要不是有迪基亞 - 羅馬對曼聯 (賽後分析) 精選

賽前分析預測左蘇B會選擇以強陣出擊呢場賽事﹐最後果然不出所料﹐正選陣容同預測陣容相差無幾﹐只係卡雲尼取代左帶傷既福仔﹐雲迪碧克取代麥湯文尼同埋用拜利代替連路夫。卡雲尼出任正前鋒﹐將格連活特推左去打右翼屬正常調動﹐拜利位換位繼續打中堅﹐而雲迪碧克就出任左中場﹐將普巴移入中路拍住費特打平排防中。

早段真係要不是迪基亞
一開波﹐羅馬就展現主場既鬥心﹐趁你曼聯未企穩陣腳﹐頻頻向前壓﹐更加憑死球攻勢製做左幾下極危險既埋門機會。季中開始取代甸軒達臣出任歐霸盃門將既迪基亞神勇地將對方攻門一一化解。要不是有迪基亞頂住﹐早早落後一至兩球都唔出奇。
講講呢套正選陣容
曼聯捱過左頭十五分鐘就開始入局﹐今場係踢得比較慢﹐始終有四球優勢在手﹐唔駛推進到好急。企穩陣腳後﹐就開始拎番唔少控球權。呢套陣容幾有試陣意味﹐進攻上起用雲迪碧克打左中場﹐右中場則用綠木。兩名球員甚少會上腳做個人突破﹐都係俾完波就走位又或者會主動去作無球跑動去拉開對手。加上卡雲尼總能係適當時候係前場停波駁腳﹐中後場又有普巴穿針引線。曼聯既進攻甚少會見到球員扭失波﹐反而多左好多即俾即彈、掩護單擋﹐不過雲迪碧克始終都係少踢﹐有幾腳波既力水同隊友默契都係差D﹐但佢踢呢個位絕對會比中場中或攻擊中場為佳。防守方面﹐維持高位遮線﹐逼搶力度唔係話太高壓。多左拜利係後面﹐真係俾到信心前場球員向前迫。但佢狀態都係未十足﹐要操番多少少。另外﹐普巴個覆蓋面同速率始終都唔太合適打平排中場﹐雖然已經用上費特幫佢執屎﹐但始終普巴既防守意識企位都係唔多合格﹐有幾下比人係中路入滲就係企位出現問題同回追唔夠快。過左頭段之後﹐羅馬都要回一回氣﹐而曼聯亦都拎番節奏﹐防守亦冇再俾到咁多空間羅馬去做波﹐卡叔仲有兩個幾open既機會射唔入。戰況開始膠著﹐曼聯就憑一個幾靚既反擊組織﹐由費特助攻卡雲尼怒射破網。完半場時﹐般奴仲有一腳唔錯既機會去射波﹐可惜唔中目標﹐結束上半場。
輸第一球係防守戰術問題
下半場蘇B就換走左一對二閘﹐等威廉斯同泰利斯可以上下陣。羅馬就係五十七分鐘追成平手。點解會話係防守戰術問題呢？左閘既佩雷斯係左路持球﹐MARK佢既係威廉斯。左中場既米希達欣則移左入中路少少被普巴防守住。攻中柏歷堅尼再斜走入邊路拉走拜利。因為綠木之前走左上前去逼另一個中堅﹐所以就會發現右翼既綠木係唔見左。呢個防守模式會令到中堅被拉走﹐另一個中堅同左閘要順移到右路補位﹐就令到左邊露出極大既空間。當個波輾轉去到米希達欣沉底出波時﹐拜利係出左去右小禁區角封位﹐麥佳亞小禁區守住迪施高﹐而泰利斯則企左去小禁區龍門既正前方﹐後面既柏度係完全無人看顧。柏度就好輕鬆撞番個波入中路俾迪施高攻門。成個防守模式係綠木向前逼果陣已經出現左問題。好快就輸埋第二球﹐呢下就輸費特高張玩出火﹐俾人偷完射個靚波都無話可說。
隊內最佳球員點會唔係你
得勢不饒人既羅馬緊接幾個攻勢不停埋門。腳又試過﹐頭都出埋﹐都被今場神勇既迪基亞一一擋走。果下DOUBLE SAVE更可以振奮到士氣。咁既表現蘇B認真頭痛﹐係幸福的煩惱。蘇B見到立刻換入馬迪去穩定番個防守亦係非常快速及有針對既調動﹐抵讚！卡雲尼係六十八分鍾既入波直接將羅馬反CUP既奢望粉粹。極具級數既跑位同埋門技巧再次現場指導綠木。

對決賽非常有信心
場波跟住都冇乜懸念﹐羅馬都好努力繼續爭取入球﹐但始終四球差距實在太大。經過不繼嘗試後﹐一次攻勢令到泰利斯擺左個老烏﹐最後羅馬贏二比三﹐但總比數則以五比八輸左比曼聯﹐四強出局。今場曼聯既最大功臣就必定係迪基亞﹐相信決賽都會係佢繼續鎮守最後一關。睇完近呢幾場曼聯既表現﹐小弟對決賽非常有信心﹐餘下既本土賽事可以試下陣練下奇兵﹐等歐霸決賽果陣可以有秘密武器改變戰局。(唔駛用就最好)