今場關蘭sir事啦掛(賽後分析-白禮頓對曼聯)

Hea談曼聯 於 08/05/2022 發表 收藏文章
波達排出4-4-2陣式。龍門山齊士。防線由左至右係古古尼亞-鄧克-費文-馬治。中場線由左至右係杜沙特-比蘇馬-沙斯度-戈斯。攻擊中場麥卡里士打支援韋碧克攻堅。

蘭sir沿用上場陣容。龍門迪基亞。防線由左至右係泰利斯-華拉尼-連迪路夫-達洛治。馬迪拍麥湯文尼出任一對防中。左右翼係般奴費南迪斯同伊蘭加。攻擊中場馬達支援C朗拿度。

白禮頓攻守有度針對曼聯二閘瘋狂側擊
波達陣就咁擺,但踢落係非常有心思。進攻時,似係4人防線,但馬治係推到極上當翼衛咁踢,將戈斯縮入中路同麥卡里士打踢兩個攻擊中場。古古尼亞則係左閘位置同杜沙特主打左路側擊。進攻只留鄧克、費文呢對中堅同埋一對防中防止曼聯打反擊。戈斯則經常去右路聯同馬治強打泰利斯。兩人極具默契,多次以onetwo、overlap、underlap甚至連後腳都出埋去進攻防守力差既泰利斯。麥卡里士打則同韋碧克係中路牽制對方一對防中同中堅接應傳中。防守時則整隊前場高壓逼搶,波到人到令曼聯好難經地波猜番出黎。曼聯中場缺少一個能護波停波,吸引防守既球員,簡單黎講即係「普巴」,只得馬迪,加上後防中堅少左麥隊長,就少左一個有能力踢控傳既中堅,就唔能夠串連到中後場。要「後場放高波俾C朗停」唔駛睇場波,聽呢句野就知曼聯情況何其惡劣!而缺少左路快馬,右路伊蘭加係速度上亦恰唔到古古尼亞,中後場受壓放長波唔準,令到曼聯連反擊都打唔到。伊蘭加更錄到半場交左7次波得1腳交到俾自己友既老尷數據。

半場入你一粒咪少囉
由一開波到完半場,幾乎都係白禮頓主導球賽。不論左路右路都瘋狂玩弄曼聯二閘,左閘尤其明顯,般奴協防不足,令泰利斯守到氣咳。馬治有單對單突破力,單人就可以打爆你條邊。踢到15分鐘就先開記錄。杜沙特左路k角位傳中,泰利斯頭鎚解圍見高唔見遠。馬治擔住個位讓俾戈斯禁區頂射,省到人彈番出禁區外俾沙斯度拎番。曼聯一對防中冇即刻衝出去,俾佢拎定個波再擺個靚post先起腳,射近柱仲射穿麥湯同冰人大細龍門入網。迪基亞視線受阻,落地稍慢就要係網入面執波,先失一球。落後下既曼聯冇起色,繼續俾白禮頓㩒住踢,後防踢到慌失失奇兵咁,連較穩陣既華拉尼都派膠。山齊士求其放長波俾韋神哨,華拉尼竟然痴個波落黎俾韋神逗空門。呢球實在太荀,韋神都唔忍心射入你先逗左出界。成個半場,曼聯唔點解都計到3腳射門0中龍,睇住場波都唔覺有射過波。控球只得42%,好在都係失一球,蘭sir話等我半場番更衣室度度先。

蘭sir呢隻鑊食到應一應
蘭sir下半場即刻換人變陣,用卡雲尼同費特入替0貢獻既伊蘭加同跑到莫莫地既馬迪,陣式變4-2-2-2。唔變陣都還好,變完仲大獲。馬達同般奴踢左右攻擊中場,進攻上想中路overload對手,希望增加中路控球點,邊路就靠晒一對二閘上黎,中後場靠晒麥費組合掃同串連。進攻上可能有幫助,但防守上就出晒事。本身踢緊4-2-3-1都仲有兩翼回防協防邊路;一轉踢4-2-2-2,兩名攻中係般奴同馬達,速率同防守力都冇可能可以同你係中路組織緊,失左波就衝番落條邊路防守,仲要對面係瘋狂打側擊。基本上係只得4名後防加兩名防中防守,而守邊路就只得兩隻閘,你要防中同你補邊路,咁中路又邊個補。除非你可以長期有波在腳組織,或者踢前場逼搶,一失控球就反搶,咪根本一失控球就輸反擊,仲要人地既兩閘根本係翼鋒黎,好氣好力同你爆同你扭,結果就出晒事。

兵敗如山倒
下半場一出黎見到咁既企位都心知不妙。49分鐘失第二球就正正係陣式上問題。由費文扔界外球,睇下般奴同馬達企左係咩位置(見下圖)兩個都企係左路位置,而右路係完全冇人。當麥卡里士打撞開泰利斯拎波係右路傳中尾柱,已經死得但好彩冇白禮頓球員中路搶到點。到杜沙特係尾柱執番,戈斯同古古尼亞,係「兩」個人已經等佢cutback撞射,曼聯既防中亦冇可能補得切位就俾古古尼亞近距離射入。
踢到57分鐘,山齊士一腳幾廿碼長傳,精準送到左路既古古尼亞。又睇下曼聯球員既企位。
4個中場球員係中場中路,邊路冇人,達洛治又要以一敵二。
古古尼亞輕鬆控定再傳俾杜沙特壓入禁區,吸引左麥湯埋黎補位,就腳面彈俾入楔既戈斯。佢係十二碼點兩名中堅中間拎波,一控再扣番去左腳位避開華拉尼,輕鬆射尾柱。戈斯都踢到美斯咁,如入無人之鏡。個問題出係邊度都唔駛我多提啦掛。三分鐘後,戈斯直線俾穿曼聯防線,韋神chip射被達洛治護空門,但解圍果陣省左落杜沙特個身度入網,輕輕鬆鬆4比0。
由左面比蘇馬直線俾麥卡里士打轉方向到右路空晒既戈斯,曼聯既中場毫無企位毫無系統可言(乜野中場線黎)。冰人再次被拉走亦係輸呢球既關鍵,但唔可以怪晒佢一個。戈斯可以推幾步無遮無擋直線俾韋神,亦因冰人失左位冇人補番中堅位而輸。之後曼聯都仲有機會失波,好彩達洛治勤力先頂得住。後尾蘭sir換麥佳亞入黎就想幫隊波止血,尾段因白禮頓收兵,曼聯都有番少少攻門,一係俾山齊士救到,一係就唔中龍,破門乏力下,最後零比四大敗一場,

總結
踢完呢場破盡球會記錄,失波最多,聯賽分數最少,同埋宣告下季冇歐聯踢。般奴又出黎致歉,同球迷耍冧話唔配著起曼聯波衫。其實今季你都講左好多次,但都唔係好見到你地有咩好表現交番出黎。我對呢個蘭sir真係好有意見。炒蘇B就係見佢帶得差,驚冇頭四驚冇錦標先炒,換你上去暫代領隊都係領隊,但你帶左隊乜野出黎。今場係咪全部都係球員問題呀?你戰術部署中場變陣又岩咩?如果你係顧問咁我唔駛炒蘇B啦,照請你番黎睇下隊波有乜事咪得,依家帶隊仲衰過蘇B,咁蘇B又係咪無辜?唔出麥隊啦又輸4球,之前係咪全關麥隊長事?呢場波咁樣輸,我認為蘭sir要負極大責任!下季坦克黎教,又要睇下佢同蘭sir相處成點啦!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/
標籤: 曼聯  白禮頓  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→