主場要贏波真係有難度 - 曼聯對富咸 (賽後報告)

Hea談曼聯 於 19/05/2021 發表 收藏文章
賽前預測蘇B會利用呢場風流波寓賽於操﹐會出部份主力同後備磨合下。點知蘇B為左係最後一場主場贏波﹐賀一賀球迷可以重新入場﹐主力盡出務求贏波而回。繼續沿用4231陣式﹐迪基亞出任龍門位置﹐睇黎下場聯賽都會係佢打﹐保持狀態備戰歐霸盃決賽。中堅則用上連迪路夫同杜安沙比﹐睇黎想等拜利休息。左右二閘用上雲比沙加同梳爾。MCFRED踢防中﹐左路繼續用普巴﹐右面則用格連活特。般奴費南迪斯繼續支援前鋒卡雲尼攻堅。

富咸冇揸灘﹐曼聯要入波有難度
富咸雖然已經降班﹐但球員絕對冇揸流灘。未失波前﹐防守其實唔差﹐用上541陣式係前場進行逼搶。單箭頭係兩名中堅前遮線﹐兩名邊路中場MARK住一對左右閘﹐一對防中則緊緊追截MCFRED。而左右翼衛則防守對方既一對翼鋒。3名中堅則係中路緊密防守。前場既逼搶令到曼聯組織非常困難﹐踢唔到自己既進攻節奏同流暢度﹐再次顯出雙防中既不足之處。而富咸係後場都好積極嘗試用地波向前推進﹐而曼聯亦係對方前場進行逼搶。富咸邊路突破好手洛文被八爪魚雲比凍結﹐前場亦欠缺強力既支點停波﹐加上面對住覆蓋範圍大﹐機動力夠既MCFRED﹐富咸多次係中場已經失控球權﹐但因富咸後場人數夠﹐曼聯即使搶到波亦好難組織到似樣既攻勢。

極具卡士世界波﹐點會唔想佢留隊
踢到15分鐘﹐迪基亞大腳向前踢出生波。般奴係中路唔知掂唔掂到個波既情況下﹐個波順住向前碌。卡雲尼突破越位﹐隻眼望一望門將阿利奧拉既位置。波都唔拎就係對方三閘線作出笠射。個波完美拋物線笠過門將手頂入網。呢個入波極具卡士﹐同佢續約絕對係明智選擇。入完波之後﹐成隊曼聯個信心都有所提升﹐進攻組織上都開始見到冇咁亂﹐拎到場波既主導權。有幾下直線都差D可以俾穿富咸防線;而前場逼搶亦有幾次成功﹐般奴更有一下接應麥湯既後抽傳送﹐係禁區中路射門被門將擋出。富咸礙於人腳質素所限﹐生波組織同反擊都無甚威脅。唯一一次機會去到37分鐘﹐富咸一次反擊﹐新仔卡華路接應隊友既斜線﹐壓過連迪路夫入到禁區左側單刀對住迪基亞。可惜最後一腳射得認真麻麻﹐被迪迪仔輕鬆接實﹐浪費左呢次黃金機會。

領先一球往往係最危險
下半場早段曼聯都有多次射門﹐先有般奴非常近傍既罰球﹐再有綠木接應角球施射被擋出﹐接住亦多番外圍施射被後衛封左。而富咸既洛文係左路肩負起進攻既重任﹐有一下沉底射近柱被迪基亞擋出﹐即刻想再頭鎚二傳個波入小禁區﹐亦被迪基亞沒收。入唔到燕梳球就埋下和波既伏線。踢到75分鐘﹐富咸一次地面推進﹐安古沙引左杜安沙比出黎mark佢﹐係右路同波比列特形成二對二。安古沙有少少推離腳﹐引到梳爾埋去標波。標波真係大忌﹐如果唔係人多打人少﹐真係唔好亂咁上去拍。梳爾一埋搶﹐安古沙一俾就令到波比仔係右路空晒。佢推深兩步睇定定黎斬尾袋。呢個時候﹐富咸已經有兩個球員搶前點同中間﹐雲比沙加見狀已經縮埋黎幫冰人手守一個﹐係中路形成二對二﹐但左翼衛既祖拜仁係後面衝上黎係尾袋接應。綠木呢球波都有少少責任﹐佢冇留意到後上仲有敵人﹐被祖拜仁係尾柱空晒一頂入網﹐追成平手。

主場贏波有難度﹐好彩歐霸盃決賽要去波蘭﹐都算作客啦
蘇B其後換入迪亞路同雲迪碧克加強攻力同活力﹐般奴今場多番施射都過唔到阿利奧拉﹐最後都係未能再次領先﹐一比一完場。踢完最後的主場賽事﹐曼聯已經鎖定以第二名完今季賽事。下場對狼隊可以盡出後備﹐避免正選球員決賽前受傷同多D休息。今季聯賽主場成績認真麻麻﹐只得9勝4和6敗既成績。反而作客則有11勝7和0敗既佳績(未計對狼隊賽事)。歐霸盃決賽會係波蘭中立場度踢﹐都算半個作客﹐希望決賽可以贏波捧盃啦!
標籤: 曼聯  富咸  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→