每場都當決賽踢(賽前陣容預測-阿特蘭大對曼聯)

Hea談曼聯 於 02/11/2021 發表 收藏文章
曼聯係本土聯賽終結多場不勝加場場有失波既紀錄,淨勝熱刺三球。三中堅組合有效改善防守,但就令到進攻變得單調同難以踢得亮麗,但最緊要係三分已袋。睇睇歐聯分組形勢,現時曼聯有六分排榜首,而阿特蘭大則有四分排第三,以得失球差暫時排係維拉利爾之後,年青人則有三分排最尾。仲有三場賽事,隊隊都仍有機會出線,曼聯起碼要贏多兩場先穩陣,所以場場都要當決賽踢先得。

上場主場對阿特蘭大先失兩球下,曼聯加強前場壓迫,最後就反勝二比三。過程雖然驚險,但明顯見到阿特蘭大係不擅長防守。只要你肯推上去攻,就有好多機會入波。上場對熱刺為左重拾防線信心,故意出到7名防守型球員力保不失球,而華拉尼復出亦係成功關鍵。佢復出之下,再踢番4名後防應該冇咁擔心,加上禮拜尾仲有同市打吡,呢場波係需要作出適當輪換。

預測蘇B會再次排出4-2-3-1陣式。龍門繼續係迪基亞,中堅會由華拉尼拍住麥隊長。左右閘繼續係梳爾同雲比沙加。個人認為呢場可以俾達洛特踢下,等雲比沙加可以休息備戰曼城。中場方面,未知普巴同蘇B關係如何,最理想就用佢拍馬迪踢呢場賽事,輪換麥湯文尼同費特,留力下場打吡戰。假如決定擺普巴入雪櫃,就真係雲迪碧克既最後機會。呢場波都見佢唔到既話,走啦唔好浪費光陰。現實或會由馬迪拍麥湯文尼鎮守中路。福仔上場後備出黎又貢獻左個入球,今場可以出現番係左路。右路則嘗試起用辛祖,提供彈藥俾前線。般奴費南迪斯同C朗上場都被提早收起,就係為左保留體力踢呢場波,所以佢兩個會繼續係前線爭取入球。
如蘇B改用3-4-2-1陣式,就可以嘗試收起梳爾同雲比沙加,改用達洛特同泰利斯出任兩邊翼衛。三名中堅為拜利、華拉尼、麥隊長。防中為普巴同馬迪,攻擊中場般奴支援C朗同福仔。咁樣既陣容應該都有足夠既火力去贏呢場波。

預測曼聯正選陣容(4-2-3-1)
迪基亞
雲比沙加 華拉尼 麥佳亞 梳爾
辛祖 馬迪 麥湯文尼 華舒福
般奴費南迪斯
C朗拿度
標籤: 曼聯  阿特蘭大  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→