始終都係要反CUP - 維拉對曼聯 (賽後報告 - 長文)

出場既正選陣容同賽前預測完全一樣﹐只係位置上有唔同﹐蘇B選擇用福仔打中鋒﹐綠木打右翼。綠木既防守意識同勤力程度較福仔好﹐呢個相信係原因之一﹐另一個則係福仔打反擊既速度較高﹐所以就揀留佢係最前去哨。

開波CHUR果段入唔到就輸個靚波
一開波﹐曼聯就反客為主﹐務求早早入波開番個靚頭。頭10分鐘﹐控球比率接近八二之比﹐就知曼聯有幾主動。主動之餘亦都真係創造左唔少既機會﹐但個波一係就門口掠過﹐一係就比龍門救到﹐都係未能擺個波入網。打中鋒既福仔今場幾肯同隊友配合﹐少左好多持球鳩扭﹐多左現身令到前場個進攻係流暢左﹐但始終前面要人finish多過要人做波﹐唔係踢得差但效果唔大囉。維拉頂得住頭段﹐就開始反壓番曼聯﹐球員體力佔優﹐又年輕力壯。15分鐘後就開始係曼聯既後方作高壓逼搶。往往係右路就可以係前場已經逼甩曼聯﹐拎番個波再做。不過缺少左格利殊﹐進攻上比較單調﹐而巴克利亦踢得比較沉﹐未能帶動到球隊﹐所以就算搶番主導權都唔係點威脅到甸軒。而曼聯既福仔都唔係停高波既材料﹐只能多靠普巴既個人能力去停波先解除到逼搶。膠著既狀態去到24分鐘就有個轉捩點﹐查奧爾去左右面幫手﹐個波波子機撞左去佢腳下﹐連迪路夫第一下踢得中個波但解唔到圍俾查奧爾拎番﹐佢係右面禁區角向前再推一步﹐連迪路夫想再擔開佢﹐但礙於身體質素問題同埋拍果下唔夠人快﹐俾查奧爾左腳妙射遠柱上角。甸軒都無能為力﹐只能目送皮球入網。曼聯跟住都嘗試積極反撲﹐但都未能把握到完上半場。
係禁區入面停到波先有機會俾人踢
蘇B維持原班人馬繼續踢下半場﹐攻勢唔算有好大威脅﹐但普巴就係世界級。佢係52分鐘係禁區內停到波﹐引到雷斯出腳踢中佢﹐球證直指十二碼點。呢D停波係曼聯隊內就真係得佢同卡叔先可以做到。般奴小跳步式射入﹐追成平手。反CUP模式啟動﹐4分鐘後﹐綠木係禁區向右面迎雲比沙加個波﹐做左一下半卸身動作﹐右腳一控已經順勢擺脫左防守者﹐再左腳向前輕力推前就起腳射近柱。呢D動作又係中鋒教才式轉身﹐所以諗唔明點解仲要擺佢係右翼位。龍門雖有反應﹐但實在比較近﹐加上球速唔算慢﹐最後都係鞭長莫及﹐曼聯反超前2比1。

卡雲尼既走位真係冇得彈維拉倒輸左之後﹐都變得例行公事﹐唔係太積極去搶波﹐就算搶到波打反擊都冇乜效率。曼聯都開始拖慢節奏﹐猜住波等機會。不幸既事發生﹐麥隊長係一次攔截後受傷﹐被逼換入拜利﹐而卡雲尼係較早前都入替左綠木等佢休息。維拉見狀即刻㩒制換人加強攻力﹐亦真係有幾下攻門﹐不過都係過唔到甸軒。踢到87分鐘﹐曼聯一次反擊機會﹐卡雲尼先係左禁區角施射被後衛擋出。個波輾轉去到右路三閘線既福仔腳下。卡雲尼再施展神級走位﹐係左路斜插入禁區﹐將防守者壓左係身後。福仔呢個波處理得非常好﹐右腳一CHOK將個波放左係卡叔個頭度。走得靚時交得亦靚﹐卡叔個頭輕輕一點就將個波放左入個網度。

冇理由唔留卡雲尼
維拉之後仲有屈堅斯插水﹐兩黃一紅離場。曼聯最後成功以三比一擊敗對手。因韋斯咸不敵愛華頓﹐所以曼聯已經確保到下季既歐聯資格﹐多謝椰子。講講福仔﹐左路被普巴搶左位之後﹐右路將會係佢發揮既好位置。佢已經唔止一場係右路位置出波助攻隊友。佢既能沉底出波又能內切中路﹐絕對可以為疲弱既右路帶來生氣。而卡叔季尾既表現證明佢寶刀未老﹐綠木、福仔同馬仔﹐絕對可以係佢身上學到野﹐留到多一年就梗係留隊﹐做後備殺手又或者對強隊就打正選﹐對球隊黎講絕對係有利。