完美既一場煞科戰 - 狼隊對曼聯 (賽後球員報告) 精選

憑住新仔伊蘭加同馬達既十二碼入波﹐二比一作客擊敗狼隊﹐可以話係非常完美既一場煞科戰。起用全部副選同新人都能順利贏波﹐球隊又能以十二勝七和既客場佳績結束今季聯賽賽事﹐值得高興。為左準備下場歐霸盃決賽賽事﹐避免正選球員受傷既情況下﹐今場起用全部後備球員加新仔。因決賽會用迪基亞打龍﹐所以今場甸軒達臣正選上陣﹐後防四個係威廉斯﹐拜利﹐杜安沙比同泰利斯。拜利正路都應該要休息﹐不過後備已經無人可用﹐所以唯有出佢頂硬上。防中用上馬迪同雲迪碧克﹐占士復出打左中場﹐馬達叔叔攻中領軍﹐而右路則交俾新仔伊蘭加。前鋒就用濕水欖核既迪亞路試試。後備仲有兩個新仔﹐包括新人王梅布里同梳泰爾隨時候命。
先由前鋒線講下球員表現
咁多新仔令我十分期待呢場波﹐可以睇下佢地有咩特點。由前鋒線上講起﹐今場前場四個踢得都幾自由﹐企位防守上﹐424係前場開始遮線﹐左面占士右面伊蘭加﹐中間兩個平排就係迪亞路同達叔。進攻上﹐迪亞路正路就應該係中鋒位置出現﹐但佢既踢法都係要持球上腳做突破﹐所以佢好多時都會走左去邊路拎波﹐又或者嘗試同伊蘭加做配合。佢既突破力係四個人入面最好果個﹐多次見到佢成功扭過一兩個人﹐不過扭完之後個決定或者同隊友既配合都有待加強。達叔繼續佢一貫作風﹐落到場就交足功課。持球組織﹐控制節奏﹐走位拉空都冇揸灘﹐仲入左一個具質素既十二碼。下場決賽可能仲要靠你架﹐踢埋睇下下季仲可唔可以留隊教下D新仔。右翼既伊蘭加真叻仔﹐踢第二場波就有波入。佢速度係高既﹐暫時未係好見到佢有出色既盤扭能力﹐但佢既走位加上同隊友配合既能力會係一條佢可以堅持行既路。個人覺得有少少似柏度。今場入果一球就係走位既能力﹐係右面慢慢斜cut埋黎中路﹐再攝係防守者前面去衝頂。唔止呢一球﹐之後仲有一球類似既﹐不過泰利斯就傳後左又或者係佢跑快左﹐所以未能作出攻門。防守見到佢都係勤力既﹐好肯落番黎幫威仔手。左面既占士就真係有D失望。先讚左佢助攻果下先﹐難得有機會睇定定係左路出波﹐用左腳出左一球相當有質素既傳中球助攻俾新仔入波﹐值得一讚。但其餘既時間都冇乜突出既表現﹐下半場仲有一下單刀Chip Shoot﹐龍都唔中射左出界。跑得快﹐係可以令你多左機會﹐但得個快字係冇用﹐把握唔到機會跑幾快都冇用。
跟住到正選上陣既雲迪碧克同馬迪
防中再次交俾雲迪碧克同馬迪坐鎮。馬迪今場表現平平穩穩﹐輸果球就有少少少少責任啦。佢係中場都捕到人地橫傳後上﹐但一跣腳就令到中場突然穿左個窿﹐俾人後上推進再分入禁區導致失波。其他時間防守都冇乜失位﹐佢亦係中後場好好串聯組織進攻。下半場有一腳直線俾到威仔突入禁區射門﹐而雲迪碧克搏到十二碼果下﹐亦係馬迪先係邊路盤扭傳中﹐再經占士俾到VDB先有十二碼。雲迪碧克今場再次踢足全場﹐今場波既表現絕對比之前既賽事好﹐進攻參與度明顯多左﹐有幾下轉身過人向前推﹐咁先似番D樣。我發現佢同馬達同場既話﹐踢得會比較生。兩個都係走動幫波型﹐鍾意彈波多過上腳﹐有D化學作用。搏到十二碼果下就係佢鍾意後上入禁區既成果。但後防球員同佢有少少默契不足﹐有幾下現身拎波想幫手轉方向﹐但最後冇傳俾佢就浪費左破逼搶既機會。不過都難怪既﹐又唔係成日一齊踢﹐係中路驚交失都情有可原。防中係咪最適合佢？還是踢邊路定係攻中先係佢最佳位置？休賽期真係要好好研究下。
比較性感少少既後防
威仔今場繼續踢右閘﹐今場既表現好番少少。可能對面既左翼既威脅又唔係太大﹐佢今場算係幾成功防止到對手左路既進攻。防守冇乜甩漏就多左信心後上。下半場接應馬迪既直線﹐射近柱個處理都可以﹐係過唔到門將柏捷斯奧。不過佢要操操個對抗性﹐控球果陣俾人埋身一拍﹐就好容易失平衡護唔到個波﹐仍有好大既進步空間。左閘既泰利斯開頭對住大隻佬查奧爾﹐變左左路放題﹐俾大隻佬攪到非常狼狽。好彩大隻佬踢左唔夠半場就傷出﹐咪泰利斯今場都有排煩。進攻上佢既傳中球都係可信賴。一對中堅今場表現不錯。爭奪高空波好少頂輸﹐就算頂輸都唔會走甩人﹐都會同人拍住跳令人地攻門既難度大增。睇下到時決賽用邊個拍邊個啦！甸軒達臣失果球都冇得怪怇﹐其餘時間對手既埋門都唔駛點撲﹐接傳中波依舊穩健﹐表現平穩。
繼續期待呢兩個新仔
蘇B最後十分鐘先換入梳泰爾同梅布里﹐都冇乜時間可以表現到自己。但梅布里係有限時間都算有幾亮眼既鏡頭。透過走動接應傳送再直線傳俾梳仔去爆一段﹐又有一下左腳撥右腳避開二人夾擊﹐又有一下扣波保護皮球﹐加上飄揚既頭髮好易令人見到佢。梳仔就冇乜亮點冇咩睇到。佢加埋伊蘭加﹐迪亞路﹐同梅布里呢四位仁兄都非常值得期待佢地既表現。