港人情意結之英法大戰（賽前分析-英格蘭對法國）

世界盃進行得如火如荼，不經不覺已經殺到入八強。較受港人注目既英格蘭將會係八強遇上今屆既熱門法國，比賽時間係香港12月10號凌晨3點。雖然時間比較西，但港人情意結下，應該都有好多球迷會捱夜睇呢場「西」波。

先講法國，雖然今屆缺少左普巴、簡迪同賓施馬幾名大將，但仍然無損佢地整隊既實力。基奧特、基沙文、杜曹文尼、拉比奧特、華拉尼同烏柏麥簡奴肩負起整條中軸。缺少普巴既創造，迪斯卓普改以麥巴比為核心，改以兩翼側擊傳中為殺著，麥巴比既速度、基沙文既游走串連，加上基奧特係禁區既統治力，令法國隊既進攻具有相當大既破壞力。分組賽兩勝一和以六分順利首名晉級十六強。十六強遇上波蘭，係實力上有明顯分野情況下，以三比一擊敗對手晉級。除左係分組賽抽起主力以後備球員上陣對突尼西亞係入唔到波外，其餘三場都入兩球以上，進攻力毋庸置疑，但每一場都有失波都係一個警號。法國今場冇球員需要停賽，可以盡遣最強陣容迎戰英格蘭。預測迪斯卓曹繼續排出4-2-3-1。龍門羅列斯繼續把守最後一關。防線由左至右會係靴蘭迪斯-烏柏麥簡奴-華拉尼-觀迪。杜曹文尼拍拉比奧特踢防中。左右翼係麥巴比同丹比利。攻擊中場基沙文支援狀態火熱既基奧特攻堅。

預測法國正選陣容（4-2-3-1）
羅列斯
觀迪 華拉尼 烏柏麥簡奴 靴蘭迪斯
杜曹文尼 拉比奧特
丹比利 基沙文 麥巴比
基奧特

英格蘭則係分組賽輕輕鬆鬆以不敗成績首名出線十六強。十六強再輕描淡寫以三比零擊敗塞內加爾，成功晉身八強。分組賽最啃既對手係美國，而塞內加爾亦唔太比到壓力英格蘭，所以英格蘭係八強前係冇遇過任何強隊。一黎就要打上屆冠軍法國，自然就被睇低一線。睇低還睇低，做underdog反而岩晒修夫基河車。要英格蘭擺大個頭去攻人反而經常老鼠拉龜，要佢縮住踢打防反，靠簡尼既墮後較炮，華舒福同薩卡既衝刺，加埋比寧咸既後上，絕對會比要陣地戰強攻對手為佳。不過要晉級都係要守到唔失波先得，面對狀態火熱既基奧特有麥佳亞同佢抗衡，而面對速度快過小明既麥巴比，相信修夫基會改踢三中堅加兩隻翼衛去招呼佢。預測修夫基會改踢3-4-3陣式。龍門繼續係碧福特。三中堅由左至右係卡爾獲加-史東斯-麥佳亞。左右翼衛會係梳爾同查比亞。一對防中起用懷斯同比寧咸。左翼華舒福聯同右翼薩卡支援前鋒哈利簡尼打反擊爭取入球。
預測英格蘭正選陣容（3-4-3）
碧福特
卡爾獲加 史東斯 麥佳亞
查比亞 懷斯 比寧咸 梳爾
薩卡 哈利簡尼 華舒福

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/