修夫基，時也命也（賽後報告-英格蘭對法國） 精選

英格蘭係世界盃八強遇上法國，賽前被睇低一線下，我覺得算踢出上佳既表現下，以二比一不敵對手，八強止步。上半場，法國憑杜曹文尼係禁區外既一下冷箭，妙射死角入網。入個下固然係靚，但由後場搶波果下，法國後衛明顯從後撞低薩卡先開始打反擊，而球證同VAR視若無睹。一球就話睇唔到，第二下簡尼係禁區內被烏柏麥簡奴從後踢中腳跌低，球證同VAR亦冇任何表示。上半場法國多次係禁區附近範圍既犯規，球證好似完全睇唔到。小弟甚少以黑哨黎評論球證，但上半場球證偏幫既表現確實難以令人信服。英格蘭球員卻冇因此意志消沉，繼續沉著應戰。下半場終於有回報，憑簡尼既12碼追平。可惜，基奧特係78分鐘把握到一個機會頂入再次領先。英格蘭係84分鐘再次獲得12碼，簡尼背負住極大壓力下射失。最後法國以二比一險勝英格蘭晉級。
修夫基今場冇改變陣式，照舊起用4-3-3陣式，用軒達臣踢右中場中，加埋卡爾獲加同薩卡去防守對方左翼麥巴比，迪勤懷斯則係附近包抄。整場係防守麥巴比下做得相當成功，除左卡爾獲加既單防要讚外，軒達臣既夾擊亦做得相當徹底。見到對方既烏柏麥簡奴狀態不佳，球隊亦明顯集中右路進攻。左路既進攻係虛，透過麥佳亞同懷斯既大轉向等薩卡同簡尼係右路製造左唔少機會。去到賽事末段，修夫基用史達寧同蒙特入替薩卡同軒達臣，嘗試換人加強攻力。換翼鋒嘗試令對手既閘位要重新適應進攻者既節奏，亦唔可以話錯；蒙特入替後搏到一個12碼，亦算係交到功課。當然果個12碼係靴蘭迪斯送既，而呢一個波算唔算DOGSO就好睇你點睇。我嘗試從球證角度睇係呢個高波斬埋去未算係「明顯入球機會」，蒙特未算控制到皮球，而靴南迪斯只係魯莽犯規，所以就判12碼加黃牌。當然另外睇法係你唔撞我就頂到波，但情況睇落係唔撞你，個波都去唔到你度。我認為呢下有相確餘地，黃牌又唔可以話球證錯晒。結果係簡尼第二射射失，咁就冇加時。最後階級換入華舒福同格利殊搏鎚。福仔最後一擊既罰球稍稍高出後，英格蘭亦宣布緣盡八強，唯有四年後再黎過。
呢場波英格蘭既表現比法國優勝，英格蘭係值得晉級。法國雖然有一兩下極具威脅埋門，但整場能製造到既次數唔多。反觀英格蘭既控球時間同埋門中框次數都比法國多。控制戰局下，但都未能將多次機會轉化成入球，可謂時也命也。修夫基兩年前帶領英格蘭係歐國盃冠軍爭奪戰下輸左比意大利，今年世界盃八強遇上法國止步。佢以「守」為先既風格，始終都未能為英格蘭帶黎任何冠軍。我成日都認為呢類淘汰賽好講命水，睇黎修夫基條命水同英格蘭就係唔多夾。我唔會否定佢果套，畢竟冇人知如改打進攻足球既英格蘭今屆會行到幾遠，但可以講既係修夫基都係時候落台，等其他人用第二套帶英格蘭去試下拎唔拎到冠軍。

======================================
有興趣睇分析片既朋友都可以follow 以下 Instagramhttps://www.instagram.com/hea.talk.manu/