與其搵戰犯，不如講下佢 (阿仙奴對曼聯賽後感) 精選

今次唔係太想針對場波做咩戰術分析，亦都唔想係呢場波搵戰犯。我不停都講隊波防守問題之大，並不能只怪麥隊長。嗱，今場冇出麥隊長，結果都失夠三球，仲要迪基亞救左對方唔止一球必入球。我反而對蘭sir既賽前同賽後講話非常有意見。

賽前佢已經係傳媒公開講話又要買10個人，又要至少3個轉會窗重建，又話練習訓練同比賽達唔到佢要求。講講下又話落後緊利物浦6年，又話點點點。其實你知唔知隊波係仲有條件爭下屆歐聯踢，又知唔知其實歐聯席位對隊波有幾重要先！就算係你心中呢班友爛泥扶唔上壁，你係領隊帶緊隊波架，點可以咁公開話呢班兵我會換晒佢，亦唔鼓勵同對外支持球員要有鬥心同信念去爭頭四。
幸好，今場球員對阿仙奴踢落都見到有鬥心，又或者有新領隊公布左上任，班球員要爭取表現，係場上都肯跑繼續拼搏。唔好講人地有冇手球，我地都走甩左泰利斯同般奴張紅牌。下半場出黎係真係有條件追和甚至反勝。兩隊防守都有重大缺口，但被夏卡一腳射死就冇得講。一場可贏可輸既比賽，最後就輸左，亦真係可以宣布同前四講拜拜。

賽後蘭sir同記者承認：「對我黎講，賽前已認為球隊很難會在頭四名完成。踢完之後，球隊正式宣布爭四夢完結。」首先，我認為係領隊心態上係唔應該咁諗，只要分數上仍有機會，你都一定要覺得隊波係仲有得爭先。未踢呢場都只係差三分但打多一場，難道你見唔到阿仙奴可以無啦啦輸三場，見唔到熱刺會輸俾白禮頓架！一日數字上仲有機會，心態都一定要覺得自己得，做好自己贏晒佢咪睇下對手點囉。你做領隊帶兵未踢已經覺得輸左，咁球員個心態又點調整到！輸完呢場睇下積分榜，我地仲有4場波踢爭6分仲踢多阿仙奴一場，但係數字上我地都仲有機會繼續爭奪，你就話今季已經完結了。心係咁諗都唔好咁坦白啦，咁你想班球員之後為乜同你搏命？仲要新領隊又唔知用唔用我？
我堅係覺得蘭sir係呃飯食（管理層極大責任），帶半季跟住上神枱，帶得好有成績可以揀繼續帶，冇成績就交俾下個接。佢好似冇責任，反正我實有得撈。敢問蘭sir既勝率係幾多？球員場上既表現又比蘇B時期好幾多？由炒蘇B到冇人接手就求其換蘭sir只係塞住球迷既怒火，管理層缺乏長遠規劃，又要死攬權力，先係隊波既死症。可能有人話蘭sir既能力係管理而非帶波，咁下季蘭sir就上神枱，加埋坦克來投，又睇下管理層係咪真係俾權佢兩個去處理轉會窗事宜，處理隊波既事務，睇下冇歐聯下你簽到咩人，又有咩人留隊先再睇下黎緊果季既目標係咩，再係神枱上評論下蘭sir既能力啦！

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/