溫布萊,我地黎啦(聯賽盃四強賽後分析-諾定咸森林對曼聯)

Hea談曼聯 於 27/01/2023 發表 收藏文章
聯賽盃四強要踢兩回合,首回合曼聯先作客挑戰諾定咸森林。坦克排出強陣迎戰,排出近乎勝利十一人陣容,只抽起左華拉尼同梳爾,改用連迪路夫同馬拿斯亞,擔任中堅同左閘位置。馬天尼斯同雲比沙加繼續踢。中場鐵三角卡斯美路、艾歷臣同般奴費南迪斯冇得抖,前線起用華舒福、安東尼同韋賀斯爭取入球。上半場曼聯以二比零領先;下半場再入一球,以三比零擊敗對手,下場帶住三球優勢番奧脫福,都可以話九成入決賽!

《一場波睇到榜首同中下游球隊既分野》
曼聯經歷緊非常頻密既賽程,上場面對抖足一周既阿仙奴,只踢左半場隊波既體能已經到頂,最後捱足20分鐘都係守唔到。曼聯上半場有氣有力既情況下,踢前場逼搶戰術都只係可以拎到49%控球,換句話說,果場既戰術係唔成功。反觀今場波,坦克都係同樣踢法,但上半場曼聯控球率係高達68-70%,基本上係前面一逼,對方就踢個波俾你攻。上半場接近圍攻局面下,成功爭取到兩個入球番更衣室。點樣睇得出阿仙奴同森林既分野?淨係留意艾歷臣就得。對阿仙奴果場,艾歷臣踢完上半場已經謝晒皮,下半場體能同速率都完全跟唔上對方;今場佢踢到70分鐘都仲有力跑半場幫隊友overlap,就見到佢所受既壓力同需要既體能消耗有幾少。森林無論係前場逼搶、控球組織、轉守為攻,都同阿仙奴有明顯差距(差兩班波),所以曼聯踢得算輕鬆,去到末段球員都仲可以繼續跑。

《韋賀斯既能力係呢場開始展現到出黎》
韋賀斯不經不覺已經係第三場正選上陣,頭兩場波都見到佢係前場既勤力逼搶,幫手係前場開路式走位,係幫助到球隊,但其他球員同佢互相間既呼應係較少,默契明顯缺乏。去到呢一場,終於有所改變。佢進攻參與度多左好多,除左見到球隊兩側多左傳中去搵韋賀斯頂,隊友亦多左嘗試係中路搵佢打入去。上半場仲有兩個極靚組織,持球者先交俾係禁區頂現身作支點既韋賀斯,再由佢彈俾般奴費南迪斯,再交俾後上入楔既球員。曼聯第二個入波亦因韋賀斯係禁區頂牽制左兩名中堅,先令安東尼係禁區頂冇人防守而放到冷箭。佢進攻既作用非常明顯,亦非常適合坦克防守體系,相信佢既入球會陸續有來。不過,小弟認為佢對強隊既表現會大打折扣,佢都係較適合做plan b或對中下游球隊出黎虐菜(希望睇錯)

《分析下三個入波》
第一個入波除左要讚福仔憑個人能力怒推半場一下扭過兩人入大位射近柱靚之外,亦要讚卡斯美路係後場現到一個靚位,接應馬天尼斯傳送,轉身再傳俾福仔解除逼搶。森林係前場逼搶方面亦有問題,防守溝通出現問題,令到福仔企係條邊度空晒。第二個入波則要讚韋賀斯,見安東尼作出射門下有跟進,從而可以係門口執隻死雞射入空門。呢球亦要讚安東尼,先係右路接應迪基亞長傳地波,幫球隊係中場停到波,傳完俾卡斯美路後,再由半場直跑禁區頂follow隊友,先有佢既射門被擋出再補中既畫面出現。第三球則係球隊既中前場逼搶成功,柏利斯迪靚斜走中路入楔。個波輾轉去到伊蘭加腳下再「了」俾後上般奴射入。當時中前場已經換左伊蘭加、費特、加拿祖同柏利斯迪,所以球隊中前場活力十足,可以繼續壓逼對手先令對方犯錯,可見換人保持球隊活力係非常重要。

《總結》
三球在手,下場番主場再踢,加上實力有距離下,相信溫布萊見既機會非常大。坦克都可以準備定對策迎戰紐卡素或修咸頓。韋賀斯既融入,加上戰術少量調整,絕對有利曼聯下半季既挑戰。睇下冬季轉會窗完結前,球隊有冇機會係中場補強,解決中場唔夠人用既問題。另外,柏利斯迪呢廿分鐘既表現不俗,一樣特點令佢有條件留隊,就係佢落場冇耐既一腳傳中球。右翼右足沉底出波,韋賀斯絕對需要呢類供應。柏利仔亦改變到右路進攻模式,畢竟安東尼係以內切射門為主,甚少沉底用生蟲腳出波。伊蘭加則淪為球隊第三前鋒,借走或賣走對佢同球會都係雙贏局面。周末足總盃對雷丁,睇下坦克會唔會俾主力抖抖。曼聯,繼續加油!

留言


請按此登錄後留言。未成為會員? 立即註冊
    快捷鍵:←
    快捷鍵:→