見步行步既歐聯賽事（賽前分析-曼聯對馬體會）

馬體會近況勇銳，近三場賽事全勝，每場都攻入兩球或以上，攻力有所保證。三場波加埋都係失左兩球，防守亦有明顯加強。加上迪保羅、卡拉斯高、高基等高質球員亦相繼有出場比賽，整體戰力比首循環必定更高，變陣換人既靈活度亦高左，施蒙尼話唔贏你等幾時。

今屆歐聯取消左作客入球優惠，所以曼聯就算上場追和都冇特別著數，番到主場都係由頭黎過。上場作客被馬體會牢牢控制住戰局，能逼和除左有運仔之外，就係有運仔。今場對面仲有多名高質球員可上陣，蘭sir呢舖都幾頭痕。上場聯賽對熱刺因病冇出般奴費南迪斯，進攻節奏冇咁急，反而好似仲岩C朗踢。贏左一場爭四重頭戲，對球員都應增強左唔少信心。馬體會應該都唔會特別走出黎同你攻，估計都會用番上場主場既踢法模式。蘭sir上場擺連迪路夫客串右閘慘被玩弄，今場唔會再咁低能啦掛。預測佢都係踢4-3-3進攻同前場施壓，縮後就踢番4-2-3-1。呢套form都踢左好幾場，見到球員都開始熟習。龍門繼續係迪基亞。防線沿用番上場對熱刺既陣容，左右二閘係泰利斯同達洛治；中堅會係華拉尼拍麥隊長。中場三人組會係麥湯文尼逗後，費特同普巴踢前面兩個中場。如般奴病好，則會取替費特，但個人認為雪下佢啦。左翼繼續係進攻核心007辛祖；右翼會起用伊蘭加，上場福仔防守可以，但進攻冇咩建樹；伊蘭加上場對馬體會有波入，做下運財童子試試。前鋒繼續係C朗拿度。一周第二賽對佢既體能冇問題既，繼續作戰啦！
預測曼聯正選陣容（4-3-3）
迪基亞
達洛治 華拉尼 麥佳亞 泰利斯
費特 麥湯文尼 普巴
伊蘭加 C朗拿度 辛祖

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/