韋斯咸首先係讓四賽事中勝出(賽後分析-熱刺對韋斯咸)

Hea談曼聯 於 21/03/2022 發表 收藏文章
干地排出5-2-3陣式。龍門羅列斯。五人防線左至右係列古朗-賓戴維斯-迪亞-羅美路-杜靴迪。靴爾保拍賓坦古亞踢一對防中。左右翼係孫興慜同古路錫斯基支援前鋒哈利簡尼進攻。

莫椰斯排出4-2-3-1。龍門法比安斯基。防線由左至右係基士維-多遜-蘇馬-賓莊臣。中場線由左至右係馬蘇亞古-懷斯-蘇捷-賓拉馬。攻擊中場蘭仙尼支援大隻佬安東尼奧攻堅。

熱刺攻勢唔駛多,一針見血就夠
周中兩隊都有賽事要踢,而西咸更激戰西維爾百二分鐘先晉級歐霸盃8強,更比熱刺少一日休息,所以見到西咸一開波整隊都放緩進攻速度,嘗試猜多兩板轉多兩下方向先搵位入。熱刺亦唔同你急係中場佈防,等岩時機就整隊向前逼。咩時機叫岩?就係當西咸中堅蘇馬接應賓莊臣回傳時。干地針對蘇馬速度慢,用波能力欠佳既弱點作出逼搶。當賓莊臣一回傳,孫仔就會加速逼蘇馬回後,整隊前壓逼法比安斯基大腳解圍就輕鬆拎番控球權。進攻則針對蘇馬轉身慢唔夠快,繼續倚靠簡尼墮後拎波,再放斜線搵走蘇馬身後既孫仔。熱刺攻勢最大威脅都係由守轉攻攻擊對方後場空間。唔駛好多埋門機會,只要一搶到波見到空位,就會替西咸擔心。只係9分鐘就開紀錄,熱刺前場逼搶,杜靴迪搶到馬蘇亞古腳下球篤左俾簡尼。佢右路沉底地波傳中,孫仔一個箭步搶前點,蘇馬已經慢左一步。孫仔雖然射唔到但個波碌左去蘇馬腳尾撞左入自己個龍度。熱刺咁就先開紀錄。

椰子都有針對部署,可惜效果一般
莫椰斯則嘗試用安東尼奧去進攻羅美路,但三日前120分鐘既賽事明顯令球員體力吃不消。大隻佬明顯受體力影響,未能靠平時既段速同身體質素係前面停波,令熱刺防線後移。未換出前僅得一下偷到簡尼回傳係窄位射斜,另一下則接應基士維傳中撞射高出。其餘時間都無甚作為,令西咸既攻力大受影響。椰子亦出左馬蘇亞古想利用佢既突破力去針對杜靴迪防守弱,加埋基士維既後上試圖集中進攻左路去打開缺口,但馬蘇亞古既狀態同最佳有一大段距離,今場甚少能單對單過到杜靴迪,而基士維亦因忌諱熱刺既反擊甚少放膽壓上。上半場西咸既進攻空有控球但威脅力完全不足。
簡尼孫仔合作入多球,逼到椰子要變陣
西咸失左波都嘗試係前面施壓想搶番控球權,咁就開正熱刺果家波。踢到23分鐘,西咸推高防線,嘗試係前場逼搶,但被熱刺輕鬆憑幾下猜傳已經化解左。賓坦古亞再次搵到墮後教炮既簡尼係中場發板。當時西咸既防線企係自己三閘線同中場線間,身後有極多空位俾孫仔跑。簡尼一接到波轉身就俾個斜線攻擊蘇馬既身後,孫仔接應傳送一推一射,咁就入多球。 不能怪晒蘇馬,推前防線前壓就要承受呢個風險,面對熱刺呢個風險西咸係承受唔起。輸到兩球既椰子決定改變陣式做5-4-1,拉後番馬蘇亞古打左翼衛,變陣三中堅去減少後場空間守番穩陣腳,唔再亂咁出去撲。踢到35分鐘又真係俾西咸偷到雞,賓拉馬接應多遜既攻門變助攻,係門前射入追番球。孫仔呢個波就掛住望波,冇守到賓拉馬俾佢望空射入,要孭鑊啦呢次。之後兩隊都未有埋門就半場完。

椰子調動都幾迅速不過效果一般
下半場開波雙方都冇調動,戰情相對膠著。椰子係56分鐘作出換人調動,用椰莫蘭高同科勞斯入替安東尼奧同馬蘇亞古,將陣式改為4-1-4-1,推前蘇捷同蘭仙尼踢兩個攻擊中場,用科勞斯加強邊路側擊,懷斯一個逗住條中場、希望嘗試收復失地。大隻佬就以一腳撞射高出作為佢今場既最後一腳埋門,攰了冇辦法。換完人之後既西咸都控制住節奏去主導球賽。椰莫蘭高出到黎都有一腳射門,亦有嘗試同蘭仙尼做小組地面配合,可惜最後一傳既質素就一般。面對熱刺既嚴密防守,加上體能既影響,都令佢地難以尋找到熱刺防線既空間去進攻、而熱刺時不時既反擊更直接到心臟地帶。

一個失誤足以致命亦完結了場波
踢到84分鐘,椰子再用華錫入替乾塘既蘭仙尼;干地則係88分鐘用艾馬臣入替列古朗,打右翼衛推左杜靴迪打左翼衛,換一個好氣好力既去守多左壓上黎既基士維。熱刺轉頭就入多球。羅列斯大腳生波踢前。個波本生就冇威脅,但蘇馬同多遜就兩個一齊同簡尼搶點,結果就簡尼一個頂贏兩個跣後,後上既孫仔輕鬆單刀射入。兩個中堅一個隊一個包真係定律黎,呢個失誤又係蘇馬要負責,本身多遜就守緊簡尼,蘇馬就守緊孫仔,結果佢就同多遜炒埋一碟。如果西咸下季要更進一步,相信中堅都係一個必須要加強既位置啦!最後埋單就三比一完場。

總結
戰情上兩隊踢落又冇比數咁一面倒,干地式反擊加上針對性進攻確係值得一讚;而莫椰斯既臨場調動都係合理既,只係球員休息時間既影響實在係太大,令到球員既判斷力集中力都下降就自然會犯錯,亦要讚熱刺既進攻球員把握對方犯錯既能力。踢埋呢場,韋斯咸有48分排第7,距離打少兩場有54分既阿仙奴有6分差距,相信韋斯咸已經係讓四大戰中勝出,專心歐霸盃賽事去獲得下季歐聯資格會比追逐前四更有希望;熱刺則比阿仙奴多踢一場落後3分,仍然有機會爭前四。勉強計埋愛隊曼聯都仲有3隊差頭四,睇下最後邊隊跑出啦!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/
標籤: 韋斯咸  熱刺  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→