羅渣士，幫到你盡架啦（曼聯對李斯特城 - 賽前預測陣容）

剛剛贏完維拉，加上椰子既協助下，曼聯經已鎖定下季歐聯資格。今晚一點主場迎戰李斯特城，對曼聯黎講只係位置之爭，而對李斯特城黎講則係爭四大戰！利物浦踢少一場爭六分排係第六位，李斯特城有咩冬瓜豆腐就分分鐘失去歐聯資格，可謂不容有失，所以一定全力出戰曼聯。

講番曼聯先，黎緊5月14號會進行對利物浦既補賽。權衡輕重下，呢場絕對應該留力備戰雙紅會賽事，陰謀論地講則係讓俾李城上，下場踢殘利物浦。睇人仆街最開心，但更開心係踢條友仆街，更何況係踢死敵利物浦，所以呢場對李城應該會出副選上陣，留力下場雙紅會。
預測龍門會繼續由甸軒達臣上陣。防線則會有變動，麥佳亞受傷下，拜利會拍連迪路夫出任中堅位置培養默契，雲比沙加繼續上陣，左閘則會改由泰利斯代替梳爾。
中場方面，馬迪應該會正選，拍住愈踢愈好既費特。左中場交由雲迪碧克，右中場則會由占士出任。攻擊中場繼續用般奴費南迪斯，而格連活特則會出任前鋒，去進襲李城防線。

預測曼聯正選陣容
甸軒達臣
雲比沙加 拜利 連迪路夫 泰利斯
占士 馬迪 費特 雲迪碧克
般奴費南迪斯格連活特