慘不忍睹系列又多一場(賽後分析-賓福特對曼聯)

Hea談曼聯 於 14/08/2022 發表 收藏文章
法蘭克排出5-3-2陣式。龍門拉耶。防線左至右係歷高亨利-美爾-贊臣-羅亞斯利夫-希基。中場線左至右係馬泰斯贊臣-洛加特-達斯華。前線孖寶係安保姆拍東尼。

坦克排出4-3-3陣式。龍門迪基亞。防線由左至右係梳爾-馬天尼斯-麥佳亞-達洛治。艾歷臣改踢逗後防中,左右中場中係般奴費南迪斯同費特。左右翼係辛祖同華舒福支援復任正選既大師兄C朗拿度。

坦克排陣明顯未有了解對方踢法
賓福特上季同今季人腳變動不大,新加盟具實力既丹斯加特未有上場,戰術同陣式同上季係完全一樣,進攻靠東尼係前線停波,快馬安保姆游走前場。中場硬橋硬馬唔花巧,後場亦不需太多地面組織,有波就扔上去俾前面東尼去撞去俾安保姆哨。坦克照擺馬天尼斯踢中堅,完全俾法蘭克針對住黎踢。賓福特後場不停放高波等東尼做二傳,明恰馬天尼斯身高。安保姆就恰麥佳亞既轉身回追速度。坦克完全冇了解過對方踢法,結果馬天尼斯面對高空轟炸可謂一籌莫展,輸第三球就直頭俾美爾壓住係門口撞入就係今場既寫照。雖然呢個弱點尤其明顯,但都仲有麥隊長同梳爾幫手包波,東尼既頭鎚二傳功夫又唔係頂級如真高拿,曼聯都未算死係呢度。死因最大既係中場費特。坦克經歷上場對白禮頓出左麥費組合,令到球隊係中後場組織唔到後,今場改用艾歷臣去逗,嘗試令中後場有具級數球員幫手梳理,但出左兩名技術型中場就要預左佢地係搶波同防守力都較為一般,需要一名掃蕩力跑動力強既中場去彌補。費特麥湯文尼二選一下,竟然起用身型矮小既費特就出晒事。賓福特條中場係冇playmaker,進攻甚少地面,靠費特同人係空中爭奪,又要同大舊佬左撞右撞,完全係玩死左費特之餘,更令中場打少一個人,所以我本身預期麥湯文尼會係正選名單之中,而佢下半場出黎之後,曼聯明顯係中場爭奪同應付對面高空波都多左一點去解圍令後防冇太受壓。

法蘭克準備充足針對艾歷臣
法蘭克選擇係高位進行壓迫,兩名前鋒去防守一對中堅,三名中場則各自招呼左右二閘同艾歷臣。佢深明坦克係依靠後場4人連同一個逗後防中加埋龍門去由後場開始組織,所以決定係前場以man-mark形式係高位施壓。艾歷臣係好好波,但唔係以背住對方拎波突破或者靠保護皮球吸引防守既技巧為主(所以要收購迪莊)。佢係需要持球面向前場去較炮去組織,所以當佢出現係逗後防中位多數會選擇即刻彈俾兩閘或回後,反而麥湯出左黎之後有幾下轉身擺脫對方再向前就即刻創造到攻勢。法蘭克用人釘人下就令到佢冇傳球選擇,自身亦缺乏轉身突破第一重防守既能力,多次成功係曼聯後方逼搶成功再去創造攻勢。失第二球正正就係成功逼甩艾歷臣再去入波,而失波責任則全在迪基亞而非艾歷臣。迪基亞見到對方球員同艾歷臣既距離係應該大腳踢走而非交個波俾佢去處理,但絕對要讚係賓福特既逼搶具效率及針對性。不過就算迪基亞大腳踢走,個波去到中場亦只得C朗有能力頂贏外,得費特及般奴係冇條件可以停到個波或頂贏對方(多個麥湯就會好少少),個波又係跌番係曼聯中後場,亦係其中一個因素坦克強調用地面係後場組織。

分析埋其他失波既主因
第一個失波源自於係右路自己禁區線既界外球,達洛特扔俾由前場現番身落黎後場三閘線既C朗,俾對手搶下腳下球,由馬泰斯贊臣橫傳俾達施華「軟」射,迪基亞牛油手漏左個波入網。C朗拿度要負上少少責任,唔講佢係咪被侵犯,亦唔係話因佢被人搶走個波而要負責,而係點解你出現係果度拎波。身為進攻既最前點,而個界外球係自己禁區線,你走到落黎三閘線拎波,就等於叫人地條防線可以壓過中場線,去壓縮你扔界外球既空間。隊中有三個中場加埋單邊翼去支援個界外球,仲未計一個中堅,你仲落埋去咁邊個係前面?就算你停到個波都冇條件可以轉到出黎,點解唔留係前點牽制對方防線,等其他隊友靠拉扯接應。費特正正見到你落左黎佢就跑左上去,跟住你一斷,個波就去左費特離開左既空間俾人射入。迪基亞就唔駛再鞭屍啦,佢亦都攬左上身,希望唔好因為呢球同第二球而對佢自信心打擊太大(下場對利啊);第二球則已在上文分析;第三球除左小馬既身材問題外,防守死球既部署就由上季到依家都仍然未有太大改善。呢個則係全隊加埋死球教練既問題;失第四球既責任,會係梳爾比較大。當全隊圍攻對方,突然係右路失控球權,佢應該要有警覺性先衝番後場去準備cover小馬。而從慢鏡得知,一失控球權,佢係未有立刻向後移亦冇擦覺隔離既安保姆已經開左6波向前衝。到佢再加速已經比安保姆慢左幾下,而安保姆速度亦比佢快,就眼白白睇住佢食左自己身位再輕鬆射入。

坦克嘗試修正但最後都無功而還
下半場坦克已經即刻換走馬天尼斯、梳爾同費特,換入華拉尼、馬拉西亞同麥湯文尼。麥湯文尼既作用已多次提及,下半場出黎明顯改善左中場爭奪能力。華拉尼既入替就係加強番後場制空力,而點解唔換走麥隊長?高波俾人轟,你用華拉尼拍小馬,小馬咪一樣被針對;而點解唔推小馬上一格?坦克想保留般奴同艾歷臣去控制中場,如推小馬上一格,除左驚小馬既work-rate外,就係同費特一樣既身材問題。馬拉西亞則嘗試加強左路攻擊力,而佢既個人突破力係可以幫到後場破逼搶,所以我本身係預計佢會打正選,最後又係梳爾踢先就都係要換。60分鐘換入辛祖,而雲迪碧克要去到87分鐘先換就又係諗唔明。般奴成場都碌碌無為,艾歷臣就踢到乾塘先換,但都87分鐘俾艾歷臣踢埋都唔差得遠,點解唔一早換般奴走靠雲迪碧克既走位創造空間?最後,下半場表現有所改善下,雖然多左攻勢,但都未能破蛋就只能以零比四大敗一場。

總結
坦克今場都要孭飛啦,出費特導致失中場,而迪基亞就難辭其咎。球隊後場進攻組織乏力,就算上到前場都見唔到熱身賽既走位跑動。當隊內有兩名技術型中場要持球,而辛祖福仔都係要上腳時,前面再出埋C朗就令到個個都企係度踢波。C朗唔會係禁區內現出黎打one-two,佢只會係入面捕位等傳中等機會,或者現身出黎駁腳轉下方向,係打唔到坦克果套快速入楔。坦克你一係就改變進攻戰術踢兩翼側擊,一係就索性抽起佢吧啦。般奴呢兩場亦都冇表現,上季已經多次講8號位唔岩佢踢,亦唔見得佢可以適應到,下場俾契仔雲迪碧克踢可能更有驚喜。呢場錯漏百出,下場仲要對利物浦,好大機會破紀錄獲得開季三連敗兼冇人入到波。睇下吸收呢兩場教訓後,下場對利佢會點用人。「相信過程」係好重要,俾時間新教頭調教吧!
======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/
標籤: 曼聯  賓福特  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→