呢粒拖肥糖唔易食（賽前預測陣容-曼聯對愛華頓）

曼聯上場歐聯激戰到最後先靠C朗絕殺維拉利爾，拎到極重要既三分，令曼聯係分組賽並冇陷入絕境。今晚番到黎聯賽，對住賓尼迪斯既愛華頓，相信呢粒拖肥糖唔易食。

愛華頓近四場聯賽三勝一負，入左七球失四球，有13分排第六，僅僅因得失球差過曼聯而被曼聯騎住。陣中主力卡法路雲、李察利臣已經有幾場未能上陣，可幸新加盟既朗當、唐辛、格雷狀態不俗及有足夠既戰力，令拖肥糖既進攻火力得以維持。曼聯近四場聯賽都係三勝一負，都係入七球失三球，有13分排第五。上場對維拉更有麥佳亞同梳爾傷出，而周中亦艱辛地係最後階段先絕殺對手，無論體力還是防線陣容完整性都有缺陷，睇下蘇B會點樣安排正選陣容去解決問題啦。等小弟預測下先，龍門方面，神勇既迪基亞會繼續擔正。相信華拉尼將會拍住連迪路夫去冰結對面既朗當。左閘泰利斯頂上梳爾既位置提供側擊力；右閘則繼續係雲比沙加。綠木上場對維拉獨食上腦，對住維拉利爾踢落表現又未算亮麗，有機會改用辛祖出任右翼；而左翼則交俾近幾場後備出黎都有好表現既連加特。馬迪歐聯都係上陣左約廿分鐘，有足夠體力拍住普巴係中場串連球隊。攻擊中場般奴費南迪斯繼續支援C朗拿度爭取入球。
預測曼聯正選陣容
迪基亞
雲比沙加 連迪路夫 華拉尼 梳爾
辛祖 馬迪 普巴 連加特
般奴費南迪斯
C朗拿度