要搶分同搶唔搶到係兩回事(賽前陣容預測-賓福特對曼聯)

Hea談曼聯 於 19/01/2022 發表 收藏文章
曼聯上場領先兩球下,被維拉瘋狂進攻下追番兩球,以二比二打和。你可以話痛失兩分,但係我既角度就係幸運地執番一分。整場比賽只有頭三十分可以控制戰局創造機會,其餘時間都係處於捱打狀態。下半場一著更係敗筆,要費特離開位置向前逼明斯用波,令中場倒三角企位出現空位,馬迪亦唔夠體力同速率去填補(唔能夠要求佢做呢樣野)般奴臨場亦缺乏呢種補位意識。我比較失望係蘭sit既應變,之前五場波都會見到佢好快係陣式上、球員上、或踢法上作出調整,但今場呢個部署失敗就冇了,唔知當時佢地諗緊咩。更衣室係賽後又爆問題,今次主角係馬斯亞。場上場下問題一大堆,如果你話今場可以反底,我就唔多樂觀啦。

賓福特近況亦不比曼聯好。近五場賽事只得一勝四敗既成績。上兩場仲大敗俾利物浦同修咸頓。俾利物浦炒三球都唔太出奇,對住同級份子修咸頓都輸四比一,防線可謂大穿窿。不過,今場主場作賽,再對住內憂外患既曼聯,相信會係反底既時候。另外,賓福特踢開5-3–2陣式,係防守上亦容易壓縮中路空間,面對不擅陣地戰既曼聯會係優勢。如前場孖寶東尼同麥比奧莫把握力好,隨時贏埋都仲得。

曼聯和左維拉後,距離頭四就愈黎愈遠,經已有五分差距(踢少兩場)。近五場係兩勝兩和一負,但對手分別係諾域治、紐卡素、般尼、維拉同狼隊,都係中下游球隊。場上表現用8個字講完,贏得幸運,輸係應份。如今場再對下游球隊都贏唔到,都可以疊埋心水爭第五就算。上場對維拉既4-3-3陣式係上半場發揮得幾好,但我預測今場會改用番4-2-2-2。原因係麥湯文尼同C朗拿度應會復任正選。龍門迪基亞以接近完美表現繼續正選,華拉尼應會拍番麥佳亞踢中堅,用麥隊長防守東尼應該有著數既,左右二閘會起用泰利斯同達洛治提供側擊。一對防中會係復任正選既麥湯文尼同費特。般奴費南迪斯會聯同辛祖出任一對攻擊中場。踢呢個陣式下,辛祖會比格連活特同華舒福適合。卡雲尼上場踢足要抖抖,格連活特呢幾場太獨,需要雪一雪冷靜下,所以前線會由C朗拿度拍華舒福攻堅。

預測曼聯正選陣容
迪基亞
達洛治 華拉尼 麥佳亞 泰利斯
麥湯文尼 費特
辛祖 般奴費南迪斯
華舒福 C朗拿度
標籤: 曼聯  英超  賓福特  

留言


請按此登錄後留言。未成為會員? 立即註冊
    快捷鍵:←
    快捷鍵:→