閒談曼聯冬季轉會窗操作 精選

冬季轉會窗正式完結，曼聯借走左迪亞路、馬斯亞同雲迪碧克，但未有作出任何買人補強球員既動作。冇買人補強呢個決定，小弟並唔感到意外。原因一，中前場人手過盛都唔係袐密，球員坐多過踢，你唔先清空冗員，都難以說服管理層俾你買球員（中場中路級數唔夠係事實）。原因二，蘭歷克依家都仲係話帶埋呢半季先，下季又有機會上神枱做幕後，又或者繼續領軍，佢自己究竟會做咩職位都未明朗，即係有機會要請新領隊，依家俾你買人但新領隊唔岩用又點攪呢？原因三，球會或者莫財，今季買左辛祖、華拉尼同C朗拿度都用左唔少錢；上季又買左迪亞路、柏利斯迪等人，加上疫情關係，閂水喉都可以理解。買唔到人係預期之內，但最後只借走兩個球員就比預期有落差。依家就閒談下轉會窗既動作。
1）外借鍾斯失敗
曼聯同波爾多已經傾好晒條款，只等鍾斯拍板就可以外借加盟，但最後傳波爾多未能保證佢既出場時間，導致鍾斯決定留隊。我認為佢既決定唔係最好，雖然佢復出對維拉場波表現亮麗，但曼聯陣中有四名中堅都排係佢前面，要搶贏呢四位人兄既機會微乎其微，何不出去波爾多試下？機會點睇都多過係曼聯啦！曼聯同時借走左小將中堅文治，等鍾斯做球隊第五人，我相信除非有大量中堅受傷病困擾，佢都應該會坐到季尾。

2）馬斯亞外借西維爾
曼聯左路亦係人滿之患。普巴、華舒福、辛祖，甚至乎要踢4-2-2-2而踢偏左既般奴費南迪斯同上左位既新仔伊蘭加都可以勝任左翼或左路攻擊中場位置。馬斯亞場上既唔勤於跑動，亦欠缺以往既盤扭突破能力，加上常受傷患困擾，就更加難進入慣常大軍名單。佢既離開絕對係雙贏局面，睇下佢係西甲能否重獲新生再回收再用。不過，我就覺得佢有價就賣啦，蘇B未被炒前都多次俾機會佢，但都交唔到丁點功課，近兩年不進反退既表現真係難以再俾機會佢！
3）雲迪碧克外借愛華頓
悲情人物雲迪碧克最終成功借去拖肥糖救亡，睇下呢半季係林伯特手下可以交出咩表現。兩任領隊蘭sir同蘇B都並冇對佢委以重任，蘇B堅持4-2-3-1陣式下而對佢投閒置散都可理解，但蘭sir無論4-2-2-2還是近三仗進攻上用4-3-3陣式下都不被嘗試使用，就知道佢唔走都係繼續坐。我認為盃賽對韋斯咸一仗係令蘭sir對佢失去信心既一場波。契仔費特同般奴穩坐正選，普巴又即將回歸，而馬迪同麥湯文尼又可以輪換踢逗後防中位下，雲迪碧克變成冗員一個，所以能成功借走係雙贏局面。佢對曼聯既熱情同愛令我希望下季佢可以留隊爭一席位，而我認為佢係有呢個能力。

4）連加特外借失敗，迪亞路遠走流浪
小將迪亞路上季來投，到季尾都不乏出場機會。原以為今年有機會進入輪換陣容擔任右路攻擊手，奈何今季買左辛祖，就令到佢冇左呢個機會（仲有個柏利斯迪），外借出去等佢磨練下絕對係一件好事。連加特就認真慘到冇朋友。上季外借韋斯咸踢到曉飛，仲成功帶領西咸今季踢歐霸盃。今年被蘇B回收，但再被邊緣化。雖然幾場波後備出黎救國，但都係冇乜出場時間。換完領隊以為會好轉，結果同蘇B一樣，都係後備出黎踢廿分鐘甚至更少，屈居於格連活同辛祖之下。本身曼聯同紐卡素傾掂數過去幫手護級，但突然爆單綠木犯刑事罪行出黎，加上迪亞路同馬斯亞已被借走，踢開右路既淨番辛祖一個，福仔都係間中踢下，邊路人手突缺下就逼使連加特焗住留隊做後備隨時候命。
總結
曼聯現時仲有三條戰線，包括聯賽、歐聯同足總盃賽事，就靠晒依家呢隊人腳去踢啦。蘭sir應該會用4-3-3陣式進攻/4-2-3-1防守。龍門繼續迪基亞坐正，甸軒達臣做替補。正選中堅應會由華拉尼拍麥佳亞，替補則有連迪路夫同拜利，鍾斯則做培訓球員。左右閘泰利斯同達洛治為正，梳爾同雲比沙加為輔。左翼伊蘭加上左位，右翼會先用華舒福。後備則係辛祖同連加特。逗後防中則係馬迪同麥湯文尼輪換。前面一對中場則會係普巴、般奴費南迪斯同費特三選二。前鋒係C朗拿度正選，卡雲尼後備。隊中馬達同希頓則係大大後備。依家每個位置都叫做有一個替補（中場中可以計埋馬達），兩個人去爭一個位比較合理。睇下呢段冇比賽時間，蘭sir點調教隊波去迎接黎緊密集既賽期啦！