光頭佬既對決-Round 2 (賽前預測-曼聯對曼城)

Hea談曼聯 於 13/01/2023 發表 收藏文章
曼城係聯賽榜有39分,暫時落後榜首阿仙奴五分;曼聯則有35分排係第四位,同榜首有9分距離,領先第五既熱刺兩分,並少賽一場;亦僅僅輸得失球下排係紐卡素後面,但少賽一場。從聯賽榜睇,第一名既阿記有少少拉開左同曼城差距,而第二至第五位既球隊亦有少少跑出。兩隊近年既對碰都比較一面倒,曼城贏多輸少。首循環更以六比三大炒曼聯,坦克上左寶貴既一課。又睇下次循環番到曼聯主場,坦克究竟有冇魔法贏番曼城一次。

先講講曼城,近五場賽事係三勝一和一負,贏列斯聯屬正常,兩勝哀兵車路士都
合理,但又被愛華頓逼和一比一。上場聯賽盃起用大部份副選,留力對曼聯既賽事,結果輸波出局,認真失威。龍門艾達臣、迪布尼、夏蘭特同防中洛迪都先收起,相信呢四人今場都必定會踢正選。只計聯賽賽事,哥帥近三場都選擇用左尼敦艾基同史東斯做膽,艾簡治則係因對車路士試陣,半場後備入替,睇黎佢地三個都會正選上陣。尼敦艾基可閘可中堅,亦係佢近期可以踢正選既原因。防守時變番4後防踢左閘;進攻時係後場形成三中堅負責出波。右閘小將利維斯近幾場愈踢愈好,活力夠意識好,打右閘既佢進攻時內切中路幫手組織,有時更會持球壓入禁區。哥帥聯賽盃卻用上簡些路同卡爾獲加踢正選,反而冇利維斯份,大膽估計哥帥有可能用佢踢正選右閘。中場除左迪布尼同洛迪,相信賓拿度施華會係最後一塊拼圖。左右翼會係馬列斯同格利殊支援前鋒夏蘭特爭取入球。

預測曼城正選陣容(4-3-3)
艾達臣
利維斯 艾簡治 史東斯 尼敦艾基
迪布尼 洛迪 賓拿度施華
馬列斯 夏蘭特 格利殊

曼聯近況非常出色,世界盃後所有賽事係六戰全勝,入左15球僅失1球。不過呢六場賽事都屬中下游球隊,般尼同查爾頓更係英冠同英甲球隊,考驗其實唔太大,所以又唔好過份興奮,但從比賽實況、坦克既輪換、球員間既磨合程度,都見到曼聯係步入正軌,除左有隊形外,亦見到球員知道要做乜,隊友失位要點補,防守陣形點企,轉守為攻點跑,開始有跡可尋。睇番首循環,坦克想用4-2-3-1係前場高位壓逼對手,令曼城可以輕鬆打穿中場,利用曼聯後場空間,透過邊路一對一去突破製造機會。雖然當時既正選中場仍未係卡斯美路,但踢出黎既戰術毋寧置疑係找死,兩閘用上單防能力較弱既馬拿斯亞同達洛治更係一大敗筆。講番今場,論球員狀態,曼聯絕對有力一戰,坦克究竟如何部署防守模式同埋如何係攻守轉換發揮出最大效果會係曼聯既勝負關鍵。

預測曼城會用閘位內切中路,推前兩名邊中場入half-space發揮迪布尼同施華仔既進攻能力。值得留意既係迪布尼同夏蘭特連線,迪布尼善於係右路45度角做early-crossing去搵入楔弱邊中堅身後空間既夏蘭特。除左邊中場要快速防守迪布尼外,右中堅亦要睇住夏蘭特走身後,而右閘亦需要隨時縮入中間協防夏蘭特。另外,高位逼搶要快、狠、準,齊人先好逼,唔好出現前場逼,中後場冇壓前跟進,令曼城可以係中場透過短傳轉方向破逼搶。一被人打穿就要盡快利用犯規整停對手(卡斯美路呢招耍家),避免後場有太多空間俾人推進。預測坦克排出4-2-3-1陣式,龍門都係迪基亞。達洛治受傷,雲比沙加近期有好表現,唯一要注意係佢今場需要預判幾時要縮入中間多少少,去幫華拉尼協防夏蘭特,同埋要注意佢既位置感應付對方踢對角長傳。左閘梳爾狀態好,靠佢單防馬列斯問題不大。華拉尼休息足夠;馬天尼斯上場亦特登出佢谷谷狀態,相信都係佢兩個出任左右中堅。逗後防中會係卡斯美路,靠佢既經驗指揮球隊防守,亦靠佢去策動轉守為攻。艾歷臣應會拍住卡斯美路踢防中(個人則想用費特幫手搶中場),靠佢係中場控的節奏同交具穿透力傳送,打穿對方既中前場逼搶。左右翼當然係華舒福同安東尼。 福仔狀態如有神助,已經連續六場比賽有入波,上場後備入替客串中鋒都入兩球,今場要贏就非常睇佢發揮;安東尼近幾場狀態都沉,上場又係特登出佢谷一谷,佢亦入番球招牌菜,拎番唔少信心。攻擊中場般奴費南迪斯既重要性唔駛多講,繼續指揮球隊進攻,支援前鋒馬斯亞攻堅。

預測曼聯正選陣容(4-2-3-1)
迪基亞
雲比沙加 華拉尼 馬天尼斯 梳爾
卡斯美路 艾歷臣
安東尼 般奴費南迪斯 華舒福
馬斯亞

標籤: 曼聯  曼城  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→