中前場進攻乏力時，我覺得可以大膽嘗試將般奴費南迪斯踢後一格，將安東尼由右翼改踢攻擊中場，右翼改用柏利斯迪。
如果有睇對雷丁場波，賽事最後15分鐘，坦克係前場起用三隻翼，左翼係加拿祖；右翼係柏利斯迪；而安東尼則改踢進攻中場。韋賀斯需要高波，柏利仔順邊順足，亦有一定既沉底傳中能力，可以加強到邊路傳中球既數量（高唔高質就要睇）安東尼居中後，佢踢法比般奴更具侵略性。佢除左企位上較近禁區，可以唔駛係邊路推一段先作出射門，佢亦擅長搵禁區內既支點隊友做小組配合，利用節奏既轉換，快速打入對方禁區。安東尼亦算係一個強力停球點，可以係前場幫手停波解除對方高位逼搶。般奴則比較大路，以長距傳傳送為主，缺乏突破力難以好似安東尼可以係禁區附近擺幾下再扮射再推。般奴踢後一格令到中後場有穿透力傳送，打穿對方中場線既壓迫，控制進攻節奏亦係佢強項。此舉動應該有助曼聯係缺乏艾歷臣下解決進攻既問題。不過，防守時既問題則會多左。球隊踢高位逼搶既效果或者會更好，因為前場仲多個快馬柏利仔去逼；但當去到陣地戰時，般奴跑動係多係大範圍，但佢防守意識較弱，亦容易被對方扭過；安東尼係中路亦唔會做到太多既攔截遮線，變左卡斯美路既重要性就更大，兼顧既野就更多。係呢個陣容下，球隊需要更有耐性去進攻，以保持控球為先，核心由般奴變安東尼，等佢持球後先再嘗試打入對方心臟，避免太多容易失控球既搏波，從而減低中後場被打反擊既次數。防守要以高位逼搶為主，務求盡快拎到控球權，避免進入陣地戰，否則球隊防守陣形容易被拉散，失波機會大大提高。
《總結》
小弟早早已提過坦克必需諗定plan b去解決缺少艾歷臣衍生既問題。黎緊對水晶宮將會係第一場真正既考驗，又睇下坦克係用人上還是戰術部署上有冇咩特別，令到球隊係攻守兩方面都保持到水準。