卡斯美路 : 麥湯,我餐飯抵請啦(賽後分析-車路士對曼聯)

Hea談曼聯 於 23/10/2022 發表 收藏文章
樸達排出3-4-2-1陣式。門將基柏。三人防線左至右係古古尼亞-泰亞高施華-查洛巴。佐真奴拍龍虎切踢防中,捷維爾同艾斯比列古達打左右翼衛。左右攻擊中場則係史達寧同蒙特支援前鋒奧巴美羊進攻。

坦克排出4-2-3-1陣式。門將迪基亞。防線左至右係梳爾-馬天尼斯-華拉尼-達洛治。卡斯美路拍艾歷臣出任防中。左右翼係辛祖同安東尼。攻擊中場般奴費南迪斯支援華舒福攻堅。

《坦克贏頭35分鐘但入唔到波都冇用;樸達一變就搶贏中場》
坦克延續上場對熱刺三中堅既防守模式,中場推前艾歷臣拍般奴負責壓迫佐舒服同龍虎切,閘位球員則防守翼衛,卡斯美路則改為負責塞閘位同中堅間既區域同埋一對中場壓前既身後空間,嘗試斷開車路士後場同蒙特與及史達寧既連接。整隊冇好似對熱刺咁瘋狂壓迫,先以高位遮線封阻傳球路線,再由福仔帶動施壓俾對方中堅及龍門。上半場頭35分鐘多次成功逼基柏踢長波俾邊路及大腳前踢,輕鬆搶番控球權主導球賽。艾歷臣既復出令曼聯進攻更有條理,般奴亦唔需要後移拎波,多次係對方後場拎波身再派牌。要不是福仔既半單刀被撲出,安東尼推順起私家右Q唔中目標,基柏仲有一兩次撲救,曼聯理應先開記錄。

樸達可能有睇曼聯對熱刺場波,仍舊安排三中堅,但蒙特同史達寧都需要回後協防,令到中場保持四人,邊路亦有翼衛同翼鋒防守令曼聯難再似上場主打overload邊路再快速轉邊製造射門機會。前場亦甚少係高位進行逼搶,改以先係對方三閘線遮線,嘗試令曼聯係中後場難以組織。因曼聯有三名中場,而車仔只得佐舒服同龍虎切,中場被overload下,曼聯35分鐘內多次透過中路搓傳打穿中場線,再由邊路推進前壓。兩翼縮後協防令到奧巴美羊缺乏支援,加上要接應長傳高波亦非奧巴美羊擅長既特點,變成曼聯圍住踢,車仔難以打到反擊。樸達睇到35分鐘都係唔等到完半場,36分鐘就用高華錫入替古古尼亞,改踢4-4-2菱形中場,捷維爾同艾斯變閘,查洛巴拍施華踢中堅。佐舒服逗住踢,前面一左一右係高華錫同龍虎切。蒙特踢攻中,前場兩個係奧巴美羊同史達寧。後場改踢4人防線,令到曼聯球員係高位逼搶失去對位目標;增加中場人場優勢,令後場傳球有更多選擇。上半場尾段呢10分鐘,車仔搶番主導權,更產生幾下黃金機會。幸好奧巴美羊控幾腳都衰,射門又唔中目標,咪迪基亞可能都要飛下。
上半場,零比零,以和為貴。

《坦克見你變我又變;樸達見均勢就踢住先》
下半場出番黎,雙方都冇即時調動。坦克卻有做戰術調整。佢見車仔改打菱形中場,就改踢番雙防中,係高位逼番車仔左右中場中,般奴就負責招呼佐舒服。福仔逼一對中堅揀用波方向,強邊翼守閘位,弱邊翼則準備移入中路壓迫弱邊中堅。車仔前鋒或者蒙特拉邊就由閘位球員防守。知道邊個守邊個,就冇再好似上半場尾段咁俾人拎番個勢,大家踢落就變成均勢,鬥搶中場但大家都爭唔贏,雙方都難創造機會埋門。踢到52分鐘,坦克先用費特換入辛祖,拉般奴踢左翼,艾歷臣上前一格。除左因為辛祖表現較沉,想用般奴拍梳爾睇下咩效果,亦想推前艾歷臣改變下進攻模式。52分鐘,坦克被逼用連迪路夫入替受傷既華拉尼。華拉尼一度企唔到起身,睇佢情況認真不妙,仲要淚灑球場,除左法國有影響,對曼聯影響仲大。

《麥湯文尼又瀨野;卡斯美路終於開齋》
坦克變完之後,效果一般。樸達就係74分鐘用佩列錫入替今仗表現差既奧巴美羊,再係79分鐘用卓古麥卡同波也入替史達寧同龍虎切,位換位既調動。除左增強前場活力,亦都想利用波也既身材優勢去恰恰屠夫。坦克見都80分鐘,大家都冇乜板斧贏就不如守到尾拎一分,用伊蘭加同麥湯文尼換入艾歷臣同福仔,推般奴打最前,伊蘭加打左,攻中用麥湯,諗住中場防守三人組可以頂到尾。87分鐘,車仔獲得一次角球攻勢。麥湯極愚蠢地攬跌波也,球證直指十二碼。呢下真係VAR都唔駛check,完全係麥湯腦筋上短路犯錯。迪基亞捉錯路下,被佐真奴小跳步射入,領先一比零。睇睇曼聯後備席,要換一個似樣少少既攻擊球員係冇既。曼迷都諗住會三分全失,誰不知去到補時階段,卡斯美路係尾柱接應梳爾傳中,頂破基柏既十指關,終於入到代表曼聯既第一球,亦協助曼聯一比一逼和車路士。

《總結》
坦克早著先機但把握唔到入波機會;樸達應變之快令到車路士挽回劣勢,更加有幾下可以先入波。坦克半場調整,亦令戰局轉趨平淡,但係末段既換人卻有點兒太保守,你總唔能一心求守就連前場最善長打反擊既福仔都抽起,咪好似今場末段突然失波,你前場都已經抽起晒攻擊球員,後備又得番青年軍,想追番就難了。麥湯今場肯定要請卡斯美路食飯啦,如果唔係佢,麥湯又做輸波罪人。兩隊都踢得謹慎,都係以唔想輸為前題下,呢場大戰以1:1完結都係合理戰果。題外話都要插插C朗。麻煩你睇下球隊傷兵名單,點會冇機會出場。球王都係球員,都係要聽領隊講,希望佢同坦克既對話能令佢改變心態。個人傾向罰完佢後繼續係杯賽用佢踢前,而聯賽則可以睇情況睇對手黎安排踢正選,畢竟玻璃馬仔要復出都有一段時間。周中再對舒列夫,呢場又係機會輪換下球員啦!

留言


請按此登錄後留言。未成為會員? 立即註冊
    快捷鍵:←
    快捷鍵:→